The Definitive Guide to Living in the Capital , Cairo , Egypt

"اجعلني كلمة حلوة  تتقال.. أو تنكتب"
المعاني دايمًا تقيلة..
ومش كل الكلام شَيَّال!
لكن الكلمة اللي بـ تشيل.. مالهاش في الكون زي..
مراية سحرية عاكسة صورة النفس من جوة..
النفس اللي مش شايفها ولا بـ تشوفها عادة في تقلبات حياتك اليومية..
أرض من أراضي الله الواسعة.. عايشة المعاني على ظهرها في صورة كائنات وخلايق متنوعة..
عالم واسع من عوالم الملكوت..
خلق من خلق الله العظيم.. وخلاياه الأولية: شوية حروف!

سادة .. ولا مزين؟
ومن الكلام ما هو مزين..
الغنوة للكلمة اللي بـ تتغنى.. زينة
والنطق للكلمة اللي بـ تتقال.. زينة
والرسم للكلمة المرسومة.. زينة
والخط للكلمة المخطوطة.. زينة
وخير الزينة: البسيط المعبر

بسيط.. مُعبر!
الخط العربي.. علم من العلوم العربية الخالصة.. وفن من الفنون الراقية.. جدًا.. وفي الفترة الأخيرة بدأ يلاقي رواج كبير نسبيًا على مستوى المحبين والممارسين.. لكن يبقى سؤال الدراسة النظامية بلا جواب وافي.. تقريبًا.. لو حبيت أدرس.. أروح فين؟ وإيه نظام الدراسة؟ و.. و..

الجواب:
لو أنت واحد من كثيرين وقعوا في أسر هوى الكتابة العربية وجمالها.. وحبيت تدرس خط عربي.. تروح فين؟
بص ياسيدي.. عندك نوعين من الدراسة: الدراسة النظامية ودي بـ تبقى دراسة في مدارس حكومية، وبـ يبقى لها عدد سنين محدد ومناهج معتمدة وكلام من ده، ودي هـ تكون أنسب لو أنت ناوي تكمل في السكة بعد كده وحابب تبني نفسك بـ تدرج أكاديمي سليم.
أو الدراسة الحرة ودي هـ تبقى في أي ورشة من الورش اللي بـ تعملها المراكز الثقافية أو بيوت الفن، ودي هـ تكون أنسب لو أنت حابب الموضوع وواخده مجرد هواية، وهـ نقول نماذج لكل نوع بالتفصيل.

أولًا: الدراسة النظامية:
ودي عندك فيها 3 مدارس كبيرة موجودين في القاهرة:
– مدرسة السعيدية بالجيزة، ورقم تليفونهم للتواصل: 01141814650
– مدرسة خليل أغا بباب الشعرية، ورقم تليفونهم للتواصل: 01000337868
– مدرسة باب اللوق للخطوط، ورقم تليفونهم للتواصل: 01113190606
وبـ يبقى نظام الدراسة أربع سنوات دبلوم، بعدهم سنتين تكميليتين تعادل معهد فوق متوسط، والشرط الوحيد للتقديم أن المتقدم يكون معاه "كحد أدنى" شهادة الإعدادية، وبـ تحتاج 2 صورة شخصية + صورة البطاقة الشخصية + شهادة آخر مؤهل دراسي كأوراق مطلوبة للتقديم، والمدارس الثلاثة تابعة لوزارة التربية والتعليم.

وبـ يبقى فيه رسوم دراسية 30 جنيه + 60 جنيه مصروفات كتب في مدرسة خليل أغا (وده بـ يبقى متوسط المصاريف عامة في أي مدرسة من الثلاثة)، ومواعيد الدراسة فيها بـ يكون من الأحد إلى الأربعاء من الساعة الرابعة عصرًا، ومواعيد الدراسة في مدرسة السعيدية بـ تكون كل يوم ماعدا الجمعة والسبت، في مواعيد الدراسة العادية.
ولو صعب بالنسبة لك الانتظام في مواعيد الدراسة النظامية.. هـ تلاقي المدارس دي بـ تعمل دورات قصيرة لغير المتخصصين من وقت للثاني وبـ تبقى مواعيدها أفضل وأنسب للناس اللي واخدين الموضوع هواية مش أكثر.

ثانيًا: الدراسة الحرة:
ودي بـ تبقى في الغالب حاجات مش ثابتة (بـ تتعمل من وقت للثاني يعني) بـ تعملها المراكز الثقافية والفنية زي ساقية الصاوي مثلًا أو بيت السناري أو أي مساحة من مساحات العمل المشتركة اللي بـ تبقى مهتمة بالمواضيع اللي من النوعية دي.
(بيت السناري بدأ ورشة بالفعل يوم الخميس الماضي، وشغالين كل ثلاثاء من الساعة 3: 6 مساءً، ومستمرة لحد الثلاثاء 26 مايو، والتقديم فيها لازال مفتوح، اعرف أكثر من لينك الإيفينت.

وفيه برضه مؤسسات بـ تعمل ورش حرة بشكل دوري ومتكرر، زي مؤسسة "الحلقة" في منطقة الحسين بالقاهرة، ودي التقديم فيها مفتوح أي وقت، والدراسة بـ تبقى فردية (يعني كل متعلم بـ يبقى معاه مدرس بـ يشتغل معاه)، والدراسة مجانية والمدرسين مستواهم عالي، الدراسة بـ تبقى أيام الأحد، والثلاثاء، والخميس من كل أسبوع، وده رقم تليفون المؤسسة للتواصل: ‎‎01111771638.

وبس ياسيدي.. جرب كده.. وخلي الكلام ينطق!