The Definitive Guide to Living in the Capital , Cairo , Egypt

فن وثقافة

مولد نبوي سعيد: دليلك لكل حفلات الإنشاد في القاهرة

مولد نبوي سعيد: دليلك لكل حفلات الإنشاد في القاهرة
    بواسطة
    Omar Mossad

    إحنا كمصريين مافيش حاجة بتعدي من تحت إيدينا غير لما نصبغها بالصبغة المصرية ونديها طابع ثقافتنا وأفكارنا ونحملها همومنا، كل حاجة هنا ينفع تتسمى باسمنا، ولو كانت مناسبة تاريخية أو حتى دينية!

    المولد النبوي الشريف أحد المناسبات اللي أجواءها في مصر مختلفة عن أي بلد تاني.. الحلاوة والعرايس وسهرات المديح وجلسات الذكر الجماعي اللي كلها واخدة ريحة وطعم البني آدم المصري في بساطته وخفته، واللي لسه ماسابش نفسه يعيش الأجواء دي حارم نفسه من جرعة انبساط مش طبيعية، واسألوا مجرب!

    الحلاوة والعرايس وعرفنا سكتهم، طب والاحتفالات؟ .. سيبوها علينا، هنقول لكم على مواعيد وأماكن حفلات كل فرق المديح والذكر في القاهرة، صلوا بينا على النبي.

    البداية هتكون اليوم، الخميس 8 ديسمبر، اللي هيشهد ليلة إنشاد من تقديم فرقة وصلة سماع للإنشاد الديني، الفرقة اللي بتضم أصوات شبابية مميزة جدًا هتبدأ حفلها في تمام السابعة مساءً على مسرح قاعة الحكمة بساقية الصاوي بسعر تذكرة حضور 25 جنيه، شوفوا بقية تفاصيل الفعالية من هنا.

    فرقة الحضرة من الفرق اللي بدأت بداية هادئة جدًا من سنتين تقريبًا، وبعدين انفجرت انفجار كبير ومُلفت على مستوى قوة اللي بيقدموه وعلى مستوى الانتشار كمان، يمكن لأنهم مش بيقدموا مجرد Show وإنما قدروا ينقلوا اللي بيحصل في الحضرات وجلسات الذكر لمختلف الطرق الصوفية في مصر ويطلعوا بيه على المسرح، وطبعًا حدث زي المولد ماينفعش يتفوت من غير سلسلة حفلات معتبرة ليهم في كل الأماكن اللي جمهورهم متعود يشوفهم فيها، أولى حفلاتهم هتكون في مركز الربع الثقافي في شارع المعز يوم الجمعة 9 ديسمبر في تمام السابعة مساءً بسعر تذكرة حضور 40 جنيه، بصوا على بقية تفاصيله من هنا.
    وتاني حفلاتهم هتكون يوم الجمعة اللي بعدها 16 ديسمبر في ساقية الصاوي بالاشتراك مع مجموعة “رباعي أوتار” التابع لأوركسترا القاهرة السيمفوني في حفل لتقديم مزج روح الغناء الصوفي المصري مع معزوفات التراث الموسيقي الكلاسيكي العالمي، الحفلة هتكون في تمام السابعة مساءً أيضًا على مسرح قاعة النهر، وسعر تذكرة حضورها 40 جنيه، اعرفوا أكتر عنها من هنا.

    واللي غاوي مديح على الطريقة الشامية يبقى لازم يروح ليلة فرقة “الرضوان” في مركز الربع الثقافي يوم الأحد 11 ديسمبر في تمام الخامسة مساءً، الحفل هو الأول في مركز الربع للفرقة السورية اللي بدأ نجمها يلمع بشدة في السنة الماضية بعد ما جال منشدها المميز الشيخ ياسين المرعشلي في أكتر من مركز ثقافي في مصر وأقام أكتر من ورشة لتعليم المقامات الشرقية والإنشاد والابتهال عليها، غير جولات المجموعة في مجالس مشايخ الأزهر الكبار، بالإضافة للحفلات والليالي على فترات متباعدة في المسارح والمراكز الفنية المختلفة، تفاصيل حفل الأحد تعرفوها من هنا، تذكرة حضوره 30 جنيه ومافيش حجز مسبق.

    أما أصحاب المزاج الميال للطرب فحفل الفنان علي الهلباوي في الساقية يوم الأحد 11 ديسمبر هو أنسب اختيار ليهم، علي الهلباوي نجل الشيخ المبتهل والمداح الكبير محمد الهلباوي رحمة الله عليه معود جمهوره على تقديم المديح والابتهال في صورة أكثر عصرية، مزيكا مختلفة وألحان حركية وكلمات خفيفة وصوت قوي ومرونة في الأداء، ده اللي خلى كل اللي يحضر له يحس باختلاف شديد في اللي بيتقدم رغم تشابه المواضيع أو اتفاقها أحيانًا، الحفل هيبدأ في تمام السابعة والنصف مساءً على مسرح قاعة النهر بالساقية، وسعر تذكرة حضوره 40 جنيه، اعرفوا تفاصيل أكتر عنه من هنا.

    وكل سنة وأنتم طيبين.

    مقترح