The Definitive Guide to Living in the Capital , Cairo , Egypt

الأغاني الإيقاعية اللي بتعمل شعور بالبهجة والسعادة بتنتشر بسرعة وبتعلم مع الناس. لكن للأسف المنطقة دي مش موجودة كتير في المزيكا العربي. وإحنا اخترنا 10 أغاني تساعد على تغيير المود وتساعد على الشعور بالنشوى والسعادة.

 

أنت معلم

أغنية أنت معلم للمطرب المغربي سعد المجرد حققت نجاح باهر من وقت ظهورها في 2015 ولحد دلوقتي. وحققت أكتر من 300 مليون مشاهدة على اليوتيوب، وده أكبر عدد مشاهدات لأغنية عربي لحد دلوقتي.

البهجة في الأغنية مش بس على مستوى اللحن والإيقاع، إنما على مستوى الصورة كمان. الكليب قدم صورة جديدة ومختلفة، مليانة بهجة وجمال. والأغنية من كلمات وألحان وتوزيع الملحن المغربي جلال الحمداوي.

 

ابن الجيران

الجميلة نانسي عجرم من بداياتها وهي بتقدم أغاني مرحة وإيقاعية وفيها خفة دم. لكن أغنية ابن الجيران من أجمل أغانيها. وهي من كلمات خالد أمين وألحان محمد رحيم وتوزيع حميد الشاعري.

 

Stayin' Alive

في السبعينات ومع انتشار موسيقى الديسكو اللي اجتاحت العالم وقتها، ظهرت فرق كتير وكان من أهمها الـ Bee Gees. اللي حققت نجاح باهر وكسرت الدنيا. واتسعت شهرتهم أكتر لما غنوا في فيلم Saturday Night Fever أو حمى ليلة السبت. وفي الفيلم ده غنوا Stayin' Alive اللي كانت لسان حال البطل توني مانيرو اللي لعب دوره جون ترافولتا واترشح لجايزة أوسكار عنه.

 

C'Est La Vie

الفنان الكبير الشاب خالد سفير موسيقى الراي في العالم كله قدم أغنية C'Est La Vie سنة 2012 بعد غياب طويل وصراع مع المرض والظروف السيئة. 

 

اخرج من البيبان

الكنج محمد منير له رصيد كبير من الأغاني اللي بتعمل حالة من التفاؤل. ومن بداية مشواره أصرّ أنه يبث في جمهوره روح التفاؤل والأمل. ومش هننسى أن منير اللي غنى لو بطلنا نحلم. بس النهارده هنقدم أغنية منسية تقريبًا حبينا نفكركوا بها. أغنية اخرج من البيبان من ألبوم مساكن شعبية. الأغنية كلمات الشاعرة القديرة كوثر مصطفى، وألحان الراحل حسين الإمام وتوزيع الموهوب عمرو أبو ذكري.

 

I Will Survive

هنرجع تاني لفترة السبعينات، والمرة دي مع أغنية مشهورة جدًا ومن أكتر الأغاني اللي اتنحتت واتقلدت سواء المزيكا أو الكلام. أغنية I Will Survive  لملكة موسيقى الديسكو Gloria Gaynor. 

 

نسم علينا الهوى

كتير مننا مش فاكرين للمطربة الكبيرة فيروز غير الأغاني الهادية أو الأقرب للحزن أوالرومانسية. لكن فيروز عندها رصيد كبير من الأغاني الخفيفة. ومن أهم أغانيها أغنية نسم علينا الهوى اللي غنتها في فيلم بنت الحارس اللي شاركها في بطولته المطرب الكبير نصري شمس الدين ومن إخراج هنري بركات.

 

سيدي وصالك  

مطربتنا الكبيرة أنغام – فخر الصناعة المصرية – قدمت في 2003 أغنية سيدي وصالك واللي بتعتبر نقطة تحول في تاريخ أنغام. ودي كانت بداية التعاون بين أنغام وبين الملحن الموهوب شريف تاج، اللي قدم لها أغاني كتير بعد كده. لكن أول تعاون يفضل هو الأكثر نجاحًا والأكثر جمالًا.

 

ستة الصبح

أغنية 6 الصبح لحسين الجسمي مثال للأغنية الإيقاعية الخفيفة شكلًا ومضمونًا. كانت أول تعاون بين الجسمي وأيمن بهجت قمر، وبعد ما قدم الملحن القدير وليد سعد أغنية بحبك وحشتيني للجسمي في فيلم الرهينة قدم له الأغنية دي.

 

Daddy Cool

فريق الـ Boney M  حقق نجاح ساحق في السبعينات – ودي تالت مرة نتكلم عن السبعينات- ضمن موجة موسيقى الديسكو، اللي بدأت من أمريكا وانتشرت في العالم كله.

فريق Boney M كان حالة خاصة. لأنهم كانوا بيقدموا استعراضات وكلمات غريبة إلى حد كبير. لكن المزيكا بتاعتهم كانت جديدة ومختلفة. وللأسف الفرقة دي استمرت لفترة بسيطة واختفى أعضائها فجأة بعد 3 سنين بس من بدايتها. وبنقترح تسمعوا أغنيتهم الأشهر والأجمل Daddy Cool.