The Definitive Guide to Living in the Capital , Cairo , Egypt

التاريخ لما بيتكتب مصر دايمًا بتسبق، ومن 7000 سنة وإحنا بنصدر حضارة وثقافة للعالم كله في كل المجالات، والنهاردة عاوزين ناخدكم معانا في جولة في قلب القاهرة، بس مش أي جولة وخلاص، لا إحنا هنتكلم عن 7 مطاعم وكافيهات تاريخية، مجرد ما تدخلوها هتحسوا إنكم رجعتوا بالزمن ورا.. هتسافروا عبر العزمن من الحاضر لماضي مليان قصص، وشخصيات، وحكايات.

في التقرير ده، ركزنا على الأماكن اللي ليها تاريخ وروح بعيد عن الأسعار أو تقييمات الجودة، لأن الهدف إنكم تعيشوا التجربة وتستمتعوا بالأجواء، وتتعرفوا على جزء من تاريخ مصر اللي لسه عايش حوالينا.

الفيشاوي

أشهر الأماكن في العالم مش مصر بس، تأسس سنة 1797 ويعد أقدم مقهى ما زال محافظ على تصميمه وتاريخه بقعداته الخشب والمرايات والقهوة العربي وبراد الشاي والديكورات الأصيلة، وجلس على مقهى الفيشاوي ملوك ورؤوساء وشخصيات تاريخية منهم نابليون ونجيب محفوظ.

العنوان: خان الخليلي – الجمالية.

جروبي

أول فرع ليهم في القاهرة كان سنة 1891، وبيقدموا حلويات كلاسيكية متخصصة وقهوة ومشروبات وأطباق مختلفة، ومازال محافظ على تفاصيله مهما اتجدد وأجمل ما في فرع وسط البلد الحديقة المتميزة الخاصة بيه وكان من أشهر روادها الملك فاروق، وعندهم فرع في مصر الجديدة تأسس سنة 1909.

العنوان: شارع عدلي – وسط البلد.

ريش

ريش كافيه كان ملتقى للمثقفين والثوريين وشهد اجتماعات مصرية أصيلة وخاصة لقادة ثورة 1919 وتأسس سنة 1908 وما زال محافظ على كل حاجة بتاعة زمان حتى عملاءه اللي بيختارهم بعناية، ومن أشهر رواده جمال عبد الناصر، أم كلثوم، سعد زغلول وغيرهم.

العنوان: شارع طلعت حرب – وسط البلد.

أمفتريون

الإسم مستحوى من الأساطير البونانية القديمة وده كان اسمه ملك طيبة، وتم تأسيس مطعم أمفيتريون سنة 1922، ونقدر نقول أنه قطعة أوربية تاريخية قديمة قدروا أنهم يكونوا محطة في حياة نخبة النخبة بمنطقة هليوبوليس على مر العصور وبيقدموا أكلات فرنسية وايطالية ومشاوي، وما زال محافظ على الطابع الخاص البسيط بتاعه.

العنوان: شارع إبراهيم اللقاني – مصر الجديدة.

الأمريكين

من الأماكن اللي زمن بيقف عندها ولحد دلوقتي له رونق هتحبوا المكان بسببه، وبيدقموا الحلويات بتاعتهم المميزة وأشهرها الكاساتا اللي مرتبطة بالاحتفالات وأيام العز، وهو تأسس سنة 1943 واشتهر بأنه كافيه الصفوة وكل المشاهير على مر العصور كانوا من زواره، وهو بيعتمد على تصميم قديم كلاسيكي بسيط بيطغى عليه الفخامة، وعندهم فرعين واحد منهم في شارع طلعت حرب.

العنوان: شارع 26 يوليو – وسط البلد.

بالميرا

سنة 1949 تأسس مطعم بوتيت بالميرا أو “القصر الصغير” وهو اسم على مسمى وبيعتمد في ديكوراته وتصميمه على الفخامة الكلاسيكية بروح مصرية وشكل أورويس، والمكان بيتميز بالهدوء التام والأجواء الرومانسية وبيقدموا أكلات من مطابخ عالمية وعربية مختلفة.

العنوان: شارع الأهرام – الكوربة – مصر الجديدة.

العربي

مطعم محافظ على روحه وجماله وديكوراته اللي مهما مرت سنين شامخة وثابتة زي ما هي، وبمجرد دخولكم المكان هتحسوا أنكم في أحد البيوت التاريخية المعتمدة على الأرابيسك والخشب، وبيقدموا أكلات مصرية من سنة 1968.

العنوان: شارع عبد المنعم رياض – المهندسين.