The Definitive Guide to Living in the Capital , Cairo , Egypt

رمضان 2022: قائمة الشُطار!
    بواسطة
    Cairo 360

    زمان لما كنا أطفال – بنتكلم عن مواليد الثمانينيات والتسعينيات- كانت برامج الأطفال -تحديدًا برنامج ماما نجوى بتاع (بقلظ) – بيعرض في نهاية الحلقة قائمة من الأسماء بتقولها ماما نجوى، للـ(شطار) اللي سمعوا كلام أهلهم وعملوا حاجات كويسة على مدار الأسبوع. وكل واحد من المشاهدين الأطفال كان بيجتهد علشان يطلع اسمه في القائمة… في كايرو 360 إحنا عندنا (قائمة الشُطار) اللي خرجوا من موسم 2022 بمكاسب ضخمة هتغير طريقهم الفني تمامًا.. تعالوا نتعرف عليها.

     

    ياسر جلال

    كل سنة كنا نضرب كف على كف، إزاي رامز جلال الأقل في الموهبة الفنية، هو اللي يحتل الترند رقم 1 في مصر والمنطقة العربية ببرنامج المسابقات الشهير بتاعه، بينما أخوه ياسر جلال مش بياخد نفس القدر من الاهتمام.. السنين اللي فاتت الموضوع ده تغير مع قيام ياسر ببطولة مسلسلات زي ظل الرئيس (2017) و الفتوة (2022) وغيرها. لكن قيامه ببطولة مسلسل الاختيار 3 في دور الفريق عبد الفتاح السيسي كان نقلة ضخمة في تاريخه الفني، مش بس بسبب قدرته على تجسيد شخصية صعبة ومحورية من حيث الشكل، لكن كمان علشان قدرته على تقديم (روح الشخصية) وانفعالاتها وطريقة تفكيرها. وتجسيد كل ده بنجاح على الشاشة.

     

    رحمة أحمد فرج

    مهمة صعبة جدًا واجهت رحمة أحمد، بديلة دنيا سمير غانم في مسلسل الكبير. خاصة أن دنيا ممثلة رائعة ومتمكنة وعملت صلة كويسة مع المشاهدين على مدار سنوات. لكن رحمة نجحت أنها تعمل جمهورها الخاص، بدون ما تقلل من شغل دنيا أو تهاجمها، ومشاهدها أصبحت (ترند) على تيك توك ويوتيوب وباقي المواقع. ونقدر نقول إنها عملت ثورة سلمية على الناس اللي كانت متحفزة لدورها في المسلسل. وكتبت لنفسها شهادة انطلاق في عالم الفن من أوسع أبوابه.

    ياسمين عبد العزيز

    ياسمين هي الإثبات الحي على أنك مش لازم تشارك بعمل درامي كامل علشان تخطف عيون وقلوب الناس. إعلان قصير من ياسمين عبد العزيز -مع كريم محمود عبد العزيز- كان كفيل أنه يلفت الأنظار لها ويفكرنا بوجهها البشوش وأدائها الجميل اللي خلى ألاف الناس على تيك توك تقلد إعلانها، حتى أن أحمد مكي أشار للإعلان في واحدة من حلقات مسلسل الكبير الجزء السادس.

     

    أمير عيد

    أمير عيد من المطربين اللي بيثيروا الجدل في كل مرة يعملوا فيها حاجة جديدة.. موهبته قوية لكن غيابه عن الساحة الفنية مش دايمًا بيكون لصالحه. لكن المرة دي أثار الجدل بسبب ظهوره في إعلان (حياة كريمة)، مش بس بسبب مواقفه السياسية اللي ممكن تكون مختلفة مع الاتجاه العام للإعلان، لكن كمان بسبب مظهره المختلف، وطريقة أداؤه اللي اختلفت عن أغانيه السابقة.

    أمير أمتص حالة الاختلاف معاه بشكل محترف، ردوده على السوشيال ميديا كانت موزونه وعاقلة، وده خلاه يرجع تاني يحتل الترند بعد غياب طويل. ويستحق يكون معانا في (قائمة الشطار).

     

    بالتأكيد فيه أسماء كتير تستحق تكون في القائمة دي، وهنسيبكم إنتم تكملوها وتعرفونا رأيكم.

    مقترح