The Definitive Guide to Living in the Capital , Cairo , Egypt

“البيت السيوي”.. حكاية متحف مدهش في قلب واحة سيوة
    بواسطة
    Mohamed Talaat

    واحة سيوة من أجمل الأماكن في مصر، على أرضها بتنسى الدنيا، وبتحس إنك رجعت لعصر مختلف، مليان راحة نفسية وحب وهدوء.. ويمكن علشان كده كتير من الناس بيعشقوا “سيوة” وبيعتبروها جنة سلام نفسي على أرض مصر.

    لكن للأسف مش كتير يعرفوا إن واحة سيوة فيها متحف جميل ومهم اسمه “البيت السيوي”، وده مكان عمره حوالي 30 سنة، تعالوا نعرفكم أكتر على المتحف ده.

    متحف البيت السيوي الفريد من نوعه على مستوى العالم، موجود في قلب واحة سيوة، وبتحيطه عشرات من أشجار النخيل المثمرة اللي بتشتهر بيها الواحة، المتحف ده ظهر للنور من ٣٠ سنة، بمنحة من الحكومة الكندية لحفظ تراث سيوة اللي بتعتبر أشهر واحات العالم.

    تم تشييد المتحف من الطين المخلوط بالملح المعروف باسم الـ “كيرشيف”، وتم تشييد السقف من جذوع النخيل، أما شرفاته وأبوابه فمصنوعين من أخشاب فلق النخيل، والهدف إنه يحاكي منازل واحة سيوة القديمة.

    وفي الفترة الأخيرة، قررت الحكومة المصرية مؤخرًا إجراء تطوير شامل للمتحف بإعادة دهان واجهات المتحف وقاعاته، وزيادة الإضاءة، وتزويده بمعروضات إضافية، وده بهدف تنشيط السياحة بالواحة اللي أصبحت بتشهد إقبال متزايد من السياح كل سنة.

    وبتحتوي قاعات المتحف على غرفة فيها تماثيل من الشمع لأشخاص لابسين اللباس السيوى التقليدي، بالإضافة إلى غرف بتضم الأواني الفخارية، وأدوات الزراعة البدائية اللي كان بيستخدمها أهل سيوة زمان.

    المتحف فيه كمان غرفة اسمها المربوعة السيوية، ودي حجرة الضيوف ومفروشة بكليم يدوى مصنوع من صوف الأغنام ووبر الإبل، بالإضافة إلى مشغولات الجريد اللى بتشتهر بيها الواحة.

    بتضم قاعات المتحف كمان الملابس التراثية لأهالي الواحة في المناسبات المختلفة، ومنها ملابس العروس “إملال شريح”، و”إشراح ناحواق”، و”طرقعت نقاين “، و”ترقعت نمورد “، بالإضافة إلى رداء “ترفوطت” وهو رداء المرأة السيوية المتزوجة، ده غير الإكسسوارات الفضية، ومن أشهرها “انطاد نازوار” وخاتم “بخماس والدملج والغوايش والدلايات والأساور والأقراط” اللي بتتزين بيها المرأة السيوية.

     

    إزاي تروح متحف البيت السيوي؟

    البيت السيوي موجود في قلب الواحة في حديقة مجلس المدينة، ولو كنت في سيوة، فأفضل طريقة تروح بيها البيت هي إنك تتمشى، لإنه على بعد حوالي 500م بس من قلب الواحة، أما المسافة من القاهرة فحوالي 750 كم وبتاخد 10 ساعات تقريبًا بالأتوبيس.

    مقترح