The Definitive Guide to Living in the Capital , Cairo , Egypt

الإجابات فيها كل التفاصيل.. 9 أسئلة عن معرض القاهرة الدولي للكتاب
    بواسطة
    Mohamed Talaat

    ساعات قليلة بتفصلنا عن الحدث الثقافي اللي هينور مصر، وهو معرض القاهرة الدولي للكتاب في دورته الـ الـ53، واللي هيقام في مركز مصر للمعارض الدولية، خلال الفترة من 26 يناير الجاري وحتى 7 فبراير القادم، وهتكون دولة اليونان هي ضيف الشرف، والكاتب يحيى حقي هيكون هو شخصية المعرض، أما الكاتب عبد التواب يوسف فهيكون شخصية معرض كتاب الأطفال.

    في الموضوع ده هنعرفكم على تفاصيل المعرض من خلال إجابات أكتر 9 أسئلة منتشرة حاليًا.

     

    إمتى هيتم فتح أبواب معرض القاهرة الدولي للكتاب للزيارة؟

    المعرض هيتم افتتاحه رسميًا يوم الأربعاء 26 يناير الجاري، لكن هيتم فتح أبوابه أمام الجمهور في تمام الساعة 10 صباحًا يوم 27 يناير.

     

    هل فيه إجراءات احترازية أثناء فعاليات المعرض؟

    كل الأنشطة داخل المعرض هتطبق مبدأ السلامة، وهيتم الحفاظ على التباعد الاجتماعي واتباع كافة الإجراءات الاحترازية، لمواجهة فيروس كورونا المستجد المنتشر فى جميع أنحاء العالم. وكافة أنشطة المعرض هتكون في مناطق مفتوحة أو شبه مفتوحة، ووزارة الصحة هتكون مشرفة على الإجراءات الاحترازية، والمعرض هيضم مركز لقاح ومركز بي سي آر للأجانب القادمين من الخارج.

     

    هل دخول الأطفال وكبار السن وذوي الهمم هيحتاج تذكرة؟

     لا، دخول الأطفال تحت سن 12 سنة هيكون بشكل مجاني، ونفس الأمر مع كبار السن وذوي الاحتياجات الخاصة (أصحاب الهمم).

     

    إزاي هيتم حجز تذكرة الدخول إلكترونيًا من خلال منصة المعرض؟

     هيتم الدخول على المنصة الخاصة بمعرض الكتاب على الإنترنت وبعدها هنضغط على خيار احجز تذكرتك، وهتدخل البيانات الشخصية المطلوبة: (الاسم – رقم الهاتف – البريد الإلكتروني – العمر – الجنسية – النوع)، وبعدها هيتم الحصول على تذكرة الزيارة اللي هتوصلك في رسالة نصية على واتساب للرقم المسجل، ونسخة تانية منها على البريد الإلكتروني، هتحتوى على بوابة الدخول وعدد مرات زيارة المعرض.

     

    هل من الضرورى طبع التذكرة عند دخول معرض الكتاب؟

    هيقدر الزائر الدخول بالتذكرة على الهاتف من غير ما يحتاج لطباعتها.

     

    هل هيتم توفير وسائل مواصلات للذهاب والرجوع من المعرض؟

    خصصت وزارة الثقافة بالتعاون مع وزارة النقل والمواصلات ممثلة فى هيئة النقل العام، 11 خط أتوبيس من وإلى مقر المعرض، وهتنطلق من مختلف مناطق القاهرة، من خلال 115 سيارة بمتوسط زمن تقاطر 20 دقيقة، وده للتيسير على الزوار، وسعر التذكرة 10 جنيه بس. (تفاصيل وسائل المواصلات هنا).

     

    هل هيكون في المعرض أنشطة خاصة بالطفل؟

     هيتم تخصيص قاعة كاملة للأطفال هتشهد أنشطة كتير، كمان جناح الطفل أصبح في مبنى مستقل بذاته في القاعة 5، وهيضم كل ناشري الأطفال بشكل كامل.

     

    إيه هو عدد قاعات المعرض وعدد دور النشر المشاركة؟

    بييضم المعرض (5) قاعات رئيسية للعرض، وبيبلغ عدد الأجنحة 879 جناح، وهيصل عدد الناشرين، والجهات الرسمية المصرية والأجنبية 1067 دار نشر وتوكيل، وعدد الناشرين المصريين 292 دار نشر، وعدد الناشرين المصريين (كتاب أجنبي) 43 ناشر، وعدد الناشرين المصريين (كتاب الأطفال، ووسائل تعليمية، وكتاب تعليمى مدرسي) 89 دار نشر، وعدد الناشرين المصريين (كتاب إسلامى وتراث) 97 دار نشر، وعـدد الناشرين المصريين (كتـاب أكاديمي) 49 ناشر، وعـدد الناشرين العرب 298 ناشر عربي، وعدد الناشرين (كتاب صوتي) 1، وعدد المشاركين من ذوى القدرات الخاصـة 2، وعدد المؤسسات الصحفية 7 مؤسسات، وعدد التوكيلات 95 توكيل مصري، و45 توكيل عربي، وهتشارك في المعرض 50 دولة، من كل قارات العالم.

     

    هل هيكون فيه مشاركة لمكتبات سور الأزبكية؟

     أيوة، هيوصل عدد مكتبات سور الأزبكية اللي هتشارك في المعرض السنة دي لـ 49 مكتبـة.

    مقترح