The Definitive Guide to Living in the Capital , Cairo , Egypt

ركن ثقافي: دورية ثقافية جديدة في كل شوارع مصر

ركن ثقافي: دورية ثقافية جديدة في كل شوارع مصر

على مساحة خضراء من الجناين في أي منطقة في قلب القاهرة انتظر «ركن ثقافي»..
نشاط بـ يتعمل يوم الجمعة كل شهر في مكان مختلف، في ميعاد بـ يتحدد قبلها بوقت
مناسب على صفحتهم على الفيسبوك، الفكرة شبيهة بمعرض الكتاب مع حبة فروق وبـ تبقى
ليوم واحد.

ركن ثقافي تجربة هائلة لمجموعة من الشباب الواعي قرر يعمل حاجة مفيدة بشكل
جذاب وغير نمطي هدفها نشر القراءة والمعرفة بأنواع ولأعمار مختلفة.

المكان وقت ما رحنا كان فى مساكن شيراتون في الجنينة بجانب مسجد أبو بكر
الصديق، الموضوع هناك متقسم لـ4 “أركان” رئيسية.

أول ركن هو ركن المعرفةKnowledge Corner  وده مختص بالقراءة ومن خلاله بـ تشارك مكتبات ودور
نشر مختلفة ببيع الكتب زي دار الشروق وديوان وألِف ودار البلسم وغيرهم، كل دار نشر
لها مساحة مخصصة لعرض وبيع الكتب، ومن الجميل أن مكتبات سور الأزبكية كانت مشاركة
فى الحدث بعرض كتب منها المستعمل وبأسعار بسيطة جدًا، ودي حاجة عارفها أي حد متعود
يزور سور الأزبكية فى معرض الكتاب أو حتى يروحه فى مكانه الأصلي فى العتبة جنب
محطة مترو الأنفاق.

وطبعاً مش لازم ننسي نقول أن ممكن أي حد يتبرع بكتب لو مش محتاجها للركن.

ثاني ركن؛ ركن الأطفال Kids Corner وده كان من خلال حلقات تجمع فيها
الأطفال للرسم والتلوين واللعب بالصلصال وده كان تحت رعاية مشاركين زي «مكتبات
سمير وعلي» و«مركز اندما
چ» المتخصص فى نشاطات ترفيهية ومفيدة للأطفال.
وكمان مشاركة «بهجة العقول» وده عمل ركن خاص لألعاب الذكاء المحيرة بتاعته زي
الميكانو وما شابه وكان ممكن لأي حد من الحاضرين يشارك ويلعب حتى لو كبير مش بس
أطفال.

الركن الثالث هو ركن
الفنون
Arts
Corner
 وده كان زي الموسيقى فى خلفية المكان وكانت من
باند بـ يقدم مزيكا لايف، بـ يلعب قطع موسيقية خفيفة ملائمة جداً لموود المكان لأنه
كان فعلاً عايز موسيقى هادية أو حتى اشتغلت فى الـ
D.J  فى أوقات، يمكن بس كان غير موفق لما واحد من
العازفين مزيكا قرر يغني لأن الصوت كان عالى و ده كان غير ملائم قوي للمكان.

رابع ركن كان ركن المناقشاتDiscussions Corner  وده من خلاله بـ يتم مناقشة كتاب معين بين قراؤه
وأي حد يحب يشارك طبعًا، يومها كان مناقشة «كتاب مالوش اسم» لأحمد العسيلي وكان
المفروض العسيلي يكون موجود لكنه اعتذر، رغم كده المناقشة اتعملت عادي وكانت ظريفة
جدا بين مجموعة لطيفة وأكيد مختلفة عن الشكل الممكن يكون فى ذهن الواحد من الأفلام
عن ندوات مناقشة الكتب المعقدة لمثقفين وسط البلد!

بخلاف الأربعة أركان الثابتين دائمًا تنوعت المشاركات فى «ركن ثقافي» بين
حملات توعية زي حملة “بص فى ورقتك” ودي بـ تناهض الغش فى الامتحانات
ومنظمة «إيد واحدة» الخيرية ومنظمة «نوايا»، كمان على الجانب الفني كان فيه
معروضات للبيع زي إكسسوار وتي شيرتات مكتوب عليها بالعربي ورسم كاريكاتير في الحال
وده كان تبع مكتبات سمير وعلي المشاركة فى الركن، وصور فوتوغرافيا للمصورة بسمة عاشور
لمساجد مطبوعة على براويز، وحتى بعض مشاركين متخصصين فى تصميم الروبوت.

الجهات المشاركة فى الركن الثقافي متغيرة لكن الفكرة والهدف منها واحد، وهو
“اقرأ لأن حياة واحدة لا تكفيني” و ده الشعار المكتوب على التي شيرتات
الخاصة بالمنظمين.

لو حابب تقضي يوم الجمعة في حاجة مفيدة وفي نفس الوقت ممتعة جرّب تروح ركن
ثقافي في ميعاده، خصوصًا أنه ملائم لجميع الأعمار.

ومن أظرف الحاجات في المكان وجود بانر Banner كبير على الأرض وأقلام ماركر لأي حد عايز يرسم أو يكتب أي حاجة،
القائمين على المشروع هناك بـ يساعدوك في كل حاجة حتى ركنة العربية، وتنوع
المجالات هناك يرضي كل الأذواق.

لينك الصفحة على الفيسبوك:

http://www.facebook.com/pages/Culture-Corner-%D8%B1%D9%83%D9%86-%D8%AB%D9%82%D8%A7%D9%81%D9%8A/207383459272669

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح