The Definitive Guide to Living in the Capital , Cairo , Egypt

مطاعم

اختيارات كايرو 360: أفضل مطاعم الأكل الشرقي في القاهرة لسنة 2021

أفضل أماكن اختيارات كايرو 360 لأفضل مطاعم بتقدم أكل شرقي في القاهرة لسنة 2021 اختيارات محرري كايرو 360 لأفضل المطاعم
اختيارات كايرو 360: أفضل مطاعم الأكل الشرقي في القاهرة لسنة 2021
    بواسطة
    Omar Abd-elmaqsoud

    الأكل الشرقي معروف بحلاوته وجماله، باعتباره واحد من أشهر وأهم المطابخ في العالم، مش بس في الشرق. وباعتبار إن القاهرة عاصمة عالمية وكمان في الشرق، فكان لازم نشوف تنوع في أطباق ومكونات الأكل الشرقي فيها بشكل كبير، لكن يا ترى مين الأفضل في كايرو بيقدم أطباق شرقية مختلفة ومميزة؟ تعالوا نعرف رأي فريق كايرو 360 اللي اختار لكم أفضل مطاعم الأكل الشرقي في العاصمة لسنة 2021.

    كازوزة – Kazouza:

    لو بتحن لأيام زمان وطعم الأكل بتاع زمان، وقعدة القهاوي والديكورات المصرية القديمة،  يبقى نصيحة روح “كازوزة” ومش هتندم.

    باب الحديد – Bab ElHadid:

    ممكن نقول دكتوراه في الحواوشي والسجق الشرقي والكبدة، عايز تاكلهم سندوتشات ماشي، مع فتة شغال، حاف وتغمس وماله، من الآخر لو فتحت “باب الحديد” يبقى هتدخل عالم تاني من الأكل الشرقي، مادخلتوش قبل كده.

    زوبا – Zooba:

    تجربتنا في “زوبا” ماكنتش مرة ولا مرتين، تجربتنا لزوبا كانت تجربة قلبت بعشرة، وعيش وملح وطعمية وفول وجبنة وحاجات كتير أوي، مش هتعرفها غير لما تجربها.

     

     

    عنب بيروت – Enab Beirut:

    عنب بيروت قعدته هادية ولطيفة جدًا، وكمان بيوفر قعدة آوت دوور هايلة للفطار. ده طبعًا غير جودة الأكل.

    لو طربوش – Le Tarbouche:

    هتستمتع بمجموعة مختلفة من الأكلات، وأنت قاعد وسط الديكور العثماني، والتفاصيل الإسلامية. في مطعم لو طربوش في الزمالك.

    طابون – Taboon:

    صحيح الأكل الشرقي مافيهوش اختراع، لكن في الحقيقة “طابون” هيحسسك إن الأكل الشرقي اختراع ومش سهل يتعمل في أي حته غير عنده، المكان بتفاصيلة المودرن بيعملك ميكس لطيف بين طعم زمان وأجواء دلوقتي.

     

     

    أيادينا – Ayadina:

    من المطاعم اللبنانية المميزة على مستوى القاهرة، ومن المطاعم المميزة والمختلفة في أجوائها وخدمتها، وبستحق تجربتك لو كنت غاوي أكل لبناني، ودي مش تجربتنا الأولى للمكان، ومش هتبقى الأخيرة.

    باب الشرق – Bab El-Sharq:

    في فندق نايل ريتز كارلتون هتدور على باب هيدخلك لعالم الشرق، أسمه “باب الشرق” هتدوق فيه أصناف متنوعة من الأكل الشرقي اللذيذ. وأكلات مختلفة مش بيعملها بطعم مميز غيره.

    لا بالميري – La Palmeraie:

    لازم أكلات مطعم “لا بالميري” في فندق سوفيتيل الجزيرة تكون سبب في انبهار غير طبيعي لكل اللي هيروح، يمكن تكون جربت الأكل المغربي قبل كده، لكن حتى لو مش مجربه برده هتنبهر.

     

    ليبانيز دينر – Lebanese Diner

    الأكل اللبناني بيرقص دبكة في “ليبانيز دينر” واحنا هنرقص معاه من حلاوته، وده لإن المكان مش بس مميز بأجواؤه وطعامة أكله، لأ كمان بيقدم منيو مخصص للأطفال، يعني لو الخروجة عائلية ماتشلش هم، عرفت بقى هنرقص دبكة ليه؟؟.

    مقترح