The Definitive Guide to Living in the Capital , Cairo , Egypt

لما بنحب نخرج ناكل برة دلوقتي، بيبقى لينا شوية رولز بندور عليها، خاصة إن الخروجة لازم تكون مميزة. والرولز دي أساسها الفيو، والقعدة الرايقة، والخدمة الكويسة، والأكل المتنوع، وكمان الصور الحلوة اللي هنطلع بيها علشان تعيش معانا. وعلشان كده اخترنا تكون تجربتنا الجديدة في مطعم “الخان” اللي موجود في حديقة الأزهر. وخلال السطور الجاية هنقولكم على كل التفاصيل اللي محتاجين تعرفوها عن المكان والأكل.

نبدأ بحديقة الأزهر، رسم الدخول فيها 40 جنيه للفرد في الأيام العادية و50 جنيه في الويك إند. ومسموح بدخول العربيات، والساعة الأولى بـ25 جنيه، وكل ساعة زيادة بـ20 جنيه.

المطعم موجود على فيو البحيرة والقلعة في الجزء الشمالي من الحديقة، وعندهم أوبن دور بكراسي خشب مطعمة بالخوص. أما الإن دور، فالفيو لا يقل جمال عن الخارجي، بديكورات هتحسّوا إنكم دخلتوا العصر الخديوي، من الأرابيسك والأباليك لحد الكراسي والترابيزات اللي تحسّسكم بالفخامة الفاطمية.

الخدمة هناك ممتازة، والوقت ما بين الاستقبال واختيار الأوردر وبداية الأكل كان كويس جدًا. وفريق العمل هناك بيساعد في كل حاجة من أول الاختيار لحد آخر لقمة، وكمان لو محتاجين مساعدة في التصوير هيبقوا معاكم.

بدأنا بالأكل الشامي، وده كان سيت منيو بـ1100 جنيه. كان فيه سلطة حمص مميزة، وتومية خفيفة طعمها مش لازع، وسلطة فتوش، ومناقيش خطيرة، وصفاية يالنجي حلوة، وورق عنب بدبس الرمان اللي مكانش المفضل لينا.

كمان كان مع الأكل 3 اختيارات من المقبلات، واحنا طلبنا كبيبة لحمة وكانت عظيمة، وترشيح ممتاز من الويتر. وجبنة حلومي مشوية كانت مقبولة، وأخيرًا الأرز الفارسي اللي عجبنا جدًا، وده كان عبارة عن أرز أصفر مع أبيض ومكسرات وجوز هند وزبيب.

الطبق الرئيسي كان فتة فراخ، ودي كانت عبارة عن أرز أبيض وعيش مقرمش وثوم وزبادي مع قطع فراخ. وخلينا نقول بجد إن الطبق ده مميز جدًا، ورغم خوفنا من الفتة الشامي لكن انبهرنا بالطعم.

جربنا كمان الكفتة على الجريل، وكان سعرها 480 جنيه. رغم تأكيد الشيف إنها بتكون على الفحم، بس طعم الفحم مكانش باين، والمستوى العام للحمة والتتبيلة مكانش زي ما توقعنا، ونتمنى يعيدوا ضبط الريسبي.

في الحلو، جربنا طاجن أم علي بـ120 جنيه، وبيتعمل مخصوص وسخن، وطعمه كان حلو، لكن للأسف كنا طالبينه من غير زبيب، وكان فيه زبيب كتير. ودي نقطة مهمة جدًا لأن فيه ناس عندها حساسية أو متطلبات غذائية خاصة، فلازم يتم الالتزام بالطلبات كويس. بس نرجع نقول إن الطاجن لذيذ، والخدمة ممتازة.

فيه شوية ملاحظات مهمة:

الحجز الأفضل تعمله قبل ما تروح.

ولو بتحبوا الصيف، الوقت مش هيفرق معاكم، لكن لو مش من محبين الحر، اختاروا الوقت من 7 لـ10 مساءً، أو من 10 الصبح لـ12 الظهر لو رايحين تفطروا.

تقدروا تعرفوا أكثر عنهم من خلال حسابهم على إنستجرام من هنا.