The Definitive Guide to Living in the Capital , Cairo , Egypt

مكتبة الإسكندرية القديمة:

بـ تبدأ قصة مكتبة الإسكندرية من زمان قوي من 2000 سنة تقريبًا… لما فكر الفيلسوف اليوناني “ديمتريوس الفاليري” لأول مرة في تأسيس مكتبة الإسكندرية القديمة للملك بطليموس الأول، أول ملوك البطالمة اللي ورثوا حكم مصر بعد موت الإسكندر الأكبر… بعدها أخذ بطليموس الأول قراره بتأسيس المكتبة سنة 288 ق. م… كانت بـ تحتوي على 700 ألف لفافة بردي واللي بـ تعادل 100 ألف كتاب، وكانت اللغة العبرية أول لغة تُرجمت في المكتبة.

كانت المكتبة القديمة بـ تتكون من جزئين: الجزء الأول هو المبنى الموجود قريب من الميناء واللي كان اسمه المكتبة الملكية، والجزء الثاني كان مكتبة الإسكندرية الصغرى الملحقة بمعبد السيرابيوم… كانت المكتبة الملكية جزء من المجمع العلمي اللي كان بـ يضم برضه الموسيون، أو معبد ربات العلوم والفنون اللي كان بـ يعتبر أكاديمية علمية ومركز علمي للأبحاث.

 

نهاية مكتبة الإسكندرية القديمة:

بدأت المكتبة في الانهيار سنة 48 ق. م. أثناء معركة الإسكندرية المشهورة بين الأسطول المصري بقيادة “بطليموس الثالث عشر” والأسطول الروماني بقيادة “يوليوس قيصر”… وفي سنة 391 م لما كان هناك الصراع العنيف بين الديانة المسيحية والوثنية اتهد معبد السيرابيوم بكل محتوياته وكمان المكتبة الصغرى… واختفيت المكتبة تمامًا سنة 400 م بسبب الحروب الكثيرة… وما كانش فاضل من المكتبة القديمة إلا بردية وحيدة واللي موجود نسخة طبق الأصل منها في متحف المخطوطات في المكتبة دلوقت، والأصل بتاعها موجود في المكتبة القومية في فيينا.

 

إحياء مكتبة الإسكندرية:

جاءت فكرة إحياء مكتبة الإسكندرية مرة ثانية سنة 1972 عن طريق أول نداء دولي من الدكتور مصطفى العبادي، أستاذ التاريخ اليوناني الروماني في كلية الآداب جامعة إسكندرية… وفي سنة 1989 نظمت الحكومة المصرية مع منظمة اليونسكو مسابقة معمارية لتصميم المكتبة فاز بها المهندس المصري “إيهاب الحباك”… وقعدوا يبنوا في المكتبة 6 سنين من 1995 لـ 2001… وفي 16 أكتوبر 2002 كان الافتتاح الرسمي للمكتبة.

 

مكتبة الإسكندرية الجديدة:

بـ تتكون المكتبة من ثلث مباني المبنى الرئيسي ومبنى قاعة المؤتمرات والقبة السماوية… لو بصينا على المبنى الرئيسي من بره هـ نلاقيه على شكل قرص شمس مش كامل بـ يشرق من البحر، واللي هو البحيرة الصناعية اللي أمام المكتبة… وفكرة التصميم بـ تؤكد على أن المكتبة هي مركز حضاري وثقافي للعالم كله…

تعالوا بقى نشوف المبنى من جوه، أول ما ندخل هـ نلاقي على أيدنا اليمين البوك شوب أو البازار الخاص بالمكتبة واللي فيه ممكن للسياح أو زوار المكتبة أنهم يلاقوا فيه إصدارات المكتبة أو أنتيكات فرعونية ممكن يأخذوها كهدايا تذكارية من مصر… ندخل بعد كده هـ نلاقي مثلث من الزجاج اسمه (كاليماخوس)، وكاليماخوس كان من أبرز كتاب الشعر السكندري واللي حط أول بيان منظم عن مقتنيات المكتبة القديمة، ومن المثلث ده نقدر نشوف قاعة الاطلاع اللي بـ تستوعب 2000 شخص، وبـ تتقسم لـ 4 أدوار تحت الأرض ودورين فوق الأرض، واللي تقدر تستوعب لغاية 5 مليون كتاب…

كل دور بـ يكون فيه كتب في تخصصات معينة؛ وده علشان يسهل على الباحثين والطلاب أنهم يلاقوا الكتب اللي هما عاوزنها بسرعة وسهولة عن طريق رقم استدعاء الكتاب، واللي يقدر أي حد يعرفه عن طريق أنه يدور عليه عن طريق أجهزة الكمبيوتر اللي موجودة جوه القاعة أو بمساعدة حد من الموظفين المسئولين… موجود كمان جوه قاعة الاطلاع غرف للبحث فيها أجهزة الكمبيوتر متوصلة بالإنترنت، وممكن للباحثين أنهم يحجزوها بكارنيه الاشتراك بتاعهم في المكتبة علشان يشتغلوا في الأبحاث بتاعتهم.

جوه المبنى الرئيسي هـ نلاقي برضه مجموعة من المعارض اللي ممكن لزوار المكتبة أنهم يشوفوها زي معرض تاريخ الطباعة، وإسكندرية عبر العصور، وشادي عبد السلام، والعالم الرقمي، والخط العربي وغيرهم… كمان فيه مجموعة من المتاحف زي متحف المخطوطات والكتب النادرة، ومتحف الآثار، ومتحف تاريخ العلوم، ومتحف الرئيس السادات… موجود كمان عدد من المكتبات المتخصصة زي مكتبة الفنون والوسائط المتعددة، ومكتبة طه حسين للمكفوفين، ومكتبة الطفل والنشء، ومكتبة الخرائط وغيرهم… جوه المكتبة موجود قاعة “البانوراما الحضارية” وهي أول 9 شاشات عرض تفاعلية في العالم بـ تعرض تاريخ وحضارة مصر، وكمان فيها عرض عن تاريخ وحياة الرئيس السادات… وكمان فيه قاعة “الفيستا” واللي ممكن للباحثين فيها أنهم يتعايشوا مع نماذج محاكاة ثلاثية الأبعاد للظواهر الطبيعية والصناعية.

كل ده كان الجزء الخاص بقاعة الاطلاع اللي ممكن للجمهور وزوار المكتبة أنه يدخلها… لكن فيه طبعًا جوه المبنى الرئيسي الجزء الإداري الخاص بالموظفين… فمكتبة الإسكندرية فيها عدد كبير من القطاعات والإدارات والأقسام والوحدات اللي بـ يشتغل فيها عدد ضخم من الموظفين واللي بـ يساعدوا في خروج خدمات المكتبة للجمهور… وهـ نلاقي عدد من المراكز البحثية اللي تبع المكتبة زي مركز الفنون، ومركز دراسات الكتابات والخطوط، ومركز المخطوطات، ومركز توثيق التراث الحضاري والطبيعي واللي موجود منه فرع في القرية الذكية في القاهرة، مراكز الدراسات القبطية والإسلامية والبيئية وغيرهم من المراكز المتخصصة.

لما نيجي ندخل المبنى الثاني من مكتبة الإسكندرية وهو مبنى قاعة المؤتمرات واللي افتتح سنة 1991… وده اللي بـ يتعمل فيه كل الفعاليات اللي بـ تنظمها المكتبة زي المؤتمرات والندوات والمحاضرات والحفلات الغنائية والمعارض، واللي معظمها بـ يكون مفتوح للجمهور العام أنه ممكن يحضرها.. وبـ يتكون المبنى ده من 12 قاعة: القاعة الكبري، وقاعة الأغراض المتعددة، والمسرح الصغير، وقاعة المعارض الشرقية، وقاعة المعارض الغربية، وقاعة الوفود، وقاعة المحاضرات.. وكمان قاعات صغيرة لكبار الزوار أو للاجتماعات الصغيرة.

بالنسبة بقى للقبة السماوية، ودي اللي بـ نشوفها من بره على شكل كرة، هـ نلاقي أن فكرة تصميمها أنها تكون على شكل كوكب الأرض اللي بـ يدور حول الشمس وهي مبنى المكتبة… والقبة من جوه عبارة عن سينما ثنائية الأبعاد بـ تستوعب 100 فرد، بـ تعرض أفلام علمية عن مثلاً الكواكب والمجرات والنيل وغيرها، كمان بـ تعرض أفلام علمية للأطفال… وتبع القبة السماوية هـ نلاقي قاعة الاستكشاف، وهي مكان مميز ممكن للشباب أنهم يعملوا التجارب العلمية الكيميائية والفيزيائية بنفسهم، والهدف من ده طبعًا نشر العلم والتكنولوجيا الحديثة بين الطلبة.

بعد ما بـ تخلص جولتنا جوه المكتبة بـ نطلع بره على “ساحة الحضارات” اللي بـ تربط كل مباني المكتبة ببعض واللي فيها شوية أعمال فنية زي تمثال “بروميثيوس” ماسك في أيده شعلة من النار، وتمثال ضخم لـ “بطلميوس الثاني”، وتمثال نصفي “للإسكندر الأكبر”… ومن هنا هـ نلاقي أن المكتبة قدرت أنها تربط بين تراث الماضي وتكنولوجيا الحاضر والمستقبل.

مواعيد الزيارات من الأحد إلى الخميس من الساعة 10 صباحًا إلى 4 عصرًا، رسم الدخول للمصريين: 5 جنيه، وللأطفال وأصحاب المعاشات 2 جنيه، وطلبة المدارس 1 جنيه، ولغير المصريين بـ 70 جنيه، بالنسبة للقبة السماوية العروض بـ تتغير كل فترة ممكن تعرفها من صفحة القبة، ولو عاوز تعرف معلومات أكثر عن المكتبة عامة زور موقعها على الإنترنت.