The Definitive Guide to Living in the Capital , Cairo , Egypt

“دي – كاف”.. كل اللي محتاج تعرفه عن مهرجان وسط البلد للفنون المعاصرة
    بواسطة
    Omar Abd-elmaqsoud

    بدأت في القاهرة دورة جديدة للحدث الفني اللي بيجمع فرق فنية متميزة بتقدم فن الشارع، مهرجان وسط البلد للفنون المعاصرة (دي- كاف) في دورته الثامنة بدأ أنشطته.

    مهرجان (دي – كاف) بيقدم كل سنة وجبة دسمة من العروض الموسيقية والسينمائية والمسرحية اللي بتشكل مكس بين الفن الحديث والطراز المعماري القديم للقاهرة.

    الدورة دي هيشارك في المهرجان حوالي 30 فرقة من 12 دولة، على مدار 3 أسابيع تقريبًا، هيتقدم فيهم 41 فاعلية في 12 مساحة فنية ما بين صالات مفتوحة أومغطاة.

    العرض الدنماركي “تراب” اللي هيتقدم على مسرح الفلكي 29 و30 مارس هيكون العرض الافتتاحي لأنشطة المهرجان واللي هيكون مزيج بين الغناء الأوبرالي والمسرح وفن العرائس المتحركة.

    الحفلة الموسيقية “أم العجايب” لعازفة الفلوت السورية-الفرنسية “نيسم جلال” مع مجموعة من الموسيقيين المصريين، هيكون هوه حفلة ختام المهرجان في 21 ابريل.

    القائم على تنظيم المهرجان في دورته الجديدة السنة دي مجموعة من الشركات الخاصة والمتخصصة في المجال ده، تحت إشراف وزارة الثقافة وبالتنسيق مع محافظة القاهرة.

    عرفنا كمان إن في عروض مميزة ومختلفة عن عروض كل سنة، منها عروض بصرية وعروض تفاعلية هيقدمها المهرجان السنة دي على واجهة المبنى الأثري لبنك قناة السويس في شارع الشريفين، واللي هيعمل مزج ظريف بين التكنولوجيا الحديثة والفنون السمعية-البصرية.

    كمان اهتمام المهرجان في دورته الجديدة بذوي الاحتياجات الخاصة هو الأول من نوعه، وده هيكون بتقديم العرض الراقص “أفق” وهو تصميم وأداء مصري من الألف للياء، ورسالته الأساسية اللي هتتقدم من خلال راقصين من متحدي الإعاقة هي التوعية بقبول واحترام الآخر وخلق مساحات مشتركة من التضامن.

    وفي الجزء المخصص للسينما، وتحديدًا يوم 9 إبريل هيكون في عرض للفيلم المصري الفائز في مهرجان كان السينمائي الدولي “يوم الدين” بحضور المخرج “أبو بكر شوقي” واللي هيقدم ضمن فاعليات المهرجان ورشة تدريب على مبادئ الكتابة والإخراج وبالتعاون مع  زوجته المنتجة “دينا إمام” اللي هتقدم كمان ورشة تدريب عن الإنتاج الإبداعي.

    المهرجان في دورته الثامنة هيكمل ويحي مبادرة “الفن للجميع” اللي كان بدأها في 2017 واللي قائمة على منح الفرصة لفئات معينة من عشاق الفن زي الأيتام وأطفال الشوارع واللاجئين واللي ظروفهم كانت بتمنعهم من حضور عروض فنية من خلال تقديم تذاكر مجانية ليهم للحضور والتعرف على الفنون المعاصرة والمختلفة اللي بيقدمها المهرجان.

    مقترح