Mohammed Sabry
الاكتئاب حالة نفسية بتأثر على مزاج الشخص وسلوكه. وبيتحول من شخص سعيد مقبل على الحياة، لشخص حزين ومنطوي. وممكن يوصل لدرجة الانتحار. زي ما عرفنا إمبارح من الأخبار، وشوفنا الفيديو بتاع البنت اللي رمت نفسها قدام المترو. وده كان بسبب الظروف الصعبة اللي بتمر بها. وعلشان كده جمعنا لكم أهم النصائح اللي تساعدكم في مواجهة الاكتئاب، وتعيشوا حياة سليمة:
1- زيارة الطبيب النفسي
دي أهم خطوة لازم يقوم بها الشخص، لو حس إنه بدأ يميل للاكتئاب. وده مش معناه إنه مجنون، لأن ناس كتير مابترضاش تروح للدكتور بسب الفكرة دي. الخطوة دي هتحميه من نتائج سلبية كتيرة بعد كده.
2- تجديد النشاط اليومي
الاكتئاب بيخليك مكسل تعمل حاجة، وده بيخلي الأيام شبه بعضها. لكن لما تعمل كل يوم نشاط مختلف، وتخرج من البيت لأي سبب، ده هيساعد في تقليله والحد منه. بلاش تفضل في أوضتك واخرج للدنيا.
3- ممارسة الرياضة
الاستمرار في ممارسة الرياضة بيدي نفس نتائج الأدوية المضادة للاكتئاب. لأنها بتنشط مواد كيميائية في الدماغ، بتحسن من الحالة النفسية. ده طبعًا غير أهميتها للصحة والجسم.
4- خليك قريب من الناس المريحة
خليك دايمًا وسط أصحابك وأهلك، والناس اللي بترتاح معاهم. وهم كمان هيفضلوا جنبك ويساعدوك تحت أي ظرف. أما الناس اللي دايمًا بتنشر الكآبة والحزن، فالبعد عنهم أكبر مكسب.
5- الأكل الصحي مهم
الأطعمة اللي فيها أحماض الأوميجا 3، بتحسن الحالة المزاجية بشكل كبير. ومنها: التونة والسلمون. وكمان الأكل اللي بيحتوي على حمض الفوليك زي: السبانخ والأفوكادو
6- خد القدر الكافي من النوم
ضروري جدًا تنام في ميعاد محدد، ولعدد ساعات كافي. لأن قلة النوم بشكل عام بتخلي المود وحش جدًا. وفي نفس الوقت بلاش النوم لساعات طويلة زيادة عن اللزوم.
