The Definitive Guide to Living in the Capital , Cairo , Egypt

في عالم سريع ما بيحبش الروقان، فيه ناس بتختار تمسك في التفاصيل، وتبني عالمها حتة حتة، بهدوء وصبر. عمر الصالحي واحد من الناس دي. فنان شاب قدر يحول الخشب الصامت لشخصيات بتضحك، تبص بدهشة، وتقف كإنها عايشة. في شغله، المصغرات مش مجرد ديكور، دي حكايات كاملة، متقفلة على نفسها، بس مفتوحة لأي عين بتحب تقف وتتأمل. في كايرو360 قابلنا عمر، اللي حكى لنا قصته وعشقه الكبير للشخب والألوان، ومن قلب الورشة.

أنا اسمي عمر الصالحي، أغلب الناس تعرفني باسم نم نم. عندي 29 سنة، ومتخرج من كلية الزراعة، حاجة بعيدة تمامًا عن اللي بعمله دلوقتي، بس يمكن ده جزء من الحكاية. الفن ما دخلش حياتي بخطة ولا بدراسة، دخل بالصدفة. كنت بقلب على الإنترنت وشفت شغل مصغرات لناس أجانب، وانبهرت بالفكرة. حسيت إني عايز أجرب، حتى لو بإمكانيات بسيطة جدًا.

بدأت أشتغل بأي خامات متاحة حواليا. مجسمات صغيرة، محاولات أولى، وأخطاء كتير. ما كانش فيه مدرس، وما كنتش في كورس. كله تعلم ذاتي، تجربة ورا تجربة. كنت بنزل اللي بعمله على فيسبوك للتسلية مش أكتر، لكن رد فعل أهلي وأصحابي فاجأني، وشجعني أكمل. حسيت إن اللي بعمله لمس حاجة عندهم.

مع الوقت، ومع الإصرار، الشغل بدأ يتحسن. سنتين ونص تقريبًا من التجربة المستمرة خلوني أدخل المجال بجد، وأعمل لنفسي اسم. المصغرات والنحت على الخشب فن عالمي. بحب أشتغل على التفاصيل، على التعابير، على الإحساس. بحب إن اللي يشوف الشغل يقرب، يتأمل، ويسأل نفسه: إزاي ده معمول؟ أحلى تعليق ممكن أسمعه إن حد يفتكر الشغل فوتوشوب. ساعتها بحس إني عملت اللي عليا.

شاركت في معارض قبل كده، والتجربة كانت مهمة، وقريب ناوي أعمل معرض خاص بيّا. بس أكتر حاجة بتفرحني فعلًا مش القاعة ولا الإضاءة، أكتر حاجة هي مواجهة الناس بالشغل. لما يقفوا قدامه على الحقيقة، ويكتشفوا إن كل ده خشب معمول بإيد إنسان، مش آلة.

عمر شايف إن رحلته لسه في أولها، وإن الفن ده محتاج نفس طويل. ودايمًا لما حد شاب بيسأله يبدأ إزاي، إجابته بتبقى واحدة، من غير تنظير: ارمي نفسك وابدأ. ما تستناش الظروف، ولا الإمكانيات المثالية. الاستمرارية هي كلمة السر. حتى لو شايف شغلك ضعيف في الأول، كمل. التطور مش بييجي فجأة، بييجي مع الوقت، ومع المحاولة اللي ورا المحاولة.

وأخيرًا..

نم نم مش مجرد اسم فني، هو حالة. حالة فنان قرر يسمع لإيده، ويصدق إحساسه، ويطلع من الخشب حكايات صغيرة، بس مليانة حياة.