The Definitive Guide to Living in the Capital , Cairo , Egypt

محلات الفرايد تشيكن بقت من الأكلات الأساسية في المطبخ المصري، ودائمًا فيه براندات بتفتح كتير، منهم اللي ليه بصمة مميزة ومنهم اللي بيختفي من غير ما حد يحس بيه. الفترة الأخيرة ظهر على السوشيال ميديا مطعم مشهور من الأردن متخصص في الفرايد تشيكن وبقى ترند، وفجأة لقيناه فتح فرع في القاهرة. علشان كده قررنا نتكلم معاهم ونتأكد إن الفرع تابع ليهم بالفعل، وطلّع فعلاً حاصل على حق العلامة التجارية. في السطور الجاية هنقولكم على تجربتنا مع مطعم مشهور القاهرة.

المكان عبارة عن كيتشن صغير، وفيه قعدة داخلية وقعدة أكبر آوت دور، والديكور كلاسيكي راقي وخفيف. المكان للأسف زحمة جدًا، وفريق العمل رغم مجهوده واضح إنه مش كافي وبيحتاج يكون بروفيشنال أكتر، وكمان أقل أوردر ممكن ياخد حوالي 45 دقيقة. إحنا الأوردر بتاعنا أخد أكتر من ساعة، رغم كلامهم إنهم ماشيين بترتيب الأرقام، لكن اللي شفناه إن أرقام بتطلع بشكل غير مرتب، زي مثلاً إحنا كنا رقم 184 وهم نادوا على رقم 190 فجأة.

نسينا كل ده عشان ننقلكم تجربتنا، وقررنا نجرب من عندهم “سيكرت مشهور” بـ210 جنيه، وكان عبارة عن ساندوتش فراخ فرايد مع خضار وصوص مسكر وجبنة شيدر بتوليفة مميزة عجبتنا جدًا، ونقدر نقول إنه أفضل منتج عندهم.

جربنا كمان أرز ريزو ناشفل بـ105 جنيه، الصوص كان مقبول، لكن الأرز للأسف مش الأفضل وكان واضح إنه متسوي من بدري، وطعمه حادق شوية.

وطلبنا وجبة فرايد تشيكن سوبر سنجل بـ249 جنيه، مكونة من 2 قطعة تندر و2 قطعة دجاج، ولسه كل اللي توقعناه من إعلانات البلوجر طلع مختلف. التندر كان لطيف وتتبيلته كويسة، لكن الطعم مقبول فقط، وقطع الدجاج العادية أو السبايسي للأسف ماعجبتناش خالص ومقدرناش نكملها.

ممكن تجربتنا تكون مش الأفضل، لكن بالتأكيد هنحاول نديهم فرصة تانية في وقت أقل زحمة، رغم إن مفيش مبرر لأي نقص في جودة الأكل حتى لو المكان كان مزدحم أو فريق العمل مش بروفيشنال.

العنوان: مشهور – وصلة دهشور – الشيخ زايد.

تقدروا تعرفوا أكتر عنهم من خلال صفحة الفيسبوك الخاصة بالمطعم هنا.