The Definitive Guide to Living in the Capital , Cairo , Egypt

دايمًا بيكون عندنا تخوف لما نجرب فرع قديم أو مشهور في مجال الأكل، خصوصًا لما يكون له سمعة قوية زي “النجاحي أصل النيفة”، وبنقلق إن الطعم مايكونش زي الأصل.

لكن الحقيقة إحنا لازم نجرب علشانكم وننقل ليكم التجربة بصراحة، والمرة دي قررنا نروح فرع مدينة نصر بدل فرع الغورية، وهنقولكم في السطور الجاية كل التفاصيل اللي حابين تعرفوها عن المكان والأكل فيه.

المكان عبارة عن مجموعة محلات قريبة من بعضها، وصالة الطعام بعيدة شوية عن مكان الشوي والطهي، بعكس فرع الغورية اللي كل حاجة فيه قدامك وليه رونق خاص ومميز بنحبه.

الطاقم هناك “ابن بلد” وخدوم جدًا، حتى لو خبرتهم مش كبيرة، لكن بيحاولوا يساعدوا بحب.

إحنا قعدنا حوالي 9 دقايق انتظار لحد ما فضي مكان ودخلنا الصالة التانية (مش اللي قريبة من التجهيز)، وبنقول ده لأن الأكل موصلناش سخن قوي، بس الصراحة ده ما أثرش علينا.

الترابيزات والكراسي كانت من النوع الكلاسيكي “الفراشة” بتاعة زمان، والجو العام بسيط ومريح.

بدأنا الطلب بالسلطات: “خضراء وطحينة”، وسعر الفرد 15 جنيه.

الطحينة كان طعم السمسم واضح فيها، والسلطة الخضراء كانت “سلطة حاتي” زي ما الكتاب بيقول، ومعاها مياه السلطة اللي بنحبها.

طلبنا صينية مشكلة كبيرة فيها تلت نيفة بسعر 300 جنيه، وطعمها كان حكاية!

صح، مش بنفس قوة فرع الغورية، لكن تفضل من أفضل الحاجات اللي ممكن تدوقها في الطعم والرائحة والتسوية. يمكن الفرق نفسي مش أكتر.

كمان طلبنا تلت كباب بسعر 440 جنيه، والتسوية كانت ممتازة، لكن التتبيلة والطعم كانوا عاديين ومفيهمش حاجة مميزة.

أما تلت الريش اللي طلبناه بنفس السعر (440 جنيه)، فكان أحسن طبق في اليوم ده.. التتبيلة والتسوية كانوا ممتازين وبنرشحه كرقم 1 في فرع مدينة نصر.

طلبنا كمان تلت كفتة كندوز بسعر 160 جنيه، وكان طعم التتبيلة واضح أكتر من طعم اللحمة، فمكنتش الأفضل بصراحة، ونتمنى يراجعوا الوصفة بتاعتها.

وأخيرًا، جربنا نص فرخة مشوية بسعر 145 جنيه، وكانت ممتازة في التتبيلة والطعم وطريقة الشوي.

تقدروا تعرفوا أكتر عن “نيفة النجاحي” من خلال صفحتهم على فيسبوك من هنا.