The Definitive Guide to Living in the Capital , Cairo , Egypt

دليلك لأهم 5 مطاعم على قد الإيد في وسط البلد
    بواسطة
    Mohamed Talaat

    وسط البلد حياة تانية خالص، تختلف عن أي منطقة في القاهرة كلها، ولازم كل مصري ينزلها ويروح يخلص فيها مصلحة أو يشتري حاجة، أو حتى يقابل أصحابه، وعلشان المنطقة دي مهمة جدًا قررنا في كايرو 360 ندلكم على أهم 5 مطاعم تقدروا تاكلوا من عندهم أو حتى تطلبوا دليفري في أي حتة.

    آخر ساعة

    وله 3 فروع في وسط البلد، تقدر تطلب منهم من الفول لوجبات اللحوم، ومعروف عنه جودة السندوتشات وسرعة العاملين في تلبية الطلبات، وفروعهم موجودة في شارع 26 يوليو أمام دار القضاء العالي، وبمنطقة الممشى في التوفيقية بجوار نايل ستوك، والفرعين دول فيهم صالة طعام، أما الفرع الثالث فهو تيك أواي ومكانه في شارع عبد الخالق ثروت تقاطع طلعت حرب.

     

    كشري التحرير

    وبمناسبة شارع عبد الخالق ثروت، فإحنا بنرشح لك كشري “التحرير” اللي له فرع في عبد الخالق ثروت قصاد المالكي، وكمان فرح في باب اللوق جنب الجريك كامب.

     

    جاد

    ولو عاوز تاكل فول وطعمية وكبدة اسكندراني وبيتزا وغيرهم فاحنا بنقترح عليك مطعم جاد اللي موجود في شارع 26 يوليو، وإحنا شخصيًا بنحب ناكل هناك سندوتش بطاطس بالجبنة الرومي، وده إدمان لنا، وكمان فيه فرع في باب اللوق قريب من قهوة الحرية.

     

    سيد حنفي

    وفي أول ممشى التوفيقية فيه كمان كشري سيد حنفي الغني عن التعريف، وكمان عندهم فرع في منطقة الإسعاف تقاطع 26 يوليو مع شارع رمسيس، وعندهم صالة طعام في المطعمين.

     

    قزاز

    أما قزاز فمعروف عنه السعر الجيد والجودة الممتازة، ومشهور بالشاورما السوري، وعندهم من الفول والطعمية لحد وجبات المكس جريل واللحوم والفراخ، وطبعًا أحسن واحد بيعمل “عدس إسناوي” في وسط البلد كلها في الشتاء، واللي صعب تقاومه.

    مقترح