The Definitive Guide to Living in the Capital , Cairo , Egypt

3 أماكن على البحر هتخلي يومكم مختلف في الإسكندرية
    بواسطة
    Mohamed Talaat

    كتير مننا بيحب يقضى داي يوز على البحر علشان يجدد نشاطه، ومافيش أجمل من أنك تروح إسكندرية تقضي يومك على البحر من أوله، وسواء هترحوا عن طريق شركات بتنظم رحلات اليوم الواحد، أو هتروحوا مع نفسكم وتاخدوا عربيتكم أو أي وسيلة مواصلات وتستمتعوا بجو إسكندرية وجمالها من الصبح بدري، عندنا اقتراحات لـ3 أماكن على البحر هتخلي يومكم مختلف في الإسكندرية.

     

    البداية تقدروا لو مش معاكم عربية انكم تروحوا عن طريق سوفيل أو جو باص أو غيرهم من الشركات اللي بتقدم حجز عن طريق الويب سايت أو الأبليكيشن، ودول هينزلوكم في سيدي جابر أو 45 ميامي وما بينهم، وكمان تقدروا تروحوا عن طريق عربيات رمسيس أو أحمد حلمي أو الهرم وغيرهم من المواقف اللي هتكون قريبة ليكم، ودول أغلبهم هينزلوكم محرم بك في الموقف أو حسب خط سيرهم ممكن يكون مكان تاني داخل الإسكندرية.

     

    وصلنا إسكندرية من بدري، وأول حاجة عملناها رحنا جليم باي، اللي اتمشينا فيه وكان فاضي وقت وصولنا واستمتعنا بالتمشية وبعدين قررنا اننا نجرب لاتيه من ستاربكس وكان سعره 50 جنيه، وطبعًا كان طعمه جميل وشربناه في الأوبن إيريا على البحر ورغم سخونة الشمس إلا أن القعدة على البحر تستاهل. لكن حاولوا ماتنسوش الصن بلوك وخلوه معاكم باستمرار واستخدموه كل 3 ساعات.

    ولحد الساعة 9 مطاعم جليم باي مكنتش جهزت الإفطار فقررنا نطلع على كازينو الشاطبي، ورحنا مطعم Murano واللي عندهم أكتر من نوع إفطار وإحنا اختارنا فطار مورانو سبيشيال سعره 75 جنيه وكان عبارة عن ميكس جبن ورغم ان جودتها حلوة إلا أنها كانت عينات مش كمية مناسبة، وأومليت عادي رغم أننا طلبناه عيون بس نزلنا عادي وطعمه ماكنش فيه أي افتكاسة هو طبق أومليت طبيعي، ومعاهم صوابع البطاطس المقرمشة بالبهارات المميزة، وكمان معاهم تقدروا تختاروا عصير أو شاي أو قهوة، وإحنا اخترنا عصير فراولة ونجحنا في اختيارنا، وكمان جربنا الفطار الأورينتل وسعرها كان 59 جنيه، وكان فيه فول لو كانوا عملوه إسكندراني كان بقى عظيم، وفلافل مش ألطف حاجة، وجبنه وصوابع بطاطس عاديين، وتقدروا تختاروا مشروب ما بين شاي وقهوة مع الفطار.

    خلصنا فطار ونزلنا اتمشينا من الشاطبي للقلعة وشوية نتمشى وشوية نركب، وهكذا، لحد ما قررنا نروح نجرب wave ونشوف يا ترى فعلًا يستاهل أنه يكون ضمن اختياراتنا ولا لأ، وفي الحقيقة هو يستاهل كل حاجة، وطبعًا بدأنا تجربتنا بالقهوة، لأن المكان الصح بيقدم قهوة صح الصح، والدوبل كان سعرها 39 جنيه، وبعدها طلبنا بان كيك كراميل وسعره 60 جنيه وده اختراع عظيم لازم تجربوه ومليان صوص ومكسرات وموز وخفيف كمان، خلونا نقولكم أننا قررنا مانتغداش بعد ما جربناه، وكمان طلبنا نسكافيه سعره 54 جنيه وكان عادي جدًا بس بينزل معاه كيك طعمه حلو، ولو مالكمش في الحلو قوي بلاش تطلبوه واكتفوا بالكيك اللي بينزل مع النسكافيه، وسعر زجاحة المياه الصغيرة كان 10 جنيه.

    خلصنا قعدتنا على البحر في wave وقررنا إننا نرجع القاهرة بعد يوم لطيف وسريع جددنا فيه نشاطنا وساعدنا نفسنا أننا ناخد طاقة إيجابية من يود البحر، يالا روحوا جربوا القعدة على البحر وغير المود بتاعكم.

    مقترح