The Definitive Guide to Living in the Capital , Cairo , Egypt

مطاعم

 تروح فين لو عاوز تتمزج بطبق كشري مميز في القاهرة؟

أجمد مطاعم كشري في القاهرة أشهر محلات كشري في القاهرة أفضل كشري في مصر محلات كشري
 تروح فين لو عاوز تتمزج بطبق كشري مميز في القاهرة؟
    بواسطة
    Cairo 360

    رنا شرف

    هي الأكلة الوحيدة اللي كل المصريين اتفقوا على عظمتها! بنتكلم عن الكشري، الأكلة المصرية الأصيلة اللي لسة محافظة علي جمهورها الكبير سواء المصري أو العربي أو حتي الأجنبي.

    الأكلة دي بتبهرهنا رغم بساطتها ومكوناتها العادية، شوية أرز مع عدس ومكرونة وصلصة ودقة وشطة، ومعاهم شوية بصل متقطع ومتحمر في الزيت اللي مطاعم الكشري بتسميه ورد.

    ومن بين مطاعم كشري كتير في القاهرة إحنا بنعشق 4 مطاعم وشايفين أنهم مميزين بجد! يلا بينا نتعرف عليهم.

     

    كشري هند.. ملك التيك أواي

    من الأسامي الجامدة في عالم الكشري، واللي مخليه منافس حقيقي لباقي المطاعم هو سعر علبة الكشري، اللي لسة ثابت عند 10 جنيه، ودي علبة تيك أواي، كمان طبق الكشري الكبير بـ 25 جنيه، وطبق الأرز باللبن بالقشطة والمكسرات 12 جنيه، والساده بـ 8 جنيه، يعني نقدر نقول كشري هند خروجة اقتصادية رغم الجودة العالية.

    فروعه في مدينة نصر والتجمع والعاشر من رمضان.

    كشري أبو طارق.. العالمي

    أكيد كشري أبو طارق علامة كبيرة في مجال مطاعم الكشري ويعتبر عالمي لأنه فعلًا دخل موسوعة جينيس بأكبر طبق كشري في العالم سنة 2015، وكمان له عشاق من كل دول العالم.

    فروعه كتير، وهتلاقيه بره مصر كمان، في دبي والسعودية.

    الكشري جودته عالية، والمطعم لسه محافظ علي جمهوره. سعر الطبق الصغير 10 جنيه، والمتوسط بـ 15 جنيه، والكبير بـ 20 جنيه، والحلو كله  سعره واحد 10 جنيه، وعنده أضافة مختلفة وهي جيلي، وده نادر لما تلاقيه في مطعم كشري.

     

     الخديوي.. ملك شبرا

    لو أنت من منطقة شبرا أو قريب منها لازم هتسمع اسم الخديوي! المطعم مسيطر هناك مش بس في الكشري، لكن كمان في الطواجن الحلوة اللي طعمها جميل فعلًا.

    الأسعار بتبدأ من 8 جنيه، وده أرخص سعر طبق كشري في القاهرة، وبتوصل لـ 22 جنيه للكبير. والحلو بـ 8 جنيه. وده أحلى طبق أرز باللبن بجد.

     

    كشري التحرير.. نجم وسط البلد

    من معالم وسط البلد، واللي بيعتبر مسيطر في عالم الكشري وله عشاق كتير. كشري التحرير من المطاعم اللي لسة محافظة علي سعر طبق الكشري، والأسعار هناك بتبدأ من 15 جنيه، ولو أنت رايح مع أصحابك أو أهلك ممكن تطلب طبق كبير بـ 110 جنيه يكفي 5 أفراد.

    الحلو عنده أرز باللبن، سعره 15 جنيه، المطعم له فروع كتير في القاهرة، لكن إحنا بنحب فرع وسط القاهرة أكتر.

    مقترح