The Definitive Guide to Living in the Capital , Cairo , Egypt

في الأيام الأخيرة جاء لنا عدد كبير من الرسائل والتعليقات على موضوعات نشرناها في كايرو 360 وفيها ناس بـ تسأل عن مراكز تعليم خاصة للأنشطة المختلفة، أكثرها طبعًا عن الموسيقى وتعليم العزف على الآلات المختلفة، وعلشان كده بدأنا ننشر دليل مستقل لكل آلة وإزاي وفين ممكن تتعلمها زي الجيتار والآلات الإيقاعية. ورشحنا من خلال المقالات دي مكان متخصص في تقديم ورش تعليم بعض الآلات الموسيقية وهو مركز “ذا وركشوبس – The Workshops” اللي عرفنا بعد كده أنه مش مجرد مركز لتعليم الموسيقى لكن هو أقرب لمركز ثقافي متكامل متخصص في تنظيم ورش عمل في مجالات مختلفة وبـ يهدف لإكساب المشاركين مهارات من خلال الممارسة الفعلية والمشاركة، وهو المفهوم الحقيقي للورشة المختلف بالطبع عن فكرة الدورات التدريبية أو الكورسات. ففي الورشة بـ يكون مطلوب منك تسليم مشروع معين في نهاية مدة التدريب أو المشاركة في عرض فني ما يكون نتاج لفترة العمل في الورشة، وأحيانًا الورش بـ تكون وسيلة لاكتشاف وصقل المواهب في كل المجالات، وبـ تتحول بعض مشاريع نهاية الورشة إلى أعمال فنية حقيقية زي ما بـ يحصل في ورش تعليم السيناريو أو بـ يتم طرحها على الجمهور بشكل تجاري زي ورش تعليم الرسم وصناعة الحلي على سبيل المثال.

تم التواصل مع فريق عمل “ذا وركشوبس” من خلال صفحتهم على الفيسبوك ثم من خلال التليفون وعرفنا أن لهم مقر في المعادي، بالتحديد عقار رقم 6 في شارع رقم 4 القريب من ميدان النهضة. علشان تتفادى التوهان اللي لا مفر منه في شوارع المعادي قرب من ميدان النهضة أومحطة مترو المعادي واسأل على مسجد الفاروق ونادي نقابة المعلمين ومن هناك اسأل على شارع 4 الهادئ جدًا وهـ تلاقي عمارة ملحق بها حديقة خارجية ومكتوب على السور بتاعها The Workshop باللون الأبيض.

صاحبة الفكرة ومؤسسة الورشة هي مدام رشا أبو السعود ابنة الموسيقار الراحل حسن أبو السعود، افتتحت الورشة في أكتوبر 2012 ومعاها عدد من الشركاء وفريق عمل من الشباب المتحمسين جدًا اللي بـ يشتغلوا 6 أيام في الأسبوع وأحيانًا بدون أجازات، وكان سهل أننا نلاحظ خلال زيارتنا الجهد المبذول في كل تفاصيل المكان وأعماله الإدارية وتنسيق البرامج والأحداث الثقافية، وحسينا أن المكان لا ينقصه إلا الدعاية الكافية لتعريف الناس بأنشطته وبرامجه المتنوعة، وده اللي قولناه للشباب هناك بصراحة وقررنا من خلال الموضوع ده أننا نساعد شوية في تعريف قراء كايرو 360 بساحة “ذا وركشوبس” الثقافية اللي بـ نتوقع أنها تبقى منافس قوي لباقي المراكز الثقافية والتعليمية في القاهرة.

التقينا سارة فوزي وياسمين نبيل من إدارة المكان وعرفنا تفاصيل أكثر عن طبيعة الورش المقدمة ومين القائم عليها. هنا فيه ورش عمل تقريبًا لكل حاجة تخطر على بالك؛ آلات موسيقية زي الجيتار والكمان والبيانو، صولفيج “غناء بالنوتة الموسيقية”، خط عربي، كتابة إبداعية وسيناريو، فوتوغرافيا للكبار وللأطفال، رسم وفنون تشكيلية، موزاييك، وتفصيل ملابس “باترونات”، كروشيه، رسم للأطفال، موارد بشرية، لغة إنجليزية وغيرها. وبالإضافة للورش فيه أنشطة أخرى زي دورات Marriage of your dreams للسيدات لتعليم كيفية إدارة الحياة الزوجية بشكل مثالي، وفيه ندوات وحفلات توقيع كتب وعروض فنية بسيطة زي الستاند آب كوميدي أو عروض العزف المنفرد والغناء، وكل يوم خميس بـ يكون فيه Movie Night ويوم الجمعة بـ يكون يوم مفتوح للأنشطة المختلفة والمعارض وبـ يبقى فيه فقرات فنية وأمسيات أدبية.

مكتبة ذا وركشوبس بـ تبيع كتب من أهم دور النشر في العالم العربي، هـ تلاقي فيها الإصدارات الحديثة كلها، وممكن تقعد في المساحة المفتوحة المخصصة للقراءة “مكتبة استعارة” وتطلب قهوتك “فيه منيو للمشروبات” وتستمتع بساعات من القراءة الهادئة. وممكن تحجز أحدى الغرف المجهزة بشاشات LED لعمل الاجتماعات أو إعطاء المحاضرات أو الحصص التعليمية.

بالنسبة للأسعار ومواعيد الورش فده بـ يختلف حسب نوع الورشة والقائمين عليها، هـ نقول لكم بعض أمثلة من الورش اللي اتعملت بالفعل: ورشة الخط العربي بـ تكون لمدة 3 أسابيع وبـ تتكرر بشكل دوري، مرتين في الأسبوع أيام الأحد والأربعاء من الساعة 6 لـ 9 مساءً وقيمة الاشتراك 300 جنيه. ورشة لآلة الفيولين والفيولا “الكمان” بـ يحاضر فيها بلال محسن عازف الكمان بأوركسترا القاهرة السيمفوني، ودي بـ تبقى أقرب لحصص التعليم الخاصة لأنه بـ يفضل أن الجلسة تكون مع فرد واحد فقط لمدة ساعة ونصف مرة واحدة في الأسبوع ولمدة شهرين وقيمة الاشتراك 1600 جنيه.

ورشة الكتابة الإبداعية Creative Writing بـ تقدمها الدكتورة إيمان الدواخلي وهي محررة أدبية ومصححة لغوية وتعمل ضمن جماعة التكية الأدبية، اللي لها مطبوع دوري وبـ يتم نشر الأعمال نتاج الورشة في المطبوع ده بعد نهاية فترة التدريب. الورشة بـ تستمر 6 أسابيع كل يوم جمعة الساعة 5 مساءً لمدة 6 أسابيع وقيمة الاشتراك 480 جنيه.  

ورشة تصوير فوتوغرافي مع المصور يوري فريد بـ تكون لمدة 4 أسابيع، أيام الأحد والخميس من الساعة 6 لـ 8 مساءً وقيمة الاشتراك 900 جنيه. وورشة تعليم التصوير للأطفال بـ تقدمها شيماء صالح لمدة أسبوعين بمبلغ 650 جنيه.

عادة علشان تنطلق الورشة لازم العدد ما يقلش عن 3 أفراد ومش بـ يزيد عن 5 أفراد، وأحيانًا بـ يبقى فيه استثناءات حسب رغبة المحاضر نفسه أو حسب طبيعة الورشة. الحجز في أي ورشة لازم يكون قبلها بوقت كافي؛ أيام أو أسابيع، بـ تسجل بياناتك بالتليفون وتروح للمقر وتدفع مبلغ مقدم حجز أو قيمة الورشة كلها.  

“ذا وركشوبس” باختصار المكان اللي فيه ورش عمل لكل حاجة طوال أيام السنة، أنت مش محتاج تستنى أي مكان لحد ما يقرر يعمل ورشة في أي نشاط، هنا أنت ممكن تطلب نوع الورشة وهم يعملوا على تحضيرها وتقديمها بالشكل المثالي في فترة زمنية قليلة، وهـ تلاقي حد من خدمة العملاء بـ يكلمك وبـ يؤكد عليك الميعاد وقيمة الاشتراك.

زوروا المكان وخذوا فكرة أشمل عن طبيعته وأنشطته، الزيارة ورؤية العين أكيد بـ تختلف عن السمع أو القراءة. المكان ساحة تثقيفية جديدة على خريطة العاصمة، نتمنى أن يكون ملء السمع والأبصار قريب في الأوساط الثقافية القاهرية.

 

التليفون:

02-23582150

01004777809

العنوان: عمارة 6، شارع 4 المتفرع من شارع 82، الدور الأرضي، المعادي.