The Definitive Guide to Living in the Capital , Cairo , Egypt

“موهوب أم موهوم؟”.. كتاب جديد لكل اللي نفسه يتعلم فن الكتابة
    بواسطة
    Mohamed Talaat

    لو كنت بتحلم تكون كاتب، ولو بتحب الكتابة وحاسس إن عندك حلم أدبي نفسك يخرج للنور في كتاب من تأليفك.. كتاب “موهوب أم موهوم في الكتابة؟” هو دليلك اللي هيعرفك حاجات كتير عن عالم الكتابة وتحويل الأفكار لمحتوى أدبي محترف ينفع يكون كتاب في النهاية.

    كتاب “موهوب أم موهوم في الكتابة؟” هو الجزء الثاني من سلسلة رسائل من هؤلاء، المهتمة بدعم أصحاب التجارب الأولى في الكتابة من خلال صناعة حلقة وصل بينهم وبين كبار الروائيين والكُتاب في مصر، واللي بيقوموا بسرد تجاربهم الإبداعية واستخلاص أهم الدروس من حياتهم الأدبية.

    شارك في كتاب “موهوب أم موهوم في الكتابة؟” 11 كاتب مصري وعربي بمقالات ومشاركات عن قيمة الكتابة والقراءة في حياتنا، في محاولة للإجابة عن السؤال اللي كتير مننا نفسه يلاقي إجابته: هو أنا موهوب بجد في الكتابة ولا موهوم؟.

    من الأقلام اللي شاركت في الكتاب، د. أسامة عبد الرءوف الشاذلي، سامح الجباس، محمد سمير ندا، هيلانة الشيخ، رولا خرسا، عمرو حسين، د. أحمد مروان، هالة البشبيشي، معتز نادي، مصطفى فتحي، محمد أمير.

    الكتاب بيضم كمان مقالات عن أهم المكتبات والمبادرات والجروبات الثقافية الهامة في مصر، اللي ليها علاقة بصناعة الكتابة والقراءة، كتبها مي حمزة، وخميلة الجندي، ودنيا درويش، وإكرام يونس.

    الكتاب جمع مقالاته وأعده للنشر الكاتب فتحي المزين، اللي أكد لـ “كايرو 360” أن الكتاب هيكون متاح في جناح دار ليان للنشر والتوزيع بمعرض القاهرة الدولي للكتاب 2022 في صالة 1 جناح A 31.

    مقترح