Mohamed Talaat
على الرغم من إن منظمة الصحية العالمية أعلنت عن نجاح الصين في احتواء فيروس كورونا المستجد و المعروف علميًا باسم “كوفيد-19″واللي ظهر لأول مرة في مدينة “ووهان” الصينية، إلا إن الانتشار العالمي المخيف ليه لسه مستمر، وبتظهر حالات إصابة جديدة كل لحظة على مستوى العالم.. علشان كده، هنقدم لكم 15 نصيحة مقدمة من موقع “Boldsky” ممكن تساعد على الحد من انتشار العدوى:
1- إلغوا السفر:
لو بتعانو من أعراض شبه الإنفلونزا، زي الكحة أو السخونية أو سيلان الأنف أو العطس، بلاش أي خطط للسفر طول فترة المرض.
2- متقعدوش في أماكن زحمة:
لو فيه أشخاص بيحملوا الفيروس، مش بيظهر عليهم الأعراض طول فترة حضانة الفيروس اللي هي 14 يوم، وبالتالي مش هتقدروا تميزوا أو تعرفوا مين مصاب ومين لأ، علشان كده بلاش تقعدوا في أماكن زحمة كتير، ولو كنتم مضطرين يبقى لازم يكون فيه وقاية.
3- خلوا مسافة بينكم وبين الناس:
خلوا دائمًا فيه مسافة مناسبة بينكم وبين أي شخص عنده برد، تكون على الأقل ½ متر، وده لإن أعراض الكورونا والبرد واحد، ومش هتقدروا تفرقوا بينهم، وأهم حاجة تجنبوا التعرض للرزاز الصادر من أي شخص.
4- اغسلوا إيديكم:
اغسلوا إيديكم دايمًا بالمياه والصابون لفترة ما بين 10 لـ 30 ثانية، وبشكل مستمر (مش أقل من 3 مرات في اليوم) واستخدموا مطهرات كحولية ومعقمات طول الوقت.
5- حافظوا على النظافة العامة:
حاولوا تحافظوا دائمًا على نظافة الأسطح المحيطة بيكم، سواء في البيت أو في الشغل، وحاولوا تركزوا في النظافة على الحاجات المشتركة واللي بتستخدم كتير، زي البوابات ومقابض الأبواب، وكل حاجة بتستخدموا ليها مطهرات متخصصة.
6- تجنبوا لمس العين:
لما حد بيعطس أو بيكح ومش لابس كمامة، في رزاز بيتطاير في المكان، وبيتركز على الأسطح، وممكن يتنقل لكم الرزاز ده عن طريق اللمس.. علشان كده بلاش تلمسوا عينيكم والفم والأنف لأن الفيروس بيفضل نشط على الأسطح 48 ساعة.
7- رعاية المسنين:
كبار السن بتكون مناعتهم ضعيفة، علشان كده لازم يكون فيه عناية خاصة بيهم، خاصة مع مرض زي الكورونا وانتشاره.
8- تغطية الفم والأنف:
لو عندكم أعراض إنفلونزا أو عطستم أو كحيتم لازم تستخدموا مناديل ورق لمرة واحدة علشان تغطوا الفم والأنف، وبعدها تترمي على طول، وتغسلوا إيديكم بمطهرات أو مياه وصابون.
9- متلمسوش الكمامة:
لو عندكم كحة أو بتعطسوا بلاش تلبسوا كمامة، ولو لبستوها بلاش تلمسوها من جوه، علشان تتجنبوا انتقال العدوى للإيدين ومنها للأسطح وللأشخاص التانية.
10 – خلوا معاكم كمامة زيادة:
هيكون حلو لو معاكم كمامة زيادة علشان لو لقيتوا حد عنده أعراض انفلوانزا تدوها له يغطي بيها أنفه وفمه.
11- التعامل بحذر مع الكمامة:
خليكم دايمًا حذرين في تعاملكم مع الكمامة، ولازم لما تقلعوها يكون بشكل آمن، وترموها في كيس بلاستيك لو هي من اللي بتستخدم مرة واحدة، وتغسلوا إيديكم بالمياه والصابون بعد ما ترموها.
12 – متاكلوش أكل مش مستوي:
خلوا أكلكم على قد ما تقدروا مستوي كويس، ولو لمستم أكل ني لازم تغسلوا إيديكم فورًا بالمياه والصابون.
13 – ممنوع البصق:
بلاش نهائي البصق في الأماكن العامة والشوارع، لإن الفطريات ناقلة للعدوى، وممكن تحت أي ظرف أي شخص يلمس السطح ويصاب بالعدوى.
14 – بلاش بوس وأحضان:
معلش.. وقفوا بوس وأحضان، علشان تتجنبوا انتقال العدوى من شخص لآخر.
15 – ابعدوا عن أسواق الحيوانات:
الحيوانات الأليفة مش بتنقل العدوى، لكن تجنبوا تروحوا مزارع أو أسواق حيوانات وطيور وأماكن الذبح.
في النهاية.. كايرو360 بيتمنى السلامة للجميع.
مقترح
معالم وسياحة
بيضم مئات التحف الفنية المنسية.. معلومات عن متحف "ركن فاروق" بحلوان
استراحة فاروق الملكية الملك فاروق +4
الحياة في كايرو
