The Definitive Guide to Living in the Capital , Cairo , Egypt

موسم المهرجانات الفنية ماوقفش عند حدود القاهرة، وبالتزامن مع المهرجان القومي للمسرح ومن بعده مهرجان الصيف للموسيقى والغناء في الأوبرا وبعدهم مهرجان القلعة، جاء مهرجان تاني خارج حدود القاهرة مع بدايات الشهر الماضي ومشي في مسار تصاعدي لقوة فعالياته لحد ما بقت فعالياته مؤخرًا بتجبر عشاق الفن على الخروج برة حدود القاهرة لمجرد حضور حفلة أو عرض فيه!

 

مهرجان الصيف الفني المقام بمركز الفنون التابع لمكتبة الإسكندرية قدم لزوار عروس المتوسط في الصيف فرصة هايلة لفقرة إضافية مميزة على قائمة الأنشطة اليومية في برنامج زيارتهم للإسكندرية، وقدم لسكان المدينة وجبة دسمة متصلة على مدار شهر ونصف تقريبًا.. المهرجان اللي بدأ مع نهاية يوليو ومستمر لحد 8 سبتمبر عامل معانا –ولسه بيعمل- الواجب وزيادة، جمال المكان والقيمة الثقافية والتاريخية الكبيرة ليه كمان عوامل مؤثرة في الوضع، الوضع اللي بيسلم كل الجمهور لحالة من الانبساط الأكيد، والإشباع النفسي والروحي المضمون.

أبرز فعاليات المهرجان من بداياته كانت حفلات نجوم عرب ما اتعودش الجمهور المصري المحب ليهم أنه يحضر حفلاتهم، زي مارسيل خليفة و فايا يونان ومؤخرًا ريما خشيش.. والمسلسل لسه مستمر بحفلة ختام المهرجان اللي هتكون مع الفنانة الجزائرية ذائعة الصيت: "سعاد ماسي".

 

الجدير بالذكر أنه فعاليات المهرجان لم تقتصر فقط على الحفلات الموسيقية والغنائية، وإنما في مسار تاني موازي لمسار الحفلات وهو مسار العروض المسرحية أو السينمائية، ده غير بعض الورش الفنية على فترات.. وده اللي عمل حالة من التنوع انعكست على القيمة الفنية والتسويقية للمهرجان.

الفعاليات بيتم إقامتها بشكل يومي على المسارح وقاعات العرض المختلفة حسب طبيعة الفعالية وجماهيريتها، و زي ما قلنا فعاليات المهرجان هتنتهي يوم 8 سبتمبر، ومن هنا لحد يوم الختام عندنا شوية فعاليات قوية تستاهل المتابعة والحضور، زي مثلًا: حفل الفنانة "حنان ماضي" يوم الثلاثاء 30 أغسطس، و sessions الـ "يوجا" والـ "هيب هوب دانس" يوم الجمعة 2 سبتمبر، وحفل الفنانة اللبنانية "تانيا صالح" يوم السبت 3 سبتمبر، وحفل فرقة أصايل للفنون الشعبية الفلسطينية يوم الأحد 4 سبتمبر، وحفل الفنان "محمد محسن" يوم الأربعاء 7 سبتمبر.. بالإضافة للحفل الختامي لـ "سعاد ماسي" يوم الخميس 8 سبتمبر.

تقدروا تتابعوا أخبار المهرجان وتعرفوا تفاصيل أكتر عن فعالياته ومواعيدها وأسعار تذاكر حضورها عن طريق صفحة فيسبوك الخاصة بالمركز الفني لمكتبة الإسكندرية.