The Definitive Guide to Living in the Capital , Cairo , Egypt

على الرغم من إنه كافيه دوبيو زيرو تم افتتاحه في القاهرة من فترة مش كبيرة، إلا إنه محقق نجاح كبير ملحوظ، ولو جيت بالليل في الويك إند ممكن ما تلاقيش مكان لكذا سبب: أولًا المكان حلو والأكل مميز، ثانيًا ده الكافيه الوحيد الكبير في الشارع كله فأكيد سكان المنطقة ما صدقوا أنه كافيه حلو جديد يفتح في المربع السكني ده، ثالثًا بعد إغلاق كتير من الكافيهات الموجودة في شارع النزهة زاد الإقبال على الكافيهات الموجودة في الشوارع الجانبية. الكافيه موجود في شارع حسن أفلاطون بعد مستشفى عبد القادر فهمي ودار البنك الأهلي.

كافيه دوبيو عالمي، أول فرع منه تم افتتاحه سنة 2002 في جوهانزبيرج وكان كافيه هادي بيقدم فطار ومخبوزات وأصناف من مطبخ البحر المتوسط.  00 الموجودة جنب كلمة دوبيو بترمز لأفضل أنواع الدقيق في العالم وإللي بيستخدم في صناعة البيتزا والباستا والمعجنات عندهم.

أما في مصر فأول فرع كان في 2014 في كارفور اسكندرية وفر ع القاهرة هو الفرع التاني في مصر وقريبًا هيفتح فرع جديد في مول ريفير واك في بوابة 12 الرحاب.

من مميزات الكافيه إنه بيفتح الساعة 8 صباحًا، وده مناسب قوي للناس إللي بتحب تشرب قهوة قبل الشغل أو بيحبوا يفطروا، كمان هو مناسب جدًا للشغل والمذاكرة والإجتماعات الصباحية بسبب هدوءه وإضاءته الكويسة والإنترنت المجاني الواي فاي.

من الحاجات الحلوة إنه المكان فيه أشكال مختلفة للقعدات: تحت سواء في التراس أو أمام الميني بار، أو فوق في الجزء المفتوح أو الجزء المكيف.

المكان مناسب لاصطحاب الأطفال. في الدور إللي تحت، ممكن يجربوا بنفسهم يلبسوا طاقية الطباخ ويقفوا على الميني بار بتاع البيتزا يخبزوها مع الشيف ودي تجربة لطيفة جدًا بتبسط الأولاد وبتعرفهم مكونات البيتزا وكمان بيتصوروا صور حلوة. سعر بيتزا الأطفال(مارجريتا) وتجربة الخبيز 32 جنيه. الدور إللي فوق فيه منطقة خالية تمامًا من الشيشة وفيها غرفة للأطفال من الزجاج فيها لعب حلوة ومسلية.

إحنا زرنا دوبيو زيرو مرتين أو تلاتة قبل ما نكتب الريفيو ده وده إدانا الفرصة إننا نجرب كذا صنف ودلوقتي هنحكي ليكم تجربتنا هناك بالتفصيل:

في البداية وصلتنا المنيو، وبصراحة المنيو بتاعتهم كبيرة جدًا حجمًا وكمًا وفيها أصناف كتير جدًا متنوعة من مطبخ البحر المتوسط.

أول يوم طلبنا فطار دوبيو Doppio Breakfast  (59 جنيه) وده عبارة عن بيض مقلي بالطريقة إللي تحبها، طماطم مشوية، بيف بيكون، سوسيس لحمة أو دجاج، مشروم مشوي، جبنة حالوم، توست من اختيارك أبيض أو بني وزبدة ومربى.  وبصراحة  الفطار طعمه كان حلو وأهم حاجة إنه صحي وخفيف والحاجة مشوية بكمية دهون قليلة جدًا، وكمية البيض كانت كبيرة والفطار ده يكفي شخصين مستريح خصوصًا لو طلبت معاه إضافة زي مكعبات البطاطس المشوية في الفرن (13 جنيه).

بالنسبة للمشروبات جربنا كذا حاجة عجبتنا زي عصير البرتقال الطبيعي (28 جنيه) وإللي عجبنا لإنه مش متصفي تمامًا وفيه الألياف اللي بتحسسك بحلاوة العصير الفريش، الشاي المثلج بالخوخ والباشون فروت (30-32 جنيه)، وده من أكتر المشروبات كمية اللي بتتقدم في الكافية وكان منعش ومليان تلج وسكره مظبوط Fruit Medley ثمنه (34 جنيه) وده عبارة عن مانجو وفراولة وجوافة مع الكريمة المخفوقة والمكسرات، طعم المزيج ده حلو ومتجانس مع بعضه وبيتقدم في معظك الكافيهات باسم فلوريدا ونعتقد لو كانت كمية الكريمة والمكسرات أكبر شوية كان هيبقى أحلى بكتير. وكمان جربنا سموذي الليمون بالنعناع (28 جنيه) وإللي عجبنا فيه إنه سكره مظبوط والنعناع فريش مش syrup  زي ما فيه كافيهات كتير بتستسهل.

في الزيارة التانية جربنا Club- Sub ثمنه (55 جنيه) وده عبارة عن  كلوب ساندويتش من الحجم الكبير والمعتبر ومكوناته شرائح رومي مدخن وروست بيف وجبنة شيدر وطماطم وخس وبيض مسلوق ومسطردة بالمايونيز وبينزل معاه بطاطس محمرة. ولإن محررة كايرو 360 بتعمل دايت وبتحاول تاكل أكل صحي معظم الوقت طلبت التوست يكون بني واستبدلت البطاطس المحمرة بسلطة دوبيو الكلاسيكية وكان الساندوتش طعمه عجبنا، العيش مفيش خلاف عليه كان طازة وطري وطالما المكونات كويسة عادًة بيكون الكلوب ساندوتش مرضي لإنه مافيهوش فن كبير في صناعته. وبالنسبة للبنات اللي أكلتهم مش كبيرة الساندوتش ده مع البطاطس والسلطة ممكن أتنين ياكلوه مع بعض لإنه كبير نسبيًا.

في آخر زيارة لينا جربنا البيتزا بقى Quattro Formaggi  الحجم الكبير (71 جنيه) ودي عبارة عن بيتزا فيها 4 أنواع جبنة موزاريلا وريكفورد وشيدر وبارمازيان. بيتزا دوبيو بتمتاز زي ما قولنا في أول الريفيو إنها مصنوعة من أجود أنواع الدقيق وكمان بتمتاز بالعجينة الرقيقة جدًا المقرمشة وده بيبين حلاوة المكونات وجودتها بصراحة النوع ده من البيتزا لما بتتعمل بجبنة ردئية بيكون طعمها سيئ لإنها أساسًا معتمدة على الجبنة لكن الجبنة كانت من النوع الجيد ودهونها معقولة ما تحسش فيها بالدسم الزائد وطعم الجبنة الريكفورد كان طاغي ومخلي البيتزا طعمها مختلف جدًا عن المارجريتا. لو إنت متعود على البيتزا السميكة هتحس إنك ما شبعتش ومش هتنبسط قوي لكن لو بتحب تاكل البيتزا على أصولها بالعجيبنة الرقيقة هتعجبك جدًا.

من الحاجات إللي عجبتنا إنه الكافيه بيقدم طبق ترحيبي Welcome appetizer   بيكون عبارة عن مخبوزات من التوست وصوصات مختلفة (سلطة زبادي-سلطة حمص) بس الغريب إنه مش كل مرة كان بينزل قبل الأكل فركز بقى هناك واطلبه بنفسك كل مرة، التوست طبعًا والصوصات طعمهم مقبول جدًا لكن بكواليتي الخبز العالي اللي بيمتاز بيه دوبيو وبالمنيو اللي فيها حاجات جديدة ومبتكرة، نقترح إضافة مخبوزات مختلفة تخلينا عايزيين نجرب حاجات تانية عندهم وDip مختلف ومش تقليدي زي الحمص والزبادي . كمان فيه كارت Loyalty بيتختم لك عليه كل  مع الشيك وبتاخده وانت مروّح، وفي المرة الرابعة بتاخد بيه مشروب سخن مجاني زي القهوة أو الكاكاو مثلًا.

دوبيو في المجمل مكان حلو ومريح، ننصحكم بزيارته، قعدة هادية الصبح ومبهجة ومفرفشة بالليل وأكل حلو، أسعار مش قليلة نسبيًا لكن كميات محترمة ممكن اتنين يتشاركوا فيها لو أكلتهم عادية.