The Definitive Guide to Living in the Capital , Cairo , Egypt

كافيهات

اختيارات كايرو 360: أفضل أماكن المخبوزات والحلويات في القاهرة 2022

أفضل الأماكن في فئة الحلويات والمخبوزات أفضل محلات القاهرة اختيارات كايرو 360 لعام 2022 محلات حلويات ومخبوزات في القاهرة
اختيارات كايرو 360: أفضل أماكن المخبوزات والحلويات في القاهرة 2022
    بواسطة
    Cairo 360

    صعوبات الحياة بتحتاج علاج قوي، وهتفضل الحلويات والمخبوزات الطازجة هي أفضل علاج، والحاجة اللي بتهون علينا، ومع الوقت بيزيد حبك ليها من غير أسباب، وكل ما كانت حلوة وشهية وبتعدل مزاجك بجمالها، كل ما إدمانك وحبك ليها بيزيد.

    علشان كده كان اختيار الأفضل من بين كل الأماكن اللي بتقدم حلويات ومخبوزات في القاهرة موضوع مش سهل، لكن فريق محرري كايرو 360 قرر يدخل التحدي ويقدم لكم القائمة دي.. قولوا مبروك للفائزين بجوائز أفضل الأماكن في فئة الحلويات والمخبوزات لسنة 2022:

    ذا فور فات لايدز  – The Four Fat Ladies

    الفكرة في حد ذاتها تخليك تقف قدامها وتفكر كتير، لكن صدقني مع أول تجربة هتبقى مدمن، المكان مسئول عنه 4 سيدات بأفكار عبقرية.

    المكان فعلًا بيقدم أحلى حلويات طازة ومميزة، هتستمتع بيها، سواء الكوكيز أو البراونيز أو كيكة الليمون اللي مش بنقدر نقاومها.

     

    كوبرملت  – Coppermelt

    لو أنت من الناس اللي بتاكل بعينيها قبل معدتها، يبقى ده مكانك المناسب، لأن بكل بساطه “كوبرملت” مش بيهزر في الحلويات اللي بيعملها، لا في شكلها ولا في طعمها المغري اللي ما يتقاومش.

    نولا –Nola

    لما بتقول عايز آكل كاب كيك في القاهرة يبقى أنت قصدك “نولا”، واللي هتلاقيها في كل مناسبة بتتزين بشكل جديد علشان تقدم للزبائن أفضل منتج، وده سبب انتشار أكثر من فرع ليها في كل أنحاء القاهرة.

     

    ساليه سوكريه- Salé Sucré :

    واحد من الأماكن اللي بتديك إحساس إن الحلويات ليها تاريخ، وتحس في طعمها بالأصالة، وكل الخيارات متاحه سواء حلويات شرقية أو غربية، ده فروعه المنتشرة على نطاق واسع في القاهرة.

     

    تي بي إس – TBS The Bakery Shop

    من أحلى الحاجات في TBS إنه منتشر فعلًا في جميع أنحاء القاهرة، ده غير طبعًا المخبوزات الطازة اللي بيقدمها، مع مجموعة متنوعة من المنتجات واللي منها سندويشات وميني بيتزا وفطاير، وكرواسون ودونتس وكروونتس .

    المكان مبتكر بجد، ويستحق إننا نجرب كل أصنافه ونستمتع بيها.

     

    رالفز جيرمن بيكري  – Ralph’s German Bakery

    ارفع توقعاتك براحتك، لإن المكان قدها وهيبهرك حقيقي، صحيح مش بيقدم حلويات بالمعنى التقليدي، لكن لازم نعترف إن الحلويات عنده مختلفة، لكن تميزه في مخبوزاته اللي هتشم ريحتها طول ما أنت قاعد في المكان.

    تجربتنا معاهم مش ممكن ننساها، خصوصًا بعد ما الفرع فتح في القاهرة بعد تجربة ناجحة جدًا في دهب.

    بول – Paul

    “بول” للدلع وبس، المخبوزات في المكان وحلوياته لا تقاوم، ويمكن السر في ده إن أغلب المكونات بيستوردها من الخارج، لكن تفضل طريقة الطبخ وعمل كل حاجة زي ما الكتاب بيقول هي كلمة السر.

    بستاشيو – Pistachio:

    واحد من أفضل الأماكن اللي بتقدم مخبوزات وحلويات تركية مميزة، والمنيو عندهم متنوعة، وتعتبر “كاروت كيك” أو “كيكة الجزر” واحدة من ألطف الحاجات اللي ممكن تجربوها، ده طبعًا غير “جاتوه ريد فالفيت”.. ممكن كمان لو كنت من محبي الحلويات الشرقية تجرب هريسة نبكية بالفستق.

     

    لو دريه – Ladurée:

    المكان ساحر بكل تفاصيله وديكوراته، ده بالإضافة لمنيو عظيمة جدًا، هتلاقي فيها أي حاجة تخطر على بالك، لإن المكان مش بس بيقدم مخبوزات وحلويات، لأ ده كمان بيقدم سندوتشات “توست” وأطباق فرنسية مميزة، علشان كده “لو دريه” مكان ينفع تقعد فيه في أي وقت من يومك، والاستف الراقي دايمًا هيكون في خدمتك.

    فويلا – Voila:

    المكان له فروع كتير على مستوى القاهرة، وشبكة توصيل كبيرة كمان، وبيقدموا أصناف مميزة ومبتكرة، وبيعملوا حركات حلوة بالميلفيه تحديدًا.

     

    كيكي – Keki:

    المكان ده اكتشاف يا جماعة، أولًا بيقدموا كل ما يتعلق بالمخبوزات اليابانية المختلفة والعجيبة، ثانيًا بتتقدم وبتتعمل بحب كبير بيبان مع كل قطمة.. ننصحكم تجربوا عندهم المنيو كله، وابدؤا بـ “الجابانيز كيك” مع أي مشروب من اختياركم، وممكن تفتطروا وتتغدوا كمان في المكان.

     

    ذا باتر هاف – The Batter Half:

    حضر نفسك لغطس حلو من “The Batter Half & Co” واحد من أفضل اختيارات فريقنا للحلويات والمخبوزات في القاهرة، وده لإنهم بيستخدموا مكونات عالية الجودة، وبيعملوا منها وصفات مبتكرة، من أول “الماكرون” لحد كور “الكيك”.

    مقترح