The Definitive Guide to Living in the Capital , Cairo , Egypt

GZ Corner: كأنك في بيتك

GZ Corner: كأنك في بيتك
بواسطة
Mostafa Maher

إذا كنت بـ تبحث عن البساطة
والاستمتاع مع أصحابك وسط جو فني مختلف..
GZ Corner مكان مناسب جدًا علشان
تقضي فيه وقت مفيد ومريح، والمميز في المكان أنه في وسط البلد وعنوانه سهل وله أكثر
من طريقة للوصول له.

وأنت داخل ممر العمارة الموجود فيها GZ Corner
هـ تلاحظ الاهتمام بالجرافيتي من خلال رسومات مختلفة بعضها بـ تحمل اسم المكان، هـ
تعدي الممر وتطلع 6 سلالم تقريبًا علشان توصل للشقة الموجود فيها
GZ،
مجرد دخولك هـ تشعر أنك انفصلت عن العالم الخارجي وبـ تستعد للتأقلم مع عالم جديد
فيه ناس شبهك، عندهم اهتمامات ربما تكون شبه اهتماماتك أو تهمك.

خدمات كثير بـ يقدمها المكان، أهمها أنه
بـ يرعى الـ
Underground arts وبـ يساعد أي band أو Film
maker
أنه
ينتج
CD أو كليب لموسيقاه أو فيلمه، سواء بالتعاون من خلال تنفيذ المشروع
الفني عن طريق فريق محترف، أو تأجير الأدوات اللازمة اللي هـ يحتاجها الفنان في
إنجاز مشروعه، بالإضافة لإمكانية استضافة فرق موسيقية وعمل حفلات صغيرة، وندوات
وورش عمل داخل المكان.

الكُتب والمجلات القديمة تعتبر من
أساسيات الديكور، المجلات معظمها فنية وبعضها من 40 سنة وأكثر لكنها مش للبيع،
الكتب فيه منها العربي والأجنبي وبعضها للبيع، وممكن لأي كاتب من الشباب يعرض كتابه
الجديد هناك كنوع من التسويق.. كمان للمشغولات اليدوية والـ
T-shirts مكان في GZ
وهـ تلاقيها على الجدران في وسط الشقة لكن ممكن تكون أسعارها غالية شوية، لكنها معمولة
بمزاج.

كمان المميز في المكان أنك لو حبيت
تشرب شاي أو أيًا كان المشروب ما تستناش حد ييجي يقول لك: “تشرب إيه”،
قوم أنت بنفسك وروح المطبخ واعمل مشروبك، وما تنساش تنظف اللي شربت فيه بعد ما
تخلص!، وده أسلوب مش موجود في مكان ثاني، ويخليك تحس أنك قاعد في بيتك أو شقة واحد
صاحبك، بس ده ما يمنعش برضه أنك وأنت خارج هـ تحاسب على طلباتك! والأسعار قريبة من
أسعار قهاوي وسط البلد العادية.

الموسيقى موجودة دائمًا في الخلفية،
وممكن وأنت قاعد تلاقي
band دخل وبدأ يعمل بروفاته وسط المكان وتلاقي نفسك
قاعد وسط الفرقة وبـ تسمع مزيكتهم وأغنياتهم.. وأحيانًا بـ يكون فيه
events لعروض أفلام سواء قديمة أو جديدة وباربكيو.

القائمين على المكان شباب صغير قرر أنه
يعمل مكان يهتم بالفنانين المبتدئين والشباب اللي عاوز يشارك الناس باهتماماته
وعندهم خطط هـ تخليهم مكان مختلف مافيش زيه في العالم كله، وهم المتحملين كافة الشئون
المادية.

علشان توصل لـ  GZ Cornerممكن من ميدان طلعت حرب وتسأل على 61 تقاطع هدى شعراوي مع الفلكي،
وأقرب محطتين مترو هما “محمد نجيب” و”السادات”.. ومن علامات
المكان قهوة “الندوة الثقافية” و”كوك دور” وسط البلد. وممكن
تعرف معلومات أكثر من خلال الاتصال بهم على: 01003511634 أو 01229924600.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح