The Definitive Guide to Living in the Capital , Cairo , Egypt

في المقال ده جمعنا لكم أفضل 10 أغاني عن الحب، بمناسبة أننا في الربيع.. كنا حريصين في الاختيارات إننا نجمع أغاني من أزمنة وأشكال مختلفة، ونتمنى أن اختياراتنا تعجبكوا.

أنا لك على طول

ما ينفعش نتكلم عن أغاني الحب وما نقولش عبد الحليم، أغنية أنا لك على طول اللي غناها للجميلة إيمان في فيلم "أيام وليالي" من ألحان موسيقار الأجيال محمد عبد الوهاب. اللي قدر بذكاء أنه يجذب عبد الحليم ويعمله أغاني مناسبة لصوته. والأغنية من كلمات الشاعر الكبير مأمون الشناوي.

 

خليك فاكرني

أغنية خليك فاكرني كانت بداية التعاون بين عمرو دياب وعمرو مصطفى. وقتها عمرو مصطفى ماكنش مشهور فكانت انطلاقة ممتازة. الأغنية دي مثال ممتاز ومتكامل للأغنية الـ Slow فيها شحنة عاطفية عالية، وفيها مسحة شجن، وقدر عمرو دياب يعبر عنها بحرفنة، وهنا لازم نقول أن ذكاء عمرو دياب مش أنه بيروح ناحية اللون اللي الجمهور عايزه، أو أنه بيقدم له اللي هو عايز يسمعه، إنما عمرو دياب هو اللي بيحرك -أو على الأقل بيأثر- في الذوق العام. بيحدد اللي الجمهور بيسمعه لكذا سنة بعد كده.

 

ياللي بتغيب عليا

كل الجيل اللي حب أغنية ياللي بتغيب عليا لمحمد محي أو ارتبط بها، كلهم دلوقتي أو أغلبهم بقى أصلع واتجوز وبقى عنده عيال! وأكيد صاحبته أو حبيبته اللي كان بيغني لها الأغنية دي اتجوزت وخلفت وبقت إنسانة مختلفة خالص عن اللي كان بيحبها زمان!

الأغنية كانت في البوم صورة ودمعة اللي صدر في 2002. والألبوم ده هو حجر الزاوية في مشوار محمد محي كله، أو نقدر نقول نقطة الذروة، الألبوم كان نقطة مضيئة مش في تاريخ محي بس لأ في تاريخ جيلنا كله، وكان انطلاقة للملحن محمد رحيم، اللي قدم مزيكا مختلفة وجديدة.

 

How deep is your love?

أغاني فريق Bee Gees لسه عايشة لحد دلوقتي، لأنها كانت طالعة من القلب فعلًا. أغنية How Deep Is your love اتغنت في فيلم  Saturday night fever . وكانت الموسيقى التصويرية لجون ترافولتا وهو بيرقص مع كارين لين.

والملفت في الأغنية أن موسيقى الديسكو كانت بتعتمد بشكل كبير على الإيقاع التقيل العالي.. لكن هنا الـ Bee Gees  قدموا أغنية Slow بروح الديسكو.

 

أنا ساندة عليك

أنغام من وقت ما بدأت وهي بتقدم كل الأشكال الموسيقية، لكن الأقرب لروحها ولإحساسها كانت الأغاني الرومانسية. وبعد كل العمر ده، اكتسبت خبرة بفعل السنين ونضجت فنيًا على مستوى الاختيارات وعلى مستوى الإحساس.

أنغام سنة 2015 قدمت أغنية أنا ساندة عليك من كلمات أمير طعيمة وألحان عزيز الشافعي. الأغنية نزلت سنجل وبعدين ضافتها لألبوم أحلام بريئة. الأغنية في حد ذاتها تدل على نضج كبير، بقت بتغني باحساس الست الناضجة. الحب عندها فيه لهفة، بس بهدوء. احتياجها لحبيبها علشان تسند عليه، علشان تكمل مشوار حياتها. هيبقوا متلازمين طول الوقت. مش مجرد حب من أجل الحب.

 

معقول

فضل شاكر كان من أهم الأصوات على الساحة. الصوت الدافي اللي بيغني لون خاص بيه لوحده. سنة 2002 في عيد الحب سمعنا أغنيته الرائعة معقول. اختيارت فضل كانت مختلفة جدًا. وطريقة غُناه كمان كانت مختلفة، رغم مساحة صوته اللي مش واسعة أوي. أغنية معقول كسرت الدنيا. واحتلت إذاعات العالم العربي لفترة طويلة.

 

بكلمة منك

شيرين اشتهرت باللون الطربي أو الشعبي، لكنها أصرت تغير فكرة الجمهور والنقاد عنها، عشان تقول إنها تقدر تقدم كل الأشكال الغنائية، شيرين قدمت أغاني رومانسية كتير، لكن من أهمها أغنية بكلمة منك. شيرين قدرت تعبر عن كلام الأغنية ولحنها باحساسها العالي وأدائها الرائع رغم بساطته.

 

شايف البحر

برضه مينفعش نتكلم عن أغاني الحب ومنتكلمش عن المطربة العظيمة فيروز، أغنية شايف البحر من أشهر وأجمل أغانيها، الأغنية صافية ورايقة زي لون السما.

 

حبك وجع

الثنائي سمير صفير ونزار فرنسيس قدموا أغاني مهمة وجميلة في مسيرتهم، وقدموا لإليسا أغنية حبك وجع. وهنعرف ببساطة أنها من كلمات الشاعر الكبير نزار فرنسيس لما نسمع حاجة زي (والعطر عنده وفا أكتر من أصحابه) سمير صفير قدم لحن مناسب لصوت إليسا، قدم لحن مختلف عن شغله هو شخصيًا.

 

ملهوفة عليك

جنات من بدايتها اختارت الأغاني الرومانسية، المناسبة لصوتها الرايق وإحساسها العالي. لكن أغنية ملهوفة عليك كانت من أنضج تجارب جنات وأهمها.

 

خلصت الأغاني لكن قصص الحب عمرها ما هتنتهي.