The Definitive Guide to Living in the Capital , Cairo , Egypt

فن وثقافة -
مقترح

“مطبعة بولاق”.. رحلة للتعرف على أقدم وأهم ماكينات الطباعة في مصر

تاريخ الطباعة في مصر متاحف مصر متاحف مكتبة الإسكندرية متحف مطبعة بولاق مكتبة الإسكندرية
“مطبعة بولاق”.. رحلة للتعرف على أقدم وأهم ماكينات الطباعة في مصر
    بواسطة
    Mohamed Talaat

    مصدر الصور: اليوم السابع

    هل سألت نفسك قبل كدة ماكينات الطباعة اللي كانت بتستخدم في مصر زمان راحت فين؟ خلونا نعرفكم أكتر على “مطبعة بولاق”، وده اسم أهم متحف في مصر بيحكي تاريخ الطباعة في المحروسة، وهناك هتلاقوا أهم وأقدم ماكينات الطباعة في مصر، الماكينات اللي استخدمت في طباعة أول صحف ووثائق ظهرت في بلدنا.

    متحف “مطبعة بولاق” موجود في مكتبة الإسكندرية، وبحسب تصريحات حديثة نقلها موقع اليوم السابع عن الدكتور أحمد منصور، مدير مركز دراسات الخطوط بقطاع البحث الأكاديمي بمكتبة الاسكندرية، فالمتحف بيعتبر أهم وأول متحف لتاريخ الطباعة في مصر، وبيحتوي على ماكينات الطباعة القديمة الخاصة بمطبعة بولاق، اللي تأسست سنة 1820م.

    لما تقرر تزور متحف “مطبعة بولاق” هتحس إنك سافرت بالزمن لمصري زمان، وهتشوف بعينك أقدم ماكينات الطباعة في مصر، وهتتعرف على تاريخ الطباعة في بلدنا بطريقة شيقة.

    بيضم المتحف “ماكينة جولدينج”، اللي بتعتبر أقدم ماكينة فى مصر وهي بتشتغل بالطريقة اليدوية، والماكينة دي تم استخدامها فى فترة مبكرة جدًا من تاريخ مطبعة بولاق.

    في المتحف كمان هتشوف ماكينة الطباعة الحجرية، وهي آلة طباعة حجرية بتشتغل عن طريق تصميم النص على قالب من الحجر الناعم بيتم حفر النص عليه، وبعدها بتتم عملية التحبير والطباعة.

    المتحف فيه كمان “الخزانة الحديدية المصفحة” اللي بترجع لعصر تأسيس المطبعة من أكثر من 200 سنة، والخزانة بيتم فتحها بـ3 مفاتيح، وكان بيتخزن فيها أختام “محمد علي”.

    هتشوف في المتحف النص التأسيسي لمطبعة بولاق في عهد محمد علي، ومكتوب باللغة التركية العثمانية.

    ده غير وحدة عرض بتضم العدد الأول من وقائع مصر، والعدد الأول من الجريدة الرسمية، وكنوز أكتر.

    مقترح