The Definitive Guide to Living in the Capital , Cairo , Egypt

رنا شرف

تصوير: حكيم

مصر فيها مبادرات شبابية جميلة، والقاهرة مميزة بناسها وأهلها اللي بيحبوها وعارفين قيمتها التاريخية، و”حكيم” شاب مصري عاشق لتاريخ العاصمة المصرية، وطول الوقت بيجتهد علشان يعرف الجميع بجمال مدينتنا وتاريخها العريق.

تعالوا نتعرف أكثر على مبادرة “حكيم” ونعرف إزاي نكون جزء منها.

 

محمد هو شاب مصري، اختار لنفسه اسم شهرة معبر، وهو “حكيم”، وكأنه عاوز يقول إنه قرر يكون الحكيم اللي يعرفنا تاريخ مصر بشكل عام، والقاهرة بشكل خاص، عمره 32 سنة، وهو بيحب التصوير، ورغم إنه محاسب في الأساس، لكنه بيحب أكثر يكون مرشد سياحي يعرف الناس بتاريخ مصر والقاهرة، من خلال جولات بيعملها بشكل مستمر بيجمع فيها كل اللي نفسهم يعرفوا الأماكن التاريخية في بلدنا عن قرب، وبيكون مرشدهم لرحلة تاريخية جميلة ومفيدة.

 

 

بيقول “حكيم” لـ”كايرو 360” إنه بيحب التصوير، وكان في البداية بيحب يزور أماكن تاريخية زى شارع المعز علشان يصور هناك، ولما وقع في غرام المكان قرر يعرف حكايته وتاريخه، وبدأ عملية بحث وقراءة لحد ما أصبح مؤهل يحكي للناس عن تاريخ الأماكن، ومن وقتها وهو بينظم جولات تاريخية لكل المهتمين بالأماكن التاريخية ومعرفة حكاياتها.

وعن جمهوره المستهدف بيقول “حكيم”: جمهوري من المصريين والعرب، وسنهم مختلف، بيكون معايا ناس في العشرينيات، وناس في الخمسينيات، بيجمع بينهم كلهم عشقهم للتاريخ.

وعن أكثر مكان بيحبه، بيقول “حكيم” إنه بيعشق شارع المعز لأنه مكان غني ومليان تاريخ وثقافة وفن وحكايات، وعن أكثر مكان مظلوم في مصر بيقول إنه منطقة الباطنية، اللي شايف إن فيه ناس كثيرة واخدة فكرة سلبية عنها وإنها مجرد وكر للمخدرات، وبينسوا إنها مكان تاريخي عظيم يستحق نتعرف عليه عن قرب ونغير الصورة النمطية اللي متاخدة عنه.

وبيقول “حكيم” إنه بيخرج كمان برة القاهرة، علشان يعرف الناس بأماكن أكثر زي بورسعيد مثلًا، واللي هتكون جولته القادمة، وعن أسعار الاشتراك في جولاته بيقول إنها رمزية وبتبدأ من 100 جنيه بس، لأن هدفه الناس تعرف مصر كويس وتعيش تجارب تاريخية مبهرة.

تقدروا تتعرف أكثر على “حكيم” وجولاته وتشاركوا معاه من خلال زيارة حسابه على إنستجرام هنا، وعلى فيسبوك هنا.