The Definitive Guide to Living in the Capital , Cairo , Egypt

اختيارات كايرو 360: أفضل المراكز الثقافية في القاهرة لعام 2018
    بواسطة
    Cairo 360

    القاهرة فيها أماكن ثقافية كتير، بتتنافس علشان تقدم أفضل الأنشطة لسكان العاصمة، وأهمية الأماكن دي إنها دايمًا بتدعم الفنون والمواهب المختلفة وبتسعى لنشر الفن والثقافة في كايرو.

    علشان كده كان لازم نختار لكم أفضل الأماكن دي، تعالوا نعرف مع بعض الفائزين في جوائز اختيارات محرري كايرو 360 لأفضل الأماكن الثقافية لعام 2018.

     

     

    3elbt Alwan – علبة ألوان

    مكان هايل! بيقدم أنشطة كتير، وعلشان الألوان من الحاجات الحلوة في الحياة، كل يوم من أيام الأسبوع له لون في علبة ألوان. وده بيظهر في الأنشطة والحفلات اللي بيعملها المكان.

     

     

    مكان – Makan

    المركز المصري للثقافة والفنون “مكان”، بيحاول يحافظ على الترث المصري الأصيل، المتمثل في الأغاني الشعبية. وده بيبان في حفلاته، اللي بتحييها فرق متنوعة.

     

    أوزيريس – Osiris

    من الأماكن المهمة في القاهرة، اللي بتهتم بالأنشطة والفعاليات الفنية والثقافية المختلفة.

     

    مجنوليا – Magnolia Leaves of Art 

    مجنوليا هي مكتبة تقرأ فيها ببلاش. ومساحة تعرض فيها أعمالك. وسينما تتفرج فيها على أفلام. من الآخر كده، مجنوليا في الزمالك هي المكان الشامل.

     

     

    زاوية – Zawya

    أول دار عرض للسينما البديلة في مصر. وبرنامجها بيجمع بين: عروض سينمائية – فعاليات. وكمان بتعرض أعمال سينمائية من دول مختلفة.

     

    سوما آرت – Soma Art

    مكان بيحاول يدعم الأنشطة الفنية والثقافية، بالكورسات والممارسات العملية. وده بيساعد على تطويرها بشكل أكبر.

     

     

    ساقية عبد المنعم الصاوي – El Sawy Culturewheel:

    في وقت قليل قدرت الساقية أنها تبقى علامة من علامات الزمالك، والحركة الثقافية في القاهرة ككل، وده لأنها أتاحت الفرصة لكثير من المبدعين في كل المجالات -سواء مفكرين، شعراء أو فنانين- أنهم ينشروا الثقافة بين قطاع كبير من الناس، من أول الأستاند أب كوميدي الخفيفة لأعمق الندوات، الساقية بتستضيف فعاليات كثيرة تخليها بسهولة تدخل وسط قائمة أفضل المراكز الثقافية.

     

    آرتس مارت – Arts Mart:

    بالرغم من أن ظهورهم جديد على الساحة الفنية في مصر، إلا أن بمقرهم المختلف والضخم واللي بيستوعب عدد كبير من الأعمال الفنية المعاصرة بأشكالها المختلفة قدروا أنهم يشدوا عدد كبير من المهتمين بالفن التشكيلي في وقت قليل خارج حدود زحمة القاهرة.

     

     

    رووم آرت سبيس – ROOM ArtSpace:

    مساحة فنية لكل الأنشطة الإبداعية بمجالاتها المختلفة، من أول الحفلات الموسيقية، مرورًا باليوجا وحلقات الطبول، وحتى المعارض الفنية.

     

    درب 1718 – Darb 1718:

    علامة ثانية من علامات الثقافة في القاهرة، الطريق لدرب 1718 لوحده متعة، فعالياته متعددة وتناسب جميع الأذواق الثقافية، سواء المعارض الفنية، الحفلات الموسيقية أو حتى الحلقات النقاشية المفتوحة واللي بـ يشارك فيها الحضور بكل حرية وتحضر.

     

    آرت توكس – Art Talks:

    مش بس بيقدم ندوات عن تاريخ الفن المصري والفن المعاصر بصفة شهرية؛ آرت توكس كمان بيقدم للجمهور بمعارض مختلفة لفنانين شباب معاصرين.

     

    سفر خان جاليري – Safar Khan Gallery:

    جاليري سفر خان معروف بمعارضه اللي بتتيح للجمهور أنه مش بس يشوف أعمال لكبار الفنانين الموجودين على الساحة الفنية على الطبيعة، ده كمان بيقدم معارض لفنانين رواد في تاريخ الفن التشكيلي المصري.

     

    قاعة الزمالك للفن – Zamalek Art Gallery:

    غير أنهم بيقيموا معرضين لفنانين معاصرين بصفة شهرية، قاعة الزمالك للفن من القاعات الكبيرة اللي بتستوعب عدد كبير من الأعمال أيًا كان حجمها.

     

    جيبسم جاليري – Gypsum Gallery:

    من القاعات الفنية الحديثة نوعًا ما على الساحة الفنية المصرية، جيبسم جاليري بيقدم العديد من المعارض الفردية والجماعية، ده غير نشرات فنية وأعمال فنية محدودة وغيرها من الفعاليات الفنية المهمة.

     

     

    جاليري مصر – Gallery Misr:

    جاليري مصر –اللي تأسس سنة 2011– قدر في وقت قليل أنه يكون واحد من أهم الجاليريهات في القاهرة، لأنه معروف بجودة الأعمال الفنية اللي بيعرضها، سواء لوحات، منحوتات أو حتى أعمال فنية متعددة الوسائط.

     

     

    قاعة بيكاسو للفنون – Picasso Art Gallery:

    بيكاسو بيقدم معارض –جماعية وفردية- بصورة منتظمة لكبار الفنانين المصريين، ده غير أنه بيتميز بصالة عرض واسعة، تستوعب عدد كبير من الأعمال.

     

    مقترح