The Definitive Guide to Living in the Capital , Cairo , Egypt

مطاعم

في حب الكشري وصاحب مطعم الكشري.. 5 أسباب هيخلوك تقع في غرام “أبو طارق”

سر خلطة كشري ابو طارق في حب أبو طارق قصة نجاح أبو طارق كشري أبو طارق
في حب الكشري وصاحب مطعم الكشري.. 5 أسباب هيخلوك تقع في غرام “أبو طارق”
    بواسطة
    Mohamed Talaat

    لو كنت من عشاق طبق الكشري زي ملايين المصريين فأكيد جربت كشري “أبو طارق” في وسط البلد أكتر من مرة، المكان اللي بيقدم طبق كشري مميز ومختلف بسعر مناسب وخلطة ماحدش قدر يعرف سرها.. تعالوا نتعرف على 5 أسباب خلتنا نقع في غرام “أبو طارق” زي ما وقعنا في غرام الكشري بتاعه.

    1 – صنع ماركة عالمية!

    نجح “أبو طارق” في إنه يكون ماركة عالمية بجد، ورغم كونه بيقدم أكلة مصرية أصيلة، إلا أن طبق الكشري اللي بيقدمه مطعم “أبو طارق”، في دبي ومدن عالمية تانية، أصبح وجهة لكل جنسيات العالم، يعني إحنا بنتكلم بجد عن ماركة عالمية النهارده.

    2 – قدم لنا أحلى خلطة

    شهرة طبق كشري “أبو طارق” واللي خلته سفير لمصر في دول العالم، سببها مش بس أسعاره البسيطة اللي في متناول كل مواطن ، لكنها كمان في التسبيكة والطشة والتحويجة اللي ماحدش عارف سرها في طبق الكشري لحد النهارده.

    3 – قصة نجاح

    “أبو طارق” بيمثل حكاية كفاح كبيرة، بدأت في سنة 1963، لما قرر “أبو طارق” يكمل في المهنة اللي ورثها عن أجداده وهي بيع طبق الكشري المعروف بإنه “ملك الأطعمة المصرية”، ومن عربية صغيرة كان بيلف بيها “أبو طارق”، في وسط القاهرة، أصبح عنده مطعم كبير من أربع أدوار في منطقة معروف بوسط القاهرة.

    بعدها أصبح للمطعم فروع في مدن مختلفة، منها جدة ومكة ودبي ولندن.

    4 – لمسة أبو طارق لسة موجودة

    رغم إن “أبو طارق” مش هو اللي بيعمل الكشري حاليًا، لكن لمسته وروحه موجودين في كل شيف موجود في المطعم، واللي بيقدر يجهز لنا الطبق بلمسة “أبو طارق” السحرية، اللي بتعتمد بشكل أساسي على إعداد المقادير كل ساعة ونصف، بهدف تقديم الطبق طازة.

    5 – صاحب أكبر طبق كشري في العالم

    في سنة 2015، دخل “أبو طارق”، موسوعة جينيس للأرقام القياسية، لما نجح في تحضير أكبر طبق كشري في العالم، بلغ وزنه وقتها حوالي ٨ آلاف كيلوجرام، وقطره ١٠ أمتار في ١٠ أمتار، وارتفاعه ١٢٠ سم، يعني إحنا بنتكلم عن راجل فاهم تسويق صح، ومشرفنا في كل مكان.

    مقترح