The Definitive Guide to Living in the Capital , Cairo , Egypt

صحة ولياقة

فريقي.. حلم جديد بيبدأ على ملاعب القاهرة

أكاديمية فريقي جورج عادل دوري الدرجة الأولى فريق فريقي كرة القدم
فريقي.. حلم جديد بيبدأ على ملاعب القاهرة
    بواسطة
    Omar Abd-elmaqsoud

    عندنا في مصر.. رياضة كرة القدم مش مجرد رياضة عادية، هي رياضة بتمثل شغف وطموح وحلم كتير من الشباب، وده لإن لعيبة كرة القدم عندنا ومن زمان بيبقوا نجوم، ومش بس على مستوى مصر، لأ كمان على مستوى العالم.. وطبعًا محمد صلاح نموذج مشرف لده.

    وحلم لعيب الكورة كان دايمًا حلم أساسي عند كل ولد من الطفولة، وبيفضل يكبر ويكبر لحد ما نوصل لمرحلة بنفهم فيها إن الموضوع مش بس مهارة وموهبة لأ ده كمان تركيز وتدريب.. وهنا بتبدأ أحلمنا تغيب واحدة واحدة.. لكن “جورج عادل” كان له نظرة تانيه مختلفة تمامًا عن حلم “لعيب الكورة” المحترف، ومن هنا بدأت حكايته مع أكاديمية “فريقي” اللي أسسها.. واللي تعتبر واحدة من أهم وأنجح الأكاديميات الرياضية المتخصصة في إنشاء وتنمية مهارات لاعب كرة القدم على أسس علمية وتقنية حديثة، وتدريب وتغذية متوافقة مع المعايير الدولية للاعبين المحترفين.

    البداية كانت حب “جورج” لكرة القدم وممارستها باستمرار مع أصدقاؤه، لحد ما اكتشف إن الوصول للعالمية مش سهل، وإن لازمه شغل كتير جدًا علشان يبقى على أول الطريق.

    بدأ “جورج” يدور ويقرأ ويشوف ويراجع في كل حاجة ليها علاقة ببناء جسماني سليم ومتكامل للعيب الكرة المحترف، وحط قدامه صلاح وكريستيانو كمثال، وقدر يوصل للأنظمة الغذائية اللي بيتبعوها، والتدريبات في أرض الملعب وخارج أرض الملعب، وعملية التأهيل بعد الإصابة، وكيفية الاسترخاء والراحة والتعامل مع الإصابات وكل ما يتعلق بروتين لعيب الكورة المحترف في يومه.

    ولإن جورج عارف إن حلم لعيب الكورة المحترف حلم بيشاركه فيه مئات الآلاف من الشباب المصري، جورج قرر يأسس أكاديمية “فريقي” علشان تبقى المكان اللي يقدر من خلاله يطلع جيل لعيبة تقدر تنافس محليًا ودوليًا كمان.. وده بفضل النظام التدريبي الدولي القاسي اللي حطه “جورج” في الأكاديمية.

    لما قابلنا “جورج” في “كايرو 360” اتكلمنا معاه عن  البداية اللي أكيد كانت صعبة، وسألناه وصل لفين دلوقتي؟ وزي ماقال لنا إن أي بداية دايمًا بتبقى صعبة، وباعتباره مؤسس الفكرة وصاحبها، فكان لازم يصرف عليها ويراعيها، وده كا مجهود كبير عليه، لكن في طريقه ربنا كان بيبعتله حاجات حلوة تهون عليه، زي شباب موهوبين يكون عندهم نفس الحلم، ويبدأ معاهم من الصفر.

    جورج اختار إنه يبدأ في القاهرة لأكثر من سبب، أولهم إن القاهرة هي مركز اهتمام كتير من الأندية المحلية اللي بتلعب في الدوري الممتاز، وده معناه تحدي أصعب.. ده غير إنه عاوز يوصل باللعيبة اللي معاه لأحسن نوادي على المستوى المحلي، ومنها للعالمية.. وفعلًا بدأ مع دوري الناشئيين مع “نادي اتحاد عرب غنيم” بحلوان .. لحد ما وصل النهارده لتطوير وتدريب لعيبة لصالح نادي “أسمنت حلوان” اللي بيلعب في دوري الدرجة الأولى حاليًا.

    استكمال الدراسة الأكاديمية عن كيفية إدارة فريق كرة محترف بكل تفاصيله، هو ده اللي بدأ يعمله “جورج” فعلًا زي ما قال لنا فيؤ كلامنا معاه، وهو ده اللي هيركز عليه إلى جانب تبني مواهب مميزة كمان يوصل بيها من خلال  “فريقي” للمنافسة في الدوري الممتاز، ومنه للعالمية. 

    وبعد رحلة طويلة.. يوم الأربعاء 27 أكتوبر بدأ أبطال “فريقي” رحلته في نادي “أسمنت حلوان”، ضمن المجموعة الأولى لمباريات دوري الدرجة الرابعة، وواجه نادي منشية حلوان الجديدة.

    فريق “كايرو 360” بيتمنى لـ “فريقي” كل التوفيق!

    مقترح