The Definitive Guide to Living in the Capital , Cairo , Egypt

مزيكا

مش كله كآبة وحزن.. أصالة في ألبومها الجديد فعلًا (مهتمة بالتفاصيل)!

مش كله كآبة وحزن.. أصالة في ألبومها الجديد فعلًا (مهتمة بالتفاصيل)!
    بواسطة
    Cairo 360

    كتب: محمود حافظ

    من ساعة ما ألبوم أصالة الجديد نزل، والناس مابطلتش كلام عن جو الحزن والكآبة المخيم على الأغاني، بعكس ألبوم الهضبة الأخير اللي كان أغلبه فرح وبهجة (7 أغاني من 10)، وأصالة نفسها أكدت أن ده أكتر ألبوم هي راضية عنه في حياتها، وأن كل أغنية مقصودة ومتعبر عنها بطريقتها هي.

    أما عن نجاح الألبوم فهو حاليًا متصدر الآي تيونز بالفعل رغم المنافسة مع مطربين تقال، ونسبة المشاهدات على اليوتيوب عالية وفي صف الأغاني الحزينة كمان، الحقيقة أن الألبوم مش كله كآبة زي ما اتشهر، وده اللي هنعرفه دلوقت مع سردنا للأغاني اللي عددها 13 أغنية:

    1- مهتمة بالتفاصيل..كلمات أمير طعيمة وألحان إيهاب عبد الواحد

     

     

    أغنية عنوان الألبوم نفسها مش حزينة أبدًا، إنما رومانسية هادية وحالة حب لطيفة، عن اهتمام الزوجة وحرصها على سعادة الزوج، المؤلف أمير طعيمة معروف بأغانيه البسيطة والمؤثرة زي أغنيته (تساهيل) اللي غنتها أصالة برضه في فيلم ولاد رزق.

    2- كفاية كلمة.. كلمات نادر عبدالله وألحان سامح كريم

    أغنية تانية كلها بهجة وأحتفال، جو غربة الحبيب والشوق ليه، اللحن مقسوم شرقي باحترافية، وكلماتها واضحة في معناها جدًا (طول الوقت ده.. مكانه ده ماحدش ملاه..حياتي ماتتحبّش لولاه.. وإن غاب كمان عشرين سنة استنّاه).

    3- قاصد إيه..كلمات هشام صادق وألحان مدين

    إيقاع حديث وسريع جدًا، بعيد كل البعد عن الحزن، عن اللي بيبين مشاعر حب قدام واحدة بس هي لسه مش فاهمة هو قاصد إيه، (لا دي معاملة معارف عادي أو أصحاب… ولا مجاملة بشياكة بسيطة بين أغراب)، هتفتكر قوي أغنية (مشتاقة) لأصالة اللي فيها نفس الجو الحركي الصاخب.

    4- مين فينا.. مع محمد الشرنوبي بألحانه وكلمات خميس العرب

    نبعد شوية عن الحب ونيجي لأغنية مميزة بتجاوب عن تساؤل وجودي قوي زي اللي ملوا السوشيال ميديا مؤخرًا، مين فينا اختار حياته؟.. لونه واسمه ودينه؟! و الإجابة بتيجي بتشبيهات بديعة جدًا هتعيش معاها مهما كان دينك! (زى جامع جنبه نيل زي دير من ألف جيل مش مهم ف أي دين المهم تكون جميل).

    كمان بيشارك أصالة في الغناء محمد الشرنوبي نجل الملحن الكبير فاروق الشرنوبي، وهو ممثل ومطرب شارك في أكتر من مسلسل زي (وكالة عطية) و(الجماعة 2) واشتهر من خلال غناه في برنامج (صاحبة السعادة).

     

     

    5- صندوق صغير.. كلمات فادي الرفاعي وألحان دانة الفردان

    أغنية بلهجة أصالة الأصلية، سورية بطابع رحباني قوي، يعني هتحس أنك بتسمع أغنية لفيروز ككلمات وألحان، حتى الحكاية قريبة من جو (حبيتك بالصيف) و(حبوا بعضن)، أصالة بتقول (صندوق صغير، بردان.. مخبّى بدروة صُوّان وفيه ورقة غفيت بَين الفلّ.. مقدّر إلها النسيان)، أغنية مميزة لعشاق أصالة وفيروز مع بعض، هي بتتكلم أصلًا عن الكفاح وحمل السلاح.

    6- هيقولك.. كلمات محمد طلعت وألحان أسامة رفعت

    من أول الأغنية هتلاقي دندنة مرحة بصوت أصالة، بتتريق على كلام الجانات المتزوق لضحاياهم من البنات! هنا بتبدأ النغمة اللي اتكررت في 5 أغاني ضمن الألبوم، أن أصالة بتهاجم الرجالة وتتهمهم، لكن التريقة هنا لذيذة فعلًا وجديدة (ف عيونه دي الملايكة والجنة والسحاب.. وأتنين لمون وشجرة، حلوة ضحكته).. ودي أغنية كمان كلها بهجة!

     

     

    7- أنا بتخان.. كلمات محمد عاطف وألحان رامي جمال

    ترجع أصالة تتهم الراجل تاني بشكل أقسى مش تريقة، لما الزوج يخون بتبقى مراته زي ما أصالة بتقول (بقيت وأنا ماشية بتلفت حواليا ببص كتير على الدبلة اللي ف إيديا وبسألها هنفضل ولا هنسيب بعض)، وصوتها هامس في الآخر بيقول (أنا خايفة)! الأغنية عدت المليون ولاقت نجاح كبير لدرجة أن واحدة علقت وقالت (أصالة حسستني أني بتخان وأنا أصلًا سينجل)!

    8- يا عالِم.. كلمات أحمد عز وألحان ياسر الماجد

    رومانسية حزينة فعلًا، برضه عن الغربة والمسافات بين الأحبة، بس المرة دي فراق مش اشتياق، بتقول (ماسابش لسؤالي عليه ليه مجال.. وبالحرف قال.. مافكّرش فيه.. كإن اللي بينا حكاية يومين)، هنا برضه نموذج لراجل ندل في غربته!

    9- كام مرة.. كلمات أشرف أمين وألحان محمد النادي

    اتهام تاني، كفاية تعرف العنوان كامل من أول كوبيله (خنت كام مرة.. هتقولي ولا مرة، طب أخرج من جواك وشوفك مرة من بره!)، وكأن الأغنية دي تكملة لأغنية (أنا بتخان)، عمومًا هو ده اللي عمل اللبس عند الناس، تكرار كلمة الخيانة وكأن الأغاني تحريض على الطلاق زي ما بعضهم قال!

     

     

    10 – كل ما تفتكره.. كلمات تامر حسين وألحان مدين

    تعالوا نخلص كل الاتهام والخيانة! أيوة دي أغنية تانية في الموضوع ده، عن واحدة بتحزن كل ما تفتكر حبيبها وفي الآخر تبرئة تامة للبنت (علشان الواحدة مابتنساش وده عيبها تعيش العمر بتدور على حبيبها وتشتاقله ولو غلطان هو اللي سايبها)، أظن كده أصالة اتهمت الرجالة واتريقت بما فيه الكفاية!، لا لسه أغنية واحدة بالشامي!

    11- شو بدك… كلمات وألحان صلاح الكردي

    ندخل في الاتهام على طول (يا قلبي شو بدك منه.. بعدك عّم تسأل عنو شكلك عّم تنسى فينا شو صار.. جفّ الدمع بعيني)، تمام.. المرة دي خلاص بتهرب من سيرة الراجل الخاين، وبتسأل قلبها (شو بدك منه)، خلاص الاتهامات خلصت وجه الدور على أصالة تبكينا فعلًا من الشوق مش الاتهام!   

     

     

      12- يوم الرحيل.. كلمات أحمد قطوط وألحان أحمد الزعيم

    دي أغنية حزينة 100%، لكن مافيهاش ذرة اتهام خالص، بالعكس كلها لهفة وانتظار للحبيب بعد يوم الرحيل، أعلى الأغاني شعبية في الألبوم وقربت توصل 2 مليون ونص مشاهدات، فعلًا إحساس عالي وكفاية كوبليه واحد يعرفك الروعة دي (من قلبي بدعي ربنا.. يقرب لقااااك ياللى ماليش عنك غنا.. ارجع وفرح قلبي أنا ثانية بثانية بعيشها أنا…في بعدك هلاك)، يا ترى بعد كل دول.. هنختم بإيه؟

    13- رجع الفرح.. كلمات سهام الشعشاع وألحان خالد البكري

    ايوة كده.. نفرح شوية بالشامي برضه، والأغنية الأخيرة بتقولها بصراحة (قلبى انتصر والحب حن ورق ما عاد عندى للحزن مطرح.. جاي ع بالي اضحك وافرح يا ريت فييي غافل الأيام .. وع ضهر غيمة بالفضا اسبح).

    في النهاية لقينا الألبوم متوازن ومافيش نوع طغى على التاني، صحيح فيه أغاني حزن وخيانة، لكن فيه أغاني فرح واشتياق وحتى سخرية لطيفة! ده غير الجو الوجودي والأغنية بطابع فيروز، فعلًا أصالة أثبتت أنها (مهتمة بالتفاصيل) في التنويع والتجديد، فهل الألبوم هيتكتب في تاريخها زي (60 دقيقة حياة)؟ الأيام الجاية هتثبت لنا.

    مقترح