The Definitive Guide to Living in the Capital , Cairo , Egypt

صحة ولياقة

ليه لازم نتوقف فورًا عن تدخين الشيشة؟

أضرار الشيشة أول أكسيد الكربون سرطان شيشة فحم كورونا معسل منظمة الصحة العالمية
ليه لازم نتوقف فورًا عن تدخين الشيشة؟
    بواسطة
    Omar Abd-elmaqsoud

    منظمة الصحة العالمية أصدرت نصيحة حديثة لكل المدخنين بالتوقف فورًا عن تدخين الشيشة.. بسبب إنها وسيلة سريعة وبيئة خصبة لانتقال فيروس كورونا المستجد (كوفيد-19) بين اللي بيشربوها، بسبب إنه مرض معدي وبيتنقل عن طريق الرذاذ الخارج من الفم أو الأنف أو ملامسة الأسطح الملوثة به.

    لكن بالإضافة لفيروس كورونا، فيه أضرار تانية خطيرة بتصيب الجهاز التنفسي والجسم بشكل عام بسبب الشيشة.. كايرو 360 هيعرفكم في الموضوع ده على أخطر 5 أضرار بتسببهم الشيشة:

     

    1- كتير من اللي بيبطلوا سجاير بيتجهوا لتدخين الشيشة، معتقدين إن ضرر الشيشة أخف بكتير من ضرر السجاير.. لكن خلينا نصدمكم ونقولكم إن ده اعتقاد خاطئ جدًا.. ففي تقرير سابق لمنظمة الصحة العالمية، مبني على دراسات علمية قال إن مدخن الشيشة بيدخن بمتوسط 60 دقيقة في المرة الواحدة.. وده معناه إنه بيسحب كمية دخان أكتر من 200 ضعف كمية الدخان اللي بيشربه مدخن السيجارة، وحتى بمرور الدخان على الماء، بيبقى فيه كميات كبيرة من المواد الكيميائية السامة والمعادن الثقيلة والمواد المسببة للسرطان.

    2- استخدام الفحم الطبيعي أو الصناعي في حرق المعسل أو التبغ، ليه مخاطر صحية أكبر من المخاطر اللي بتنتج عن إشعال التبغ مباشرةً في السجاير. وده بيحصل نتيجة استنشاق الغازات والمواد الكيميائية السامة الناتجة عن حرق قطع الفحم.

    3- إضافة المواد السكرية أو اللي بتضيف طعم أو نكهة للتبغ المستخدم في المعسل، واللي بيخلي ليه طعم وريحة جذابين زي الجلسرين ودبس قصب السكر والعصارات الصناعية أو الطبيعية للفواكه المتخمرة والألوان الصناعية.. بيضيف قائمة جديدة من المواد الكيميائية السامة والمسرطنة على قائمة المواد الموجودة أصلًا في المعسل والفحم.

    4- فيه دراسة مهمة لباحثين في جامعة فلوريدا واتنشرت في المجلة الأمريكية للطب الوقائي، عن معدلات غاز أول أكسيد الكربون في الدم لرواد القهاوي اللي بتقدم شيشة، كشفت ارتفاع معدلات غاز أول أكسيد الكربون بين الرواد سواء كانوا بيدخنوا شيشة أو لأ.

    5- للأسف الاعتقاد بإن تغيير “الـلي” واستخدام “لي” طبي أو للاستخدام مرة واحدة بيكون آمن، وبيمنع انتقال الأمراض من شخص للتاني هو اعتقاد خاطئ تمامًا.. وده لإنه مجرد جزء واحد من أجزاء كتيرة بيمر فيها الدخان.. ده غير إن كثير من مستخدمي الشيشة مش بس بيستنشقوا الدخان.. لكن بينفخوا الهواء في “المبسم” لتعديل طعم المعسل في “الحجر”.. وبناءً عليه كثير من الهيئات الطبية العالمية زي “منظمة الصحة العالمية” و”مراكز السيطرة على الأمراض والوقاية – CDC” و”رابطة أمراض الصدر الأمريكية” حذرت من احتمال تسبب استخدام الشيشة في انتقال الأمراض المعدية المختلفة زي السل والتهابات الكبد وميكروبات وفيروسات التهابات الجهاز التنفسي المختلفة واللي منها الـ “كورونا”.

    مقترح