The Definitive Guide to Living in the Capital , Cairo , Egypt

كل اللي محتاجين تعرفوه عن مصل الأنفلونزا
    بواسطة
    Mohamed Talaat

    بما أن الشتاء دخل وخلاص بقينا قدام الأمر الواقع، يبقى لازم نستعد كويس للفصل ده، وخصوصًا لمشاكل الإصابة بالربد والأنفلونزا، وعلشان كده النهاردة هنقولكم تفاصيل أكتر عن مصل الأنفلونزا الموسمية، وموانع استخدامه وأماكن تواجده.

    مصل الأنفلونزا بيكون متاح كل سنة في الوقت ده تقريبًا، وأي حد يقدر ياخده من سن 5 سنين، ولحد 65 سنة، وهو غير ضار لمرضى السكر والقلب وأمراض الصدر والكبد والكلى، وأصحاب المناعة الضعيفة، أو اللي عملوا عمليات قبل كده، وكمان مافيش موانع أن الحوامل والعاملين بالمجال الصحي أنهم ياخدوه، والطبيب والصيدلي عارف كويس الطريقة اللي بيتاخد بيها المصل.

    وممنوع نهائيًا أخذ المصل لأي شخص له تاريخ صحي غير جيد مع المصل، أو كان له آثار جانبية عليه، خاصة اللي عندهم حساسية من مصل الأنفلونزا ومكوناته.

    والمصل بيتوفر في مركز المصل واللقاح، و13 منفذ تابعين لشركة “فاكسيرا” التابعة لمركز المصل واللقاح، بسعر 65 جنيه، وكمان متوفر في المكاتب التابعة لوزارة الصحة، وجميع المستشفيات الحكومية.

    أما بخصوص فروع المصل واللقاح بالقاهرة اللي متوافر فيها المصل فهي:

    المركز الرئيسى: 51 ش وزارة الزراعة، العجوزة، والفرع ده بيشتغل طوال أيام الأسبوع من 9 صباحًا لـ9 مساءً.

    فرع نادي الشمس: شارع عبد الحميد بدوي – بوابة 2.

    فرع نادي القطامية الرياضي، التجمع الخامس.

    مركز تطعيمات المعادي: نادي المعادي (خاص بالأعضاء فقط).

    نادي 6 أكتوبر أمام البوابة الرئيسية لجامعة 6 أكتوبر.

    مركز تطعيمات الرحاب: فيلا 102- 103 شارع أحمد شوقي خلف المول التجاري (1) بجوار سينما الرحاب.

    مطار القاهرة: صالة 2.

    نادي الزهور الرياضي فرع مدينة نصر –  شارع يوسف عباس.

    نادي الزهور فرع القاهرة الجديدة – منطقة  المستثمرين الجنوبية – أمام جامعة المستقبل.

    ومتوفر كمان في الصيدليات، لكن ننصحكم تختاروا صيدلية كبيرة، علشان في أماكن بتبيعه مغشوش.

    مقترح