The Definitive Guide to Living in the Capital , Cairo , Egypt

مزيكا

ملوك التسعينيات راجعين في ألبومات صيف 2019

التسعينات رامي صبري عمرو دياب كريم محسن محمد محي مصطفى قمر هشام عباس هيثم شاكر واما
ملوك التسعينيات راجعين في ألبومات صيف 2019
    بواسطة
    Omar Abd-elmaqsoud

    مع ارتفاع درجات حرارة الصيف، بترتفع درجات الاستعداد لاستقبال ألبومات الصيف وحفلات كبار الفنانين، وبعكس فصول الصيف اللي فاتت، الصيف السنة دي فيه حالة من النشاط الفني لعدد كبير من الفنانيين، وارتفاع في درجات التأهب والانتظار لأحدث الألبومات الغنائية.

    صيف 2019 هيضم عدد كبير من الألبومات المقرر طرحها، ومنها ألبومات لمطربين كانوا متواجدين خلال السنين اللي فاتت، سواء بأغنيات سنجل أو بألبومات كاملة، ومطربين راجعين بعد سنوات من الغياب الكامل عن الساحة الفنية.

    تعالوا نشوف مين من المطربين السنة دي هيكون متواجد معانا بفنه وأغانيه، وهيخلي صيفنا أحلى معاه:

    عمرو دياب:

    الهضبة “عمرو دياب” من الفنانين اللي ألبوماتهم بتبقى محجوزة من قبل ما تنزل، وبينتظرها ملايين من محبيه في العالم العربي، ومؤخرًا كشف “الهضبة” عن اسم وبوستر ألبومه الجديد “أنا غير” من إنتاج شركة “ناي” وبرعاية من شركتين كبار هما “ايجيبت لينك” و”فودافون”.

    عمرو دياب طرح فعلًا أغنية “بحبه” من الألبوم الجديد اللي بيتعاون فيه مع مجموعة من كبار الشعراء، واللي منهم نادر عبد الله، وأيمن بهجت قمر، وتامر حسين، وأحمد مزوق، ومع ملحنين شباب منهم عمرو مصطفى، ومحمد يحيى، وإسلام زكي، أما الموزع الموسيقي للألبوم فهو الموزع المحترف “أسامة الهندي”.

     

    رامي صبري:

    “فارق معاك” هو عنوان الألبوم الجديد للفنان “رامي صبري” واللي هينزل يوم 1 أغسطس، زي ما أعلن على حسابه في “إنستجرام” ببوست كان فيه البوستر الرسمي للألبوم.

    الألبوم نزل منه مجموعة أغاني كشكل من أشكال التسويق، وبيتعاون فيه مع مجموعة كبيرة من الشعراء ضمت أمير طعيمة، وأحمد علي موسى، وتامر حسين، وعزيز الشافعي، وهالة علي، وهاني رجب، وملحنين منهم مديح، وشادي حسن، ولحن لنفسه مجموعة من الأغاني.

    هيثم شاكر:

    الفنان “هيثم شاكر” بدأ العد التنازلي لموعد طرح ألبومه الجديد “معرفة قديمة”، واللي بدأ نشر الدعاية الخاصة بيه على صفحاته في مواقع التواصل الاجتماعي، ده غير إنه طرح فعلًا أغنية من أغاني الألبوم بعنوان “ماتوصونيش” ، ونزل الفيديو كليب الخاص بيها على صفحته على الفيسبوك.

    الألبوم هيضم  12 أغنية، تعاون فيها هيثم مع مجموعة كبيرة من الملحنين، منهم أيمن بهجت قمر، وأمير طعيمة، ورمضان محمد، ومحمد الرفاعي، وبهاء الدين محمد، وعلي سلامة، ومحمد عاطف، ومن الملحنين، محمد يحي وعمرو مصطفى وشادي حسن، ووليد سعد، وتامر علي، وأحمد صلاح حسني.

    واما:

    فريق “واما” هيرجع للساحة الغنائية من جديد خلال الصيف ده، بعد الانتهاء من اللمسات النهائية لألبومهم الخاص واللي من المتوقع إنه يشوف النور قريب.

    الألبوم الجديد من إنتاج شركتين هما “نجوم ريكوردز”، و”هاي واي”، ولحد النهارده مفيش إسم معروف، لكن بدأ الكشف عن تفاصيله وحملته الدعائية فعلًا، وطرحت الفرقة أغنية “شمس بحر” على “يوتيوب” كدعاية للألبوم، وتصبيره للمعجبين المنتظرين.

    فريق “واما” في الألبوم الجديد هيتعاونوا مع مجموعة كبيرة من الشعراء زي أيمن بهجت قمر، وأمير طعيمة، ونادر عبد الله، ومحمد عاطف، وجمال الخولي، وأحمد المالكي، وهاني رجب.

    وفي التلحين والموسيقى خالد عز، والفنان رامي جمال، والفنان تامر عاشور، والفنان أحمد صلاح حسني، ومديح، كمان شارك في التلحين أحمد فهمي، ومحمد نور من أعضاء الفريق.

    أما التوزيع الموسيقي فشارك فيه نادر حمدي، وتوما، وإيهاب فاروق، ورامي سمير، وأمين نبيل.

     

    كريم محسن:

    “قابل بقى” هو اسم الألبوم اللي هنسمعه بصوت المطرب والملحن “كريم محسن” الصيف ده، واللي من المقرر إنه هيكون متاح خلال أيام.

    الحملة الدعائية الخاصة بالألبوم بدأت فعلًا، ومنها عرفنا إن الألبوم هيضم 14 أغنية من تأليف توليفة كبيرة من الشعراء، زي أحمد حسن راؤول، وهاني صارو، وحسام سعيد، وغيرهم من المؤلفين الشباب.

    كريم محسن هيشارك في تلحين وتوزيع عدد من أغاني ألبومه.

    محمد محيي:

    أكتر من 10 سنين هي فترة غياب السوبر ستار “محمد محي” عن الساحة الفنية، لكن الصيف ده هنكون على معاد مع “محيي” بألبوم جديد، بعد ما تعاقد مع شركة “مزيكا” لإنتاج وتوزيع الألبوم.

    “محيي” هيتعاون في الألبوم الجديد مع شعراء مخضرمين زي أيمن بهجت قمر وأمير طعيمة وأحمد مرزوق وعنتر هلال وإيهاب عبده وأشرف أمين ونور الدين حمدي ونور الدين مصطفى وهاني رجب وسلطان صلاح، والشاعر الراحل رضا أمين.

    وكمان هنسمع في الألبوم ده موسيقى وألحان من تأليف “محيي” شخصيًا ده غير الملحنين محمد رحيم ووليد سعد ومصطفى عوض وإيهاب عبد الواحد ومدين وحمادة النادي ومحمود شريف وكريم حمدي ومديح.

    التوزيعات الموسيقية للألبوم لـ: فهد ومحمد العشي ورفيق عاكف.

    مصطفى قمر:

    البوب ستار “مصطفى قمر” هيكون ليه بصمة الصيف ده بألبوم جديد، بعد غياب 5 سنين من آخر ألبوم ليه اللي كان بعنوان “مطمن” واللي صدر سنة 2014.

    الألبوم الجديد هيكون باسم “ضحكت ليا” وهيضم مجموعة كبيرة من الشعراء، منهم تامر حسين، وحسن عطية، ومحمد عاطف، وأسامة مصطفى، ونور الدين محمد وعصام حسني، وسمر حسين آدم، وضحى محمد علي، ومحمد طه الجزار، وحمادة السيد.

    وهنسمع أغاني من ألحان الفنان محمد يحيى وملحنين زي محمد النادي، وتامرعلي، وسامح كريم، وأحمد مدحت العدل، وشريف بدر وجوليو وطارق نجيب ومديح وتوما.

    والموزعين عادل حقي وتوما ووسام عبد المنعم وأحمد إبراهيم وطارق حسيب وزووم.

    هشام عباس:

    هنرجع نسمع من تاني نجم التسعينات الفنان “هشام عباس” السنة دي بعد غياب 10 سنوات في ألبوم جديد، على وشك إنه يشوف النور، وغالبًا يهنعرف اسمه على عيد الأضحى.

    “هشام عباس” هيتعاون في الألبوم الجديد مع شعراء مهمين في الوسط الفني منهم أيمن بهجت قمر، وأمير طعيمة، وعزيز الشافعي، وشادي نور، وكيرو راجي.

    والملحنين عزيز الشافعي، وياسر نور، ومدين، وبلال سرور، ومعتز أمين.

    ومع الموزعين توما، ووسام عبد المنعم، وهاني ربيع، وسيرجيو.

    مقترح