دليل كايرو 360 لأنشطة المراكز الثقافية والفنية في رمضان 2011
Haisam Awad
فيه شوية أماكن من اللي بـ تحبهم في القاهرة ممكن يكونوا
قافلين في رمضان، بس دي مش مشكلة لأنك ممكن تقدر تسلي وتشغل نفسك بحاجات ثانية في
الأسابيع الجاية. لو أنت زهقان من مسلسلات رمضان اللي بـ تتفرج عليها لغاية
السحور وبـ تدور على طريقة ثانية ممكن تتسلي بها، يبقى اخرج من البيت وروح اعمل أي
نشاط ثاني لأن فيه حاجات كثيرة ممكن تعملها وهو ده رمضان في القاهرة.
في برنامج “حي” وهو تابع للمورد الثقافي ومسرح
الجنينة، هـ يستضيفوا فنانات عالميات في القاهرة علشان يعملوا حفلات كثيرة.
البرنامج هـ يبدأ يوم 11 أغسطس مع المغنية الأسبانية «أرا موسى». ويوم 18 أغسطس هـ
تقدم مشروع فردي للموسيقي باسم «نيستو» للفنانة التونسية بادية بوحريزي، ويوم 19
أغسطس فيه حفلة للجزائرية كريمة نايت مع فتحي سلامة وفرقته والفنانة الفلسطينية
ناي البرغوثي هـ تقدم حفلة يوم 25 أغسطس، وآخر حفلة هـ تكون للفنانة الهندية
الإنجليزية «سوشيلا رامان» اللي بـ تجيد العزف على عدد كبير من الآلات.
دار الأوبرا المصرية بـ تتعاون مع سفارات كثيرة في القاهرة
علشان تقدم للناس مجموعة فريدة من ليالي الموسيقي في رمضان. السفارة الأندونيسية
هـ تقدم أول ليلة موسيقية يوم 10 أغسطس وبعدها أوزباكستان يوم 12 أغسطس، الليلة
السودانية في 13 أغسطس، الجزائرية في 14 أغسطس، الليلة الفلسطينية يوم 20 أغسطس، والعراقية
في 21 أغسطس. كل ليلة هـ يحتفلوا برمضان بعروض عربية وإسلامية على المسرح المكشوف.
خلال العام الثاني لمهرجان الفوانيس وزارة الثقافة بـ ترعى
حفلات رمضانية في المراكز الثقافية: ساقية الصاوي، ومكان، والغوري، وخلال الشهر هـ
نتفرج على وجوه معروفة وبعض المواهب الجديدة. صحيح هم مش بـ يحبوا المسارح
في القاهرة ولا غاويين ظهور، بس «الشيخ جمعة البنا وفرقته» هـ يقدموا موهبتهم في «مكان»
وهـ يقوموا بـ تقديم الأغاني الصوفية والذكر في تجربة رمضانية تقليدية. وفرقة
مواويل متخصصين في الأغاني الشعبية والمواويل، شوف حفلتهم يوم 17 أغسطس في «مكان».
والمطربة السودانية آسيا هـ تكون ضيفة «مكان» في ظهور نادر لها هناك يوم 16 أغسطس.
محمد رشاد هـ يقدم السير الشعبية والغناء الصعيدي
والمواويل على الربابة والمزمار في «ساقية الصاوي» في أيام 16 و27 أغسطس. وكمان في
الساقية هـ يكون فيه عروض مختلفة زي التخت الشرقي وفرق الوتريات بمصاحبة القانون
والعود والناي في أيام 13 و28 أغسطس.
«فرقة الغوري لرقصات التنورة» بـ تضم مجموعة من أفضل راقصي
التنورة في مصر، وجدولهم هـ يبقى زحمة جدًا الأسبوع ده، وهـ يبهروا المتفرجين بما
لا يقل عن 10 عروض منفصلة خلال رمضان في وكالة الغوري، وكمان هـ يشاركوا في مهرجان
فوانيس. ممكن تتابع جدول عروض مهرجان فوانيس من خلال أجندة موقعنا.
الموقع التاريخي لوكالة الغوري مبهر على طول الخط، ورمضان
ده ممكن تتابع «مهرجان الموسيقى الصوفية» هناك، هـ يبدأ فعالياته يوم 15 أغسطس،
وهـ يستمر لمدة 11 يوم، ومن ضيوفه الفنانة الهندية شانشال بهارتي بصحبة فرقتها
المكونة من 8 عازفين المشهورة بأداء غناء القوالب الصوفي المنتشر في جنوب شرق آسيا
وإيران، والعرض إخراج انتصار عبد الفتاح.
أما درب 17 18 هـ يستضيف مهرجان أفلام رمضان، وهـ يعرض
مجموعة متنوعة من الأفلام، زي فيلم وثائقي اسمه Lost in La Mancha يوم 10 أغسطس وفيلم رعب نمساوي اسمه Funny
Games. ومن
مجموعة الأفلام اللي هـ تُعرض فيلم Following في 17 أغسطس، وفيلم Boy في 22 أغسطس، وفيلم Wall في يوم 24 أغسطس.
في تغيير سريع، فنان الخط العربي «خضير» عامل معرض بطابع
رمضاني هـ يبدأ في جاليري بيكاسو في الزمالك يوم 12 أغسطس. المعرض هـ يستمر حتى 1
سبتمبر في جاليري بيكاسو، مفتوح كل يوم ماعدا يوم الأحد. فيه معرض فني ثاني خلال
رمضان اسمه «ماسبيرو» في درب 17 18، و«المعاصرون» في تاش جاليري، وفيه معرض «إلى مصر
مع حبي»
في جاليري سفرخان و“رؤي معاصرة IV” في جاليري
المسار.
إحنا عارفين أن رمضان بـ يبقى فيه أوقات دوشة شوية خاصة
لما بـ نبقى مع أهالينا وقت الأفطار. لو
عايز حجة علشان تخرج من البيت في الوقت ده وفي نفس الوقت مش عايز تروح حاجة لها
علاقة برمضان، فيه حاجات ثانية مش متعلقة برمضان ممكن تعملها، “زيزي عادل”
نجمة ستار أكاديمي هـ تعمل حفلة في ساقية الصاوي يوم 9 أغسطس. وبعدها بثلاثة ليال
الفنانة متعددة المواهب المغنية ومؤلفة الأغاني والممثلة “مريم صلاح” هـ
تعمل حفلة في مسرح الجنينة يوم 12 أغسطس، والفنان المصري المشهور “أكمل”
هـ يعمل حفلة في ساقية الصاوي يوم 15 أغسطس.
كايروكي هـ يبقوا في مسرح ساقية الصاوي، وكمان محبي فرقة سلالم
هـ يتبسطوا جدًا أول ما يعرفوا أنهم هـ يعملوا حفلة يوم السبت 13 أغسطس.
يوم 17 أغسطس بقى يوم كبير، ممكن تروح وتستمتع في الأوبرا
بحفل جاز لفتحي سلامة الفنان الحاصل على جائزة جرامي في المسرح المفتوح، أو ممكن
تروح حفلة لفرقة مصرية بـ تقدم الغناء المعاصر زي فرقة ملاليم اللي بـ يقدموا مزيكا
شرقية وجاز وفانك ولاتين وروك في ساقية الصاوي. وممكن كمان تروح حفلة إفتكاسات وتسمع
موسيقى جاز، روك ولاتين. لو ده مش كفاية.. ساقية الصاوي هـ يبقى فيها فرقة وسط
البلد يوم 19 أغسطس.
لو بـ تدور على طريقة ثانية تهضم بها أكل الفطار ما بين
يوم 25 لـ 27 أغسطس، هات 9 أشخاص معاك وادخل بطولة كرة القدم في الجامعة الكندية. المنافسة
بـ تتقسم إلى ثلاثة أنواع لعب: كرة القدم، بيبي فوت وكرة القدم على البلاي ستيشن.
ممكن تجرب كمان تلعب بلاي ستيشن في أركيميديا، وهناك هـ
يتعمل دورات وهـ تبدأ في 15 أغسطس. الفائزين من مصر هـ يلعبوا مع الفائزين في دبي أونلاين
والجوائز كبيرة. المباريات هـ تبدأ في 13 أغسطس في المعادي وفي ديزاينوبوليس في
طريق مصر إسكندرية الصحراوي.
دائمًا راجع أجندتنا واعرف الحاجات اللي ممكن تعملها من
خلالنا… ورمضان كريم!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
