The Definitive Guide to Living in the Capital , Cairo , Egypt

رمضان في مصر حاجة تانية، وأجمل ما في بلدما هو التفاصيل الجميلة اللي في كل مكان، وطبعًا الفيو الحلو مايتعوضش، ولما الفيو يكون المتحف القومي للحضارة المصرية والبحيرة المميزة اللي بالقرب منه، يبقى لازم نتوقع غنها هتكون تجربة مختلفة ومبهرة، وأكيد كل اللي هيروح هيستمتع بالأجواء المميزة دي، وخلال السطور الجاية هنعرفكم على كل تفاصيل الإفطار والسحور في متحف الحضارة.

أولًا، المكان متقسم لخيمتين مختلفتين، والفيو بتاعهم بيكون هو متحف الحضارة وبحيرة عين الصيرة، وهنبدأ بخيمة الراوي اللي موجودة داخل حديقة المتحف، وسعر الإفطار فيها 850 جنيه، وده بيشمل طبق تمر وفواكه مجففة، واختياركم من الشوربة، ومقبلات عبارة عن “حمص – لبنة – ورق عنب – سلطة – مخلل – بابا غنوج – كبه – سمبوسك – كبده”.

أما الطبق الرئيسي فممكن تختاروا من “الفيليه المشوي” واللي بيتقدم مع بطاطس وخضار سوتيه والصوصات أو ميكس جريل فيه “شيش طاووق – كباب وكفتة – أرز  – خضار مشوي”، وكمان تقدروا تختاروا صنفين من الأطباق الجانبية المتاحة “بطاطس بالفراخ – ملوخية بالفراخ – تورلي – أرز بالخلطة – أرز بالشعرية – مكرونة – نجرسكو – فطيرة لحم – بامية باللحمة – كفتة داوود باشا”.

أما المشروبات فمتاح مشروبات رمضانية وشاي وقهوة ومياه معدنية، وكمان الحلو ممكن تختاروا صنف واحد من “أم علي – سلطة فواكه – حلويات شرقية”.

وتقدروا تحجزوا من خلال الموقع الإلكتروني لخيمة الراوي من هنا.

أما خيمة السحور Noisette اللي موجودة على بحيرة القاهرة والفيو بتاعها المتحف القومي للحضارة، فبتكون فيها فقرات فنية وثقافية كتير، وبتبدأ من الساعة 10 مساءً، حتى 4 صباحًا، وسعر السحور 700 جنيه، وكل ويك إند بسعر 950 جنيه وده علشان بيكون فيه حفلات لفرق وفنانين كبار ومميزين، أما ترابيزة السحور فبيكون فيها “ترمس – حمص – فول سوداني” كتسالي، وكمان بيكون فيه أصناف باردة زي “جبنة – زيتون مخلل – جبنة بالقوطة – سلطة خضراء – طحينة – زبادي سادة أو لبن رايب”.

أما الأكل فالمنيو بيكون فيه “فول – طعمية بالسمسم – بيض أومليت أو مسلوق – بطاطس – فطير بسطرمة وحلومي – سجق – شاورما فراخ”، مع باسكت عيش، والحلو بيكون “أم علي”، وطبعًا مع مشروبات رمضان المختلفة والشاي والقهوة والمياه.

وتقدروا تحجزوا من خلال الموقع الإلكتروني لخيمة Noisette من هنا.