The Definitive Guide to Living in the Capital , Cairo , Egypt

الصور: صفحة عمر خيرت على فيسبوك

القاهرة بتستعد لواحدة من أجمل لياليها يوم 7 أكتوبر الجاي، لما الموسيقار الكبير عمر خيرت يحيي حفل موسيقي في قصر عابدين، القصر اللي بيعتبر أيقونة من أيقونات التاريخ المصري.

جمهور عمر خيرت متعود دايمًا على حفلات مميزة، بس الليلة دي هتكون مختلفة.. موسيقى بتخطف القلب وسط جدران قصر شاهد على تاريخ مصر الحديث.

خيرت هيقدم مجموعة من أشهر مقطوعاته اللي حبها الجمهور واتعلق بيها زي ليلة القبض على فاطمة، في هويد الليل، زي الهوا، تيمة حب، وجه القمر، الخواجة عبد القادر وغيرهم من الأعمال اللي بتجمع بين الكلاسيكية والروح المصرية الأصيلة.

أسعار التذاكر:

الشركة المنظمة أعلنت عن 5 فئات للتذاكر:

الفئة الأولى: 5500 جنيه.

الفئة التانية: 4500 جنيه.

الفئة التالتة: 3500 جنيه.

الفئة الرابعة: 2500 جنيه.

الفئة الخامسة: 1500 جنيه.

ما يفوتكش كمان: كإنك ملك.. رحلة لمتاحف قصر عابدين العظيمة

ليلة في القصر

قصر عابدين واحد من أهم القصور التاريخية في القاهرة، بناه الخديوي إسماعيل سنة 1863 واتسمى باسم عابدين بك اللي كان مالك الأرض قبلها. القصر يعتبر تحفة معمارية بالطراز الأوروبي الكلاسيكي، وبيضم صالونات وقاعات فخمة، مكتبة فيها آلاف الكتب، ومتاحف داخلية زي متحف الأسلحة ومتحف الهدايا. من لحظة ما اتبنى وهو شاهد على أهم أحداث السياسة والحكم في مصر.

عن عمر خيرت:

الموسيقار عمر خيرت من مواليد القاهرة سنة 1948، بدأ مشواره في معهد الكونسرفتوار ودرس تأليف موسيقي في لندن. اشتهر بأسلوبه اللي بيخلط بين الموسيقى الكلاسيكية الغربية والروح الشرقية المصرية. أعماله التصويرية للأفلام والمسلسلات لاقت نجاح كبير زي الخواجة عبد القادر، ليلة القبض على فاطمة، البخيل وأنا، غير حفلاته اللي بتجمع آلاف من عشاق الموسيقى. خيرت النهارده يعتبر أيقونة موسيقية مصرية وعربية.