The Definitive Guide to Living in the Capital , Cairo , Egypt

معالم وسياحة

بعد الإعلان عن موعد افتتاحه.. حكاية أعجوبة اسمها “المتحف المصري الكبير”

آثار المتحف المصري الكبير المتحف المصري الكبير متاحف مصر معلومات عن المتحف المصري الكبير موعد فاتتاح المتحف المصري الكبير
بعد الإعلان عن موعد افتتاحه.. حكاية أعجوبة اسمها “المتحف المصري الكبير”
    بواسطة
    Mohamed Talaat

    أخيرًا، وبعد طول انتظار، أعلنت الحكومة المصرية رسميًا، عن الموعد المتوقع لافتتاح المتحف المصري الكبير. واللي هيفتح أبوابه أمام الزوار في الربع الأخير من سنة 2022، ومتوقع يكون نهاية سبتمبر أو بداية ديسمبر 2022، مؤكدة إنه من المقرر الانتهاء من كافة الأعمال الإنشائية والهندسية بالمتحف بحلول 30 يونيو 2022.

    والمتحف المصري الكبير، اللي هيضم أكبر مجموعة من الآثار المصرية في العالم، هيكون على هضبة الجيزة في ضواحي القاهرة، وعلى بعد دقائق من الأهرامات، وهيضم المبنى بالإضافة للعرض المتحفي المبهر، معارض ومركز أبحاث ومكتبة ومطاعم ومراكز تسوق.

    المتحف العالمي الأكبر لحضارة واحدة

    وفي 20 ديسمبر 2021، اختارت شبكة “تايم أوت” العالمية الترفيهية حدث افتتاح “المتحف المصرى الكبير”، ضمن قائمتها لأفضل 22 تجربة جديدة في العالم لازم كل إنسان يخوضها في سنة 2022، معتبرة أن افتتاحه هيكون “من أكثر التجارب والأحداث والافتتاحات الجديدة الممتعة والأصيلة واللي ماينفعش تفويتها في 2022”.

    وقالت الشبكة العالمية المتخصصة في صناعة الترفيه إن اختيارها افتتاح المتحف المصري الكبير ضمن أفضل التجارب والأحداث الممتعة في 2022، جاء بناءً على كونه “أكبر متحف في العالم مخصص لحضارة واحدة”، بالإضافة لموقعه المميز بالقرب من أهرامات الجيزة العظيمة.

    وهيضم المتحف المصري الكبير عشرات الآلاف من القطع الأثرية، وكمان هيعرض آثار وكنوز الملك الفرعوني توت عنخ آمون، اللي بيزيد عددها على 5500 قطعة أثرية، ودي هتكون المرة الأولى اللي هيتم فيها عرض مقتنيات من مقبرة الملك المصري الصغير في مكان واحد، ومنها قناعه الذهبي المثير.

    أعجوبة معمارية

    وفي تقرير نشرته على موقعها الإلكتروني يوم 19 ديسمبر 2021، شجعت صحيفة “ديلي ميل” البريطانية جمهورها على زيارة “المتحف المصري الكبير” ووصفته بإنه “واحد من العجائب المعمارية في العصر الحديث وأحد أكبر المتاحف في العالم”.

    ومن بين أهم القطع الأثرية اللي هيعرضها المتحف تمثال ضخم من الجرانيت بيمثل الملكة حتشبسوت في وضع الركوع وهي بتقدم أواني التطهير، بالإضافة إلى لوحة كبيرة من الحجر الجيري منقوش عليها الألقاب الملكية للملك سنفرو، ولوحة تانية مميزة للملك أخناتون والملكة نفرتيتي، و3 لوحات كبيرة الحجم بالنقش البارز من مقبرة رع حتب من عصر الدولة القديمة، و لوحتين من الجرانيت الوردي لباب عليه نقش بيصور الملك رمسيس الثاني في الوضع الأوزريري وهي مرتدي التاج الأحمر.

    والتكلفة الإجمالية للمتحف مليار دولار، بحسب تصريح سابق لوزير السياحة والآثار خالد العناني.

    وبيقع المتحف على بعد كيلومترين فقط من أهرامات الجيزة العظيمة. وهيتمكن زوار المتحف من مشاهدة الأهرامات من خلال واجهة زجاجية بطول 28 متر.

    وبيمتد المتحف على مساحة تقارب 500 ألف متر مربع، وهيضم عشرات الآلاف من القطع الأثرية من بينها 20 ألف قطعة هتعرض لأول مرة، يعني ماحدش في العالم كله شافها قبل كده.

    وبيتراوح عدد العمال اللي اشتغلوا في الموقع من 3 آلاف إلى 5 آلاف عامل، بحسب تقرير صادر عن Daily News Egypt، وبمجرد افتتاحه، هيكون المتحف قادر على استقبال 15 ألف زائر يوميًا.

    وأخيرًا..

    من المتوقع يقام حفل افتتاح ضخم ومبهر للمتحف في الربع الأخير من 2022، هتنقله أهم وسائل الإعلام العالمية، وهتحضره أهم الشخصيات.

    مقترح