The Definitive Guide to Living in the Capital , Cairo , Egypt

“كليوباترا”.. قصة باليه مصري هتقدمه دار الأوبرا
    بواسطة
    Omar Abd-elmaqsoud

    خلال الفترة من 15 أكتوبر ولمدة 4 ليالي هتستضيف دار الأوبرا المصرية سهرات الباليه المصري “كليوباترا” على خشبة المسرح الكبير، من الساعة 8 مساءً.. تعالوا بينا نتعرف أكتر على “باليه كليوباترا”:

    1- العرض هتستضيفه دار الأوبرا المصرية لأول مرة، ويعتبر أحدث إنتاجاتها الفنية، هتقدمه فرقة “باليه القاهرة”، بمصاحبة “أوركسترا أوبرا القاهرة”.

     

     

    2- قصة العرض مستلهمة من القصة التاريخية للملكة المصرية “كليوباترا” وزواجها من “ماركوس أنطونيو” اللي كان حاكم الامبراطورية الرومانية بالمشاركة مع “أوكتافيوس” بعد ما قتل يوليوس قيصر، وبعدها أعلن “أوكتافيوس” الحرب على “كليوبترا” و”ماركوس أنطونيو” وانتهت بانتصار “أوكتافيوس” في معركة “أكتيوم” البحرية الشهيرة واحتلال الرومان لمصر.

    3- المؤلف الموسيقي للعرض هو “محمد سعد باشا” أستاذ التأليف الموسيقي وقائد الأوركسترا في “كونسيرفاتوار” القاهرة التابع لأكاديمية الفنون المصرية، وهو هيكون قائد أوركسترا أوبرا القاهرة، في العرض.

     

    4- فرقة باليه أوبرا القاهرة اتأسست سنة 1966 وكانت تابعة للمعهد العالي للباليه، وكان أول عرض قدمته في نفس السنة اللي اتأسست فيها، وكان أول انطلاقة ليها خارج مصر سنة 1972، وسنة 1991 بقت الفرقة تابعة لدار الأوبرا المصرية.

    5- قدمت الفرقة في جولاتها مجموعة كبيرة من أشهر العروض الكلاسيكية العالمية، زي “روميو وجولييت” و”بحيرة البجع” و”كسارة البندق” و”دون كيشوت” و”هاملت” واكتسبت شهرة عالمية في مجموعة من أشهر بلاد العالم في فن البالية زي روسيا وألمانيا، وفرنسا وتونس.

    لو عاوزين تعرفوا أسعار التذاكر وتحجزوا.. ممكن تدخلوا على اللينك ده.

    مقترح