أجمل 5 أغاني ممكن تبدأ بيهم يومك
Omar Mossad
البدايات دايمًا مهمة..
احنا كبشر بنتفاءل جدًا بالبدايات المبشرة والإشارات الحلوة مهما كانت بسيطة، والبدايات المتعثرة دايمًا بتعكنن علينا وتضايقنا بقية السكة حتى لو كانت بتاخد وقتها القصير وتروح لحالها، وبالتالي فأهم وقت في يومنا هو فترة الصباحية.. كل ما اجتهدنا أننا نقضيها في انبساط وسعادة هنلاقي دنيتنا ماشية زي الفل بقية اليوم. من ضمن الحاجات اللي ممكن تظبط مودك جدًا عالصبح هي المزيكا والأغاني، وخصوصًا لما يبقى اللحن رايق والكلمات مبهجة.. واحنا هنا جمعنالكم كام أغنية مطابقة للمعايير بالمللي، مع ميزة إضافية مهمة جدًا، وهي أن الموضوع الأساسي للأغاني دي هو الصباح وطلعته.
في البداية ماينفعش نحط حاجة قبل الأغنية الأشهر في السكة دي، اللي من جمالها لسه كل أجيال المطربين اللي راحوا واللي لسه بيطلعوا بيتهافتوا على إعادة إنتاجها طول الوقت.. صبح الصباح فتاح يا عليم.. والجيب مافيهش ولا مليم! أكيد عرفتوا أننا بنتكلم عن "الحلوة دي" للدرويش سيد، ممكن تسمعوها بصوت الجوهرة فيروز.. أو بصوت أميمة الخليل مع مارسيل خليفة .
الأغنية رقم اتنين في تجميعتنا الصغير دي هي رائعة سيدنا الشيخ إمام عيسى اللي عمرك ما هتمل من سماعها كل صباح.. دي لأنها مش بتكلم حد مخصوص ولا بتحكي حالة بعينها، بتتغزل في جمال الصباح.. وبس! قالك: "طلع الصباح كل الجمال في طلعته .. والنور سرح كحل عينينا بفتنته".. قول يا سيدنا كمان قول!
رقم تلاتة نروح فيه لعمنا محمد قنديل، الراجل اللي صوته مليان بهجة وألحان أغانيه كلها حركية ومرحة.. ونسمعه وهو بيقول: "يا حلو صبح يا حلو طل .. يا حلو صباح نهارنا فل".. فل الفل بجمال صوتك وخفة روحك يا عم قنديل والله.
والرابعة يقعد فيها مربع زي البيه عم محرم فؤاد وهو بيقول: "أجمل صباح عندي .. صباحك الوردي"، حاجة كده للناس اللي بتحب تصطبح على كلمة وللا نظرة من الحبايب.
ونختم مع ست الكل في الزمن اللي فات واللي جاي.. ستنا "ام كلثوم" وهي بتقول: "يا صباح الخير ياللي معانا .. الكروان غنى وصحانا"، غالبًا الكروان اللي غنى وصحانا ده كان حتة تلميذ صغير من تلاميذك يا ست.. ألف رحمة ونور عليكي.
يسعد صباحاتكم وأيامكم كلها يارب.
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
