The Definitive Guide to Living in the Capital , Cairo , Egypt

من أغرب الحاجات في الاسكندرية عروس البحر المتوسط، وتاني أكبر المدن المصرية، واللي كانت في وقت من الأوقات عاصمة الثقافة في المنطقة، النقص الرهيب في عدد المطاعم الراقية على البحر. الفكرة إن أيام سان جيوفاني والنوادي المطلة على البحر خلاص راحت أيامها، ومعظم المطاعم هناك قفلت أو اتهدمت أو مستواها قل جدًا.

فلما سمعنا إن كريف فتح في كازينو الشاطبي، وشوفنا الصور المبهرة على انستجرام، كان لازم نطلع طلعة ونشوف إيه الكلام.

لازم الأول نتكلم عن روعة موقع المطعم، وإطلالته الكاملة الساحرة على البحر. والموقع ده ميزته كمان إن معظم الترابيزات شايفة البحر. وكمان القعدة منورة بنور الشمس. الديكورات والفرش في كريف ماشيين مع طابع المدينة الساحلية، بالألوان السماوي والرمادي والبيج والبني. واللي متناسقين مع الأرضية الرخام البيضاء، وفاصل المطبخ الذهبي. ممكن كمان نفضل طول اليوم نحكي ونتحاكى على النجف الجميل، اللي يشبه قفص العصافير. والزرع الصناعي المتعلق من السقف.

ننسى شوية الديكورات والأجواء، ونحب نعرفكم حاجة مهمة، إحنا روحنا كريف على الفطار في رمضان. ولازم نعترف إن ده أسوأ وقت في السنة تكتب فيه نقد لمطعم لأول مرة. يعني في معظم الأماكن الجرسونات بيكونوا مستعجلين، ومستوى الأكل بيكون أقل من الطبيعي. وكمان لازم تستحمل وقفة طابور البوفيه ودوشة الناس. نقصد إيه من كلامنا؟ المقال ده بيعبر عن فترة رمضان بس، ونتمنى التجربة تكون أحسن بعيدًا عن رمضان.

لما كنا بنحجز في كريف طلبوا منا نطلب الأكل قبل الفطار بكام ساعة. أول حاجة عرفناها إن في بوفيه للشوربة والسلطات داخل المطعم وتكلفة الفرد 90 جنيه. رغم إننا طلبنا الأكل بدري، لكن طلبوا نكون في المطعم قبل الفطار بنص ساعة. وصحيح الموضوع غريب شوية بس نسينا كل حاجة مع منظر البحر الساحر والتمشية على الكورنيش.

مع قرب ميعاد الفطار، الجرسونات كانوا شغالين بكل قوتهم. وجهزوا ترابيزتنا قبل الفطار بخمس دقائق، بمياه وكركديه والمقبلات اللي طلبناها، وهي ستافد مشروم بولز (43.95 جنيه)، وتشيكن ستريبس وشريمب كنافة (70.95 جنيه)، وصحيح مش هنقدر نشتكي من الخدمة السريعة، بس المشكلة إن الأكل برد شوية.

شوية صغيرين ووصلت الأطباق الرئيسية والبداية مع فيل بارميزان (126.95 جنيه)، عبارة عن

ثلاثة قطع فيليه مع سباجيتي بصلصة الطماطم. المختصر المفيد: كمية الأكل ممكن تشبع حصان صغير.

أما التشيكن ليمون ديل (80.95 جنيه) فكان هايل برضه وكميته كبيرة، ومعاه بطاطس مهروسة وخضار سوتيه.

بعد أكلة قوية ومفيش أي مكان لأي نفس، كان صعب نفكر حتى في أي حاجة حلوة، وعشان كده خرجنا نتمشى على البحر يمكن نهضم. إحنا كنا فردين وطلبنا طبقين شوربة وسلطة وثلاثة أطباق مقبلات ومعاهم الأطباق الرئيسين ودفعنا (760 جنيه). صحيح الأكل حلو والكميات هايلة، لكن حسينا إن الطعم والجودة أقل من السعر.

في نهاية كلامنا لازم نشكر كريف على الخدمة الممتازة والديكورات الساحرة. أكيد ننصح كل العائلات والأصدقاء يروحوا هناك عشان يستمتعوا بأكلة حلوة في مكان شيك ونظيف. من مميزات كازينو الشاطبي كمان الجراج الخاص بالكازينو (15 جنيه للعربية) ودي تعتبر حاجة مهمة جدًا عشان تركن عربيتك وأنت مرتاح وتنسى هم الونش.