The Definitive Guide to Living in the Capital , Cairo , Egypt

فن وثقافة

“يوم في القاهرة”.. احتفالية خاصة جدًا في بيت السناري الأثري

أنشطة ثقافية في القاهرة بيت السناري سيرة القاهرة من دروبها العامرة
“يوم في القاهرة”.. احتفالية خاصة جدًا في بيت السناري الأثري
    بواسطة
    Mohamed Talaat

    الصورة لقبة بيت السناري، تصوير: أيمن رفعت

     

    لو كنت من عشاق العاصمة المصرية، يبقى أكيد هتحس بمتعة كبيرة لو توجهت النهارده الاثنين 26 سبتمبر، لبيت السناري الأثري بحي السيدة زينب. هناك هتقدر تحضر احتفالية خاصة جدًا بتنظمها مكتبة الإسكندرية بالتعاون مع مبادرة سيرة القاهرة. الاحتفالية تحت عنوان “يوم في القاهرة”.

    الاحتفالية اللي هتبدأ الساعة 7 مساءً هتتضمن برنامج ثري ومتنوع، على سبيل المثال هيتم عرض فيلم وثائقي تحت عنوان “من دروبها العامرة”، هيتناول تاريخ أحياء ودروب المدينة التاريخية.

    الاحتفالية هتشهد كمان تقديم عدد من الفقرات الفنية اللي بتتنوع ما بين الحكي والغناء والعزف والإلقاء الشعري.

     وهيقام على هامش الاحتفالية معرض فوتوغرافي للوحات الرسام الإسكتلندي Robert Hay اللي رسمها لمعالم القاهرة في منتصف القرن الـ19، وكمان صور فوتوغرافية معاصرة لنفس اللوحات للفنانة شيماء فكري.

    و”سيرة القاهرة” هي مبادرة معنيّة بتاريخ وتراث مدينة القاهرة، تأسست في ٢٦ سبتمبر 2020، وبتشتغل على التوعية بتراث المدينة من خلال أنشطة متعددة.

    وسبق للمبادرة تنظيم كتير من المحاضرات والندوات وورش العمل لشرح تاريخ القاهرة، كمان أطلقت برنامج وثائقيات تحت عنوان “من دروبها العامرة” بيتناول تاريخ أحياء ودروب القاهرة، بالإضافة لفعاليات “تمشية الأحد التراثية” للتجول في المدينة وتوثيق أحيائها ودروبها القديمة من خلال تصوير العناصر التراثية بشكل فوتوغرافي.

     

    عنوان بيت السناري: السيدة زينب، شارع الكومي.

    مقترح