The Definitive Guide to Living in the Capital , Cairo , Egypt

مطاعم -
مقترح

التايلاندي حاجة والصيني حاجة ثانية خالص: 4 مطاعم في القاهرة فاهمين الموضوع صح

أكل صيني، أكل تايلندي، مطاعم القاهرة، الأفضل
التايلاندي حاجة والصيني حاجة ثانية خالص: 4 مطاعم في القاهرة فاهمين الموضوع صح
    بواسطة
    Cairo 360

    “الأكل التايلاندي بعيد خالص عن الأكلات البسيطة السهلة، الفكرة هي الجمع بين مكونات أكل تعمل طعم متجانس وجديد، كثير من الغربيين بيشوفوا أنه لخبطة نكهات مع بعض مش أكثر، بس للتايلاندي الأصيل الموضوع مهم جدًا؛ الناس دي بتستمتع بتعقيد الموضوع.

    الطباخ وخبير الأكل التايلاندي ديفيد تومسون تكلم عن مطبخه بنوع من الانهزامية واعترف أن العالم عمره ما هيقدّر الأكل التايلاندي، دائمًا كلمة “المطبخ الآسيوي” بتشمل أكلات كثيرة عند مطاعم القاهرة، وبرضه الأكل التايلاندي حقه مهضوم وسط مشهد الأكل القاهري، صحيح فيه حاجات كثيرة مشتركة بينه وبين الأكل الصيني –وأخذوا كثير من الأطباق وعدلّوا فيها بمرور السنين– بس الأكل التايلاندي عنده نقاط قوة تميزه عن الصيني، والكلام ده برضه مش متقدّر في القاهرة، أكيد فيه منيوهات هتشوف فيها كام طبق تايلاندي، لكن أماكن قليلة قررت تدافع عنه.

    بيرد كيدج – Birdcage

    من المطاعم الفخمة اللى لها صيت في القاهرة “بيرد كيدج – Birdcage” في أنتركونتننتال سميراميس، ويعتبر واحد من أفضل –لو ما كانش الأفضل فعلًا– المطاعم التايلاندي في العاصمة، تخيل لما مكان يجمع بين فخامة فندق عالمي مع لمسات متقنة من الشرق الأقصى النتيجة هتطلع شكلها إيه؟ كمان المطعم يعتبر من أحسن الأماكن من ناحية الأسعار بالمقارنة مع شكل المكان وجودة الأكل اللي بتظهر في منيو مختصرة بس معمولة باحترافية.

    كمالا – Kamala

    هو المطعم الوحيد معانا اللي مش مقصور على الأكل التايلاندي، كمالا في كونراد القاهرة يعتبر من المطاعم القليلة اللي بتحافظ على مستوى كل حاجة في المنيو الآسيوية. المنيو فيها اختيارات متنوعة تشمل أكل صيني وأندونيسي، وطبعًا الأكل التايلاندي وأكلات من أماكن ثانية، كمالا بشكل عام مكان ممتاز، والأطباق التايلاندي تحديدًا حكاية، خصوصًا أطباق الكاري، نفس الكلام بالنسبة للطبق المعروف باد تاي.

     

    روين تاي – Ruen Thai

    العقل بيقول أن مطعم تايلاندي في فندق تايلاندي أكيد هيعمل أكل تايلاندي ما حصلش، الكلام نظريًا سليم 100 %، بس ممكن تقول لي إيه في القاهرة بيمشي بالمنطق؟ لحسن الحظ “روين تاي – Ruen Thai” أثبت نفسه كواحد من أجمد مطاعم الأكل التايلاندي، روين تاي واحد من مطاعم دوسيت ثاني ليك فيو في التجمع الخامس، وأكيد التجربة هناك مكلفة بس الموضوع فعلًا يستاهل تدفع الفلوس اللي شقيت فيها من ناحية المكان والطعم وكل حاجة.

    يام ين – Yam Yen

    “يام ين – Yam Yen” هو جوهرة ثمينة مستخبية في المعادي، بس عنده مشكلة وهي تفاوت الأسعار –يعني المقبلات أسعارها قريبة من الأطباق الرئيسية– وده كان مصدر إزعاج لمحرري كايرو 360 وقت زيارتهم للمكان، بس لو كنت جعان على الآخر وقررت تكمل الموضوع للنهاية، فأنت على موعد مع أكلة تايلاندي لذيذة، يام ين يتميز بحديقة ونافورة ومدخل خشبي مع ديكورات من البامبو، أما الأطباق –اللي منها حاجات كمياتها أصغر مما تتخيل– ممتازة وتتميز بالدقة والطعم اللطيف.

    مقترح