من البامية للبصارة والعيش الشمسي.. “أوكرا” مطعم في الأقصر بيحكي تاريخ الصعيد في كل طبق
Visit Esna أكل الجدات إسنا الأكل الصعيدي السياحة المجتمعية المطبخ المصري القديم تجربة مصرية تراث الصعيد ستات إسنا مؤسسة تكوين مطاعم الأقصر مطعم أوكرا نايل كروز
Mohamed Talaat
في قلب الصعيد، وسط حضارة عمرها أكتر من 7000 سنة، وبين نَفَس التاريخ وعبق الحواديت، ظهر مطعم “أوكرا” كفكرة مختلفة تمامًا، بتعيد إحياء نكهات مصر القديمة، من خلال وصفات تراثية متوارثة من الجدات لأحفادهم في مدينة إسنا بمحافظة الأقصر.
مين ورا الفكرة؟
المطعم بتديره بالكامل سيدات من المجتمع المحلي في إسنا، وبدأت فكرته سنة 2023 من خلال مسابقة “مطبخ إسنا” اللي نظمتها مؤسسة “تكوين لتنمية المجتمعات المتكاملة”، وكان هدفها مش بس اكتشاف وصفات تقليدية، لكن كمان تمكين الستات وتوفير فرص شغل ليهم في مجال السياحة اللي كان محدود جدًا.
ليه اسمه “أوكرا”؟
الاسم مستوحى من “البامية”، وده مش بس مجرد طبق، ده رمز للبساطة والأصالة، والمطعم نفسه معمول جوه مبنى تاريخي في قلب إسنا. واللي هتلاقي فيه تجربة مختلفة، من أول استقبال السيدات لكم لحد مشاركة الضيوف في الطبخ بنفسهم!
الأكل حكاية تانية!
المنيو هناك معمول بنظام “سيت منيو”، وسعره 750 جنيه للفرد. ومن أشهر الأكلات اللي ممكن تدوقها هناك: البصارة بطعم زمان، البامية اللي على اسم المطعم، العيش الشمسي الصعيدي، الملوخية اللي طعمها مش زي أي ملوخية، والعدس البني، والشالولو، والمديدا، والسخينة (سمك ببهارات سحرية)، والمميز فعلًا إن كل طبق بيتحضّر طازة، يوم بيوم، بمكونات محلية وجودة عالية.
إزاي تروح؟
تقدر توصل لإسنا بسهولة لو كنت في الأقصر، سواء بالعربية، أو من خلال رحلات النايل كروز، أو حتى بالقطار. ومن هناك، التوك توك هيوصلك للمطعم بـ50 جنيه.
بس أهم حاجة تحجز قبلها بيوم على الأقل.
ليه لازم تروح؟
“أوكرا” مش بس مطعم.. دي رسالة، وتجربة بتمزج بين الطعم والحكاية والهوية. هناك، كل طبق فيه قصة، وكل ست في المطبخ هي حاملة لتراث، وكل زيارة هي خطوة في رحلة زمنية لروح المطبخ المصري الأصيل.
العنوان: شارع كنيسه مريم العذراء – امتداد شارع الخضري – إسنا – الأقصر.
رقم التليفون: 01028980167.
مقترح
صحة ولياقة
اسكيت X.. أول أكاديمية في مصر بتعلم التزلج لأبطالنا من أصحاب الهمم!
أصحاب الهمم أكاديمية سكيت X +12
معالم وسياحة
