The Definitive Guide to Living in the Capital , Cairo , Egypt

كافيهات

اختيارات كايرو 360: أجمد محلات الآيس كريم في القاهرة لعام 2018

آيس كريم أفضل أماكن الآيس كريم اختيارات كايرو 360 الأفضل في القاهرة جوائز كايرو 360 محلات آيس كريم محلات القاهرة
اختيارات كايرو 360: أجمد محلات الآيس كريم في القاهرة لعام 2018
    بواسطة
    Cairo 360

    الآيس كريم يا جماعة! الأكلة الوحيدة اللي بتقدر تبسطك في أي وقت سواء في الصيف أو في الشتاء، الآيس كريم هو صانع البهجة بسبب خفته وطعمه المنعش، وبرغم سهولة عمله إلا أنه مش أي حد بيقدر يظبطه تمام، وعلشان كده كان لازم نرشح لكم أفضل محلات الآيس كريم في القاهرة.

    الفائزين في فئة أفضل أماكن الآيس كريم في جوائز اختيارت محرري كايرو 360 لعام 2018:

     

    فروزي تويست –  Frozzy Twist

    رائد الآيس كريم رولز في مصر، المكان اللي بدأ في بورسعيد وبدأ ينتشر في كل المحافظات، ويعتبر من أوائل الأماكن اللي قدمت آيس كريم رولز في مصر، لسه محتفظ بالخلطة السحرية بتاعته اللي بتخلينا نستمتع بكل معلقة من كوكتيلات الآيس كريم اللي بيتحفنا بيها.

     

    ستافولتا –  Stavolta

     لما الحاجة تتعمل بمزاج وشغف وحرفية علشان تاخد في إيدك أفضل طعم طبيعي للآيس كريم، وستافلوتا سنة وراء سنة بيأكد أنه مكان محترف وهدفه يبسط كل زبائنه.

    جيلاتو ميو – Gelato mio

     كل شوية يفرحنا بنهكاته المختلفة ما بين الشوكولاتة والقهوة والتوت جيلاتو ميو أحسن مكان ناكل عنده جيلاتو، وأحسن مكان بيقدر طعم كل حاجة وبيقدمها بحب.

     

    يوجيز –  Yoggy’s

    آيس كريم الزبادي مش دائما بيزبط مع كل الناس، لكن يوجيز والإضافات اللي بيوفرها سواء من أنواع فاكهة أو شوكولاتة أو بسكوت بيوفر لنا تجربة متكاملة للسعادة غير المشروطة.

    ماندرين كويدر – Mandarine Koueidar

    من الأماكن القليلة اللي لسه محافظة على مستواها وطعم الآيس كريم المنعش اللي ما نقدرش نستغنى عنه، مش بس علشان هم من أوائل الناس اللي قدمت آيس كريم، لكن كمان الطعم مابيهزرش في حلاوته.

     

    ريجوليتو – Rigoletto

    من أحسن الأماكن اللي بتخلينا مستمتعين بكل نكهة بنطلبها سواء كانت نكهة تقليدية أو اختراع، وهيفضل من أماكنا المفضلة.

    ذا باتر هاف & كو – The Batter Half & Co

    مش بيهزر في الآيس كريم بتاعه زي ما معودنا على جودة منتجاته، طعم فريش ومنعش لكل حاجة جربناها.

    مقترح