The Definitive Guide to Living in the Capital , Cairo , Egypt

فن وثقافة

لعشاق الباليه.. تفاصيل 4 حفلات هيستضيفهم المسرح الكبير بأوبرا القاهرة

المسرح الكبير حفلات باليه حفلات دار الأوبرا فرقة باليه أوبرا القاهرة
لعشاق الباليه.. تفاصيل 4 حفلات هيستضيفهم المسرح الكبير بأوبرا القاهرة
    بواسطة
    Mohamed Talaat

    الباليه واحد من أجمل الفنون وأكثرها رقة وبساطة وشياكة وإبداع، ولو كنتم من عشاق الفن ده، عندكم فرصة تحضروا 4 حفلات باليه مميزة جدًا هتقدمهم فرقة باليه أوبرا القاهرة تحت إشراف مديرها الفني أرمينيا كامل.. في الموضوع ده هنقدم لكم تفاصيل الحفلات دي.

    الحفلات هتكون لباليه كارمن وتانجو، بمصاحبة أوركسترا أوبرا القاهرة بقيادة المايسترو ناير ناجي، وهتكون لمدة 4 ليالي متتالية هتبدأ الساعة 8 مساءً يوم الإثنين، وهتفضل مستمرة أيام الثلاثاء، والأربعاء، والخميس، يعني أيام 9، 10، 11، 12 مايو الساعة 8 مساءً على المسرح الكبير.

    باليه كارمن أبدع موسيقاه الفرنسي جورج بيزيه وبتدور أحداثه في مدينة أشبيلية سنة 1830 وبيدور عن البنت الغجرية المتعالية كارمن اللي بتسعى لإيقاع الرجال بيها وبتتودد للعريف خوسيه نافارو اللي بيعشقها وبسبب حبه ليها بيتحول من شرطي بسيط مطيع إلى مجرم خارج على القانون بعد ما بتضمه لمجموعة من المهربين، وفي النهاية بيقوده حبه الجارف إلى ساحة الإعدام.

    أما باليه تانجو فأبدع موسيقاه كل من أستور بياتسولا وليروي أندرسون، وبيضم مجموعة من المشاهد اللي بتجمع الباليه الكلاسيكي والحديث مع رقصات التانجو المستلهمة من طبيعة وتاريخ العاصمة الأرجنتينية بيونيس إيرس الساحرة واللي بتشكل مزيج فني مبهر.

    معلومات عن فرقة باليه أوبرا القاهرة

    فرقة بالية أوبرا القاهرة تأسست سنة 1966 وكانت تابعة للمعهد العالي للباليه وقدمت أول عروضها في نفس السنة، وبدأت رحلات فنية خارج مصر من سنة 1972 لفت فيها كتير من دول العالم منها روسيا، بلغاريا، يوغوسلافيا، ألمانيا، فرنسا وتونس.

    أصبحت واحدة من الفرق التابعة لدار الأوبرا سنة 1991 وقدمت مجموعة من أشهر العروض الكلاسيكية العالمية زي روميو وجولييت، بحيرة البجع، كسارة البندق، جيزيل، دون كيشوت، طقوس الربيع، هاملت، لوركيانا، كارمينا بورانا، بوليرو، سندريلا.

    مقترح