دليل كايرو 360 لتعليم العزف على العود في القاهرة
Bassem Abou Arab
النهاردة المقال هـ يتكلم عن أول آلة شرقية فى دليل كايرو 360 لتعليم العزف على الآلات الموسيقية، “العود” من أشهر الآلات الشرقية وأعرقها زي ما كلنا عارفين ورغم انحسارها في منطقة الشرق الأوسط أو الوطن العربي بمعنى أدق إلا أنها معروفة عالميًا وده لارتباط صوت نغمها بالموسيقي الشرقية أكثر من آلات ثانية كثير بالإضافة طبعًا للبعد التاريخي للعود من قديم الأزل!
لو تكلمنا عن مواصفات العود بشكل عام هـ نقول أن جسمه خشبي بـ يتكون من 5 أوتار مزدوجة و10 مفاتيح لضبطهم، والعود بـ يتكون من 2 ونصف أوكتاف (الأوكتاف هو السلم الموسيقي). بالطبع زي أي شيء ممكن نلاقي استثناء لأشكال العود زي أن أحيانًا ممكن يكون له 6 أوتار مزدوجة أو أن يكون عود كهربائي زي الجيتار بـ يُوصل بالسماعات بدون صندوق خشبي أو أنه يكون مرصع بأصداف وزخارف تخلي سعره خيالي! لكن اللي قولناه فى الأول هي المواصفات العامة للعود.
توظيف العود فى الموسيقى له أشكال مختلفة وأشهرهم هو وجوده فى التخت الشرقي الكامل لعزف لحن المقطوعة الأساسي خصوصًا لاعتماد الموسيقيين عليه فى التلحين في أوقات كثيرة زي ما شوفنا القصبجي مع الست أم كلثوم، أوقات ثانية كثير بـ يكون العود آلة عزف منفرد أو مع غناء بدون فرقة موسيقية مصاحبة وهنا بـ تكون فيه مساحة أكبر للعازف أنه يقدم مهاراته فى التقسيم والابتكار فى العزف على العود زي فريد الأطرش اللي بـ يعتبر من أمهر من عزفوا على العود.
فى الموجة الأخيرة للموسيقى أكيد ظهر دمج للعود في فرق بـ تلعب موسيقى بعيدة عن الشرقي زي الروك والريجي وغيرهم، و من أهم الفنانين عازفي العود اللي وظفوه بشكل غير تقليدي ويستحق التجربة هو الفنان التونسي ظافر يوسف اللي مزج موسيقى الجاز والإلكترونية بروح الموسيقى الصوفي بشكل رائع.
فين ومع مين أتعلم العزف على العود؟
بيت العود من أفضل الأماكن فى تعليم العود بشكل أكاديمي واحترافي، ده لأنه بـ يقوم بتدريس الـ3 مدارس المختلفة للعود وهما العراقي والتركي والمصري، سعر الكورس فيه بـ يكون 250 جنيه فى الشهر 3 أيام فى الأسبوع، بيت العود مكانه شارع محمد عبده خلف جامع الأزهر بجوار حارة الست وسيلة منزل عبد الرحمن الهراوي.. للحجز ومعرفة التفاصيل ممكن التواصل مع المسؤول هناك أ/ محمد صلاح ورقمه 01008791214 بس خلي بالك أن مواعيد الحجز من يوم 1 لغاية 7 من كل شهر، لو الميعاد فاتك هـ تبدأ من الشهر اللي بعده.
و لو حد حابب دروس خاصة مع شخص محترف وبـ يعلم على نفس نهج بيت العود ممكن يتواصل مع أ/ عمار سيد، ممكن يبدأ تعليم فى حصص خاصة 4 مرات فى الشهر بسعر 300 جنيه ومدة الحصة بـ تكون حوالي ساعة.
لو كنت ساكن ناحية مدينة نصر أو مصر الجديدة وعاوز مكان تعليم قريب منك ممكن تروح لـ مركز فنون وهناك ممكن تبدأ تعليم بسعر 200 جنيه للـ 4 حصص، والمركز مكانه 7 شارع يوسف عباس، الدور الأول، شقة 104، مدينة نصر أمام نادي الزهور، للتفاصيل و الحجز ممكن تكلم 22623993 أو 01022630333.
كمان ممكن تتواصل مع أ/كريم فاروق لو عاوز دروس خاصة هـ يساعدك من الأول تبدأ من الأساسيات ورقمه 01143731684 والحصة مكانها بـ يكون حسب الاتفاق وسعرها 75 جنيه.
لو كنت بدأت بالفعل وحابب تأخذ مستوى متقدم من العزف ممكن تكلم مركز تنمية المواهب بدار الأوبرا وساعتها ممكن تكمل تعليم مع عازفين كبار زي حازم شاهين وغيره بسعر 400 جنيه فى الدورة بشكل أسبوعي لمدة حوالي 5 شهور، للحجز والتفاصيل ممكن تتصل على أرقام 27390229-27390353-0111109457-01005200906.
آخر مركز ثقافى أو مكان هـ نتكلم عنه هو ساقية الصاوي هـ تتعلم وتنمى مهاراتك فى العزف وتتثقف موسيقيًا وهـ تتعلم كمان قراءة وكتابة النوتة الموسيقية مع أ/ بلال الشيخ
أستاذ العود والغناء العربى بساقية الصاوى وأستاذ الكورال والموسيقى بصندوق التنمية الثقافية، مدة الورشة مفتوحة حسب المستوى والاستيعاب تبدأ من عمر 7 سنوات بواقع محاضرة أسبوعيًا لمدة ساعة بـ 100 جنيه شهريًا.
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
