“احكيلي”.. أول وثائقي مصري في مهرجان القاهرة السينمائي
احكيلي الفيلم الوثائقي ماريان خوري مهرجان القاهرة السينمائي الدولي يوسف شاهين
Omar Abd-elmaqsoud
الفيلم الوثائقي المصري “احكيلي” واحد من الأفلام اللي أعلن مهرجان القاهرة السينمائي الدولي في دورته الـ41 عن اختياره في المسابقة الرسمية للمهرجان اللي هيكون في الفترة من 20 و29 نوفمبر في دار الأوبرا المصرية.
الفيلم من إخراج وإنتاج “ماريان خوري” وبيحكي عن رحلة إنسانية لأربع سيدات من أربع أعمار أو أجيال مختلفة، لكن الرابط اللي بينهم إنهم من قرايب المخرج العبقري الراحل “يوسف شاهين” واللي ليه أصول من بلاد الشام.
أحداث الفيلم بتدور في قالب حواري في جلسة دردشة بين أم وبنتها، والاتنين بيشتغلوا في مجال السينما، وبتقوم بدور الأم مخرجة الفيلم “ماريان خوري” والبنت هي بنتها “سارة” اللي بتدرس السينما في كوبا.
هنشوف في الفيلم مشاهد آرشيفية بتتعرض للمرة الأولى للجمهور، وبيظهر فيها أرشيف كبير لعائلة المخرج الراحل “يوسف شاهين” على مدى 100 سنة، سواء صور أو فيديوهات أو تسجيلات مع والدة “ماريان” وجدتها وخالها “يوسف شاهين” ومنها تسجيلات ليوسف شاهين مع والدته كان سجلها بنفسه، ده غير إن أحداث الفيلم بتدور ما بين المدن اللي ارتبطت بيها العائلة؛ زي الإسكندرية والقاهرة و باريس ولندن وهافانا.
في أحداث “احكيلي” هيبان دور كل سيدة من سيدات عائلة “يوسف شاهين” الحقيقة في الحياة، وده هيخلي “ماريان خوري” وبنتها يحاولوا هما كمان يكتشفوا صعوبات الحياة ومتعها من خلال اللقطات والمشاهد دي.
مشاركة فيلم وثائقي وكمان مصري في المسابقة الدولية لمهرجان القاهرة السينمائي تعتبر حاجة بتحصل لأول مرة في الدورة الحالية للمهرجان، وده بيعكس بدأ الاهتمام بالسينما الوثائقية اللي تقريبًا كان حضورها في المهرجان خلال الدورات اللي فاتت كان شبه منعدم، ده غير إنه بيعكس إعجاب إدارة المهرجان بفيلم “احكيلي” للمخرجة ماريان خوري.
مقترح
صحة ولياقة
اسكيت X.. أول أكاديمية في مصر بتعلم التزلج لأبطالنا من أصحاب الهمم!
أصحاب الهمم أكاديمية سكيت X +12
معالم وسياحة
